SALMOS 11 - Dios Rimashcata Quillcashcami

Diosca cashcata ruhuac runapac miticuna cashcamanta

Cantaccunata pushac cantachichun David ruhuashca Salmomi.

¹ Mandac Diospimi miticuni. Yangallami ñuca almataca: Volashpa ric animalcuna shina urcupi miticugri ninguichic.

² Millaita ruhuac runacunaca alli yuyaita chariccunata huañuchingapacmi arcotapish, flechatapish allichishpa pacalla charicun.

³ Callaripi churashca rumicunata anchuchicpica, cashcata ruhuac runaca ¿imatatac ruhuai pudinga?

⁴ Mandac Diosca paipaclla huasipimi tiyacun. Mandac Diosca jahua pachapimi jatun tiyarinataca charin. Huañuclla aichayuc runa ima shina cashcataca tucuita ricucun.

⁵ Mandac Diosca cashcata ruhuac runatapish, millaita ruhuac runatapish ricucunmi. Millaita ruhuanata munaccunataca tucui shunguhuanmi piñan.

⁶ Mandac Diosca millaicunapac jahuapica ninatapish, rupacuc azufretapish tamyachingami. Tucuita tucuchic tamya huairatapish cachangami. Tucui caicunami copamanta ubiana llaquicuna shina canga.

⁷ Mandac Diosca cashcata ruhuac cashcamantami imatapish cashcallata ruhuachun munan. Paipac ñahuitaca cashcata ruhuaccunallami ricunga.