SALMOS 109 - Dios Rimashcata Quillcashcami

Llaquichishca shina llaquichichun Diosta mañashcamanta

Cantaccunata pushac cantachichun, David ruhuashca Salmomi.

¹ Ñuca alli nina Dioslla, ama upalla saquirichu.

² Canta mana ricunayachic runapish, umac runapish ñucata piñashpa rimarcami. Ñucata llaquichingaraicumi llullarca.

³ Ñucata mana ricunayachishpami ñuca muyundipi shayarishpa rimarca. Shinallatac manapish, paita imata ruhuacpimi ñucahuan macanacurca.

⁴ Paicunata ñuca cuyacpipish ñucataca piñarcacunami. Ashtahuanpish cantami mañarcani.

⁵ Paicunaman allita ruhuacpipish, ñucamanpish mana allitami ruhuarca. Paicunata cuyacpica, yallitami ñucataca mana ricunayachirca.

⁶ Paicunata llaquichichunca canta mana manchac runata churaiyari. Paipac alli ladopica Satanás shayacuchun.

⁷ Juezpac ñaupapi taripashpaca, paita llaquichishca cachun. Pai mañashcallatac paita juchanchichun.

⁸ Pai causana huatacunapish ashalla cachun. Pai ruhuanataca shuccuna japichun.

⁹ Paipac huahua huahuacunapish taita mama illac saquirichun. Paipac huarmipish viuda saquirichun.

¹⁰ Paipac huahua huahuacunapish yanga purishpa mañashpalla micuchun. Paicunapac huasimanta caruman llucshishpa llaquinayaita micunata mashcachun.

¹¹ Paicuna tucui charishcataca cullquita mañachic tucui japichun. Paicuna trabajashpa imata charishcataca shuctac llactamanta shamuccuna japichun.

¹² Pipish paita ama llaquichun. Taita mama illac paipac huahua huahuacunatapish pi ama llaquichun.

¹³ Paipac huahua huahuacunapish tucui tucuchishca cachun.

¹⁴ Quipa tiyashca huahua huahuacunapish tucui tucuchishca cachun. Paipac taitacuna yallita mana allita ruhuashcataca Mandac Dios yuyaricuchunlla. Paipac mamapac juchatapish ama anchuchishca cachun.

¹⁵ Chai juchacunaca tucui causaipi Mandac Diospac ñaupapi ricurichun. Cai pachapi ama ashtahuan yuyarichunca Diosllatac tucuchichun.

¹⁶ Paica jaicapi llaquinata mana yuyarircachu. Ashtahuanpish huaccha runacunata, imatapish mana chariccunata shungupi llaquilla causaccunata huañuchingapacmi catirca.

¹⁷ Pitapish llaqui tucuchunllamimunarca. Chai llaquica paillatatacmi llaquichirca. Mana bendiciachun munarcachu. Chaimantami chai bendicionca paimanta anchurirca.

¹⁸ Churanata churarishca shina maldicionca cachun. Paipac huicsamanca yacu shina, tullumanca aceite shina yaicuchun.

¹⁹ Shinallatac churanahuan pillurishca shina, chumbihuan chumbillishca shina cachun.

²⁰ Ñucata yanga rimaccunataca Mandac Dios llaquichichun. Ñucata mana alli nishpa rimaccunataca chashnallatac llaquichichun.

²¹ Ñucata Mandac Dioslla, cambac shutita cuyashcamanta ñucata quishpichiyari. Canca allimi llaquingui. Chaimanta ñucata llaquiyari.

²² Ñucaca imatapish mana charic huacchami cani. Ñuca shungupish chugririshcami.

²³ Llandu chingaricuc shinami ñucaca tucuricuni. Langosta curu shinami caiman chaiman shitashca cani.

²⁴ Mana micushcamantami ñuca mucupish chucchucun. Ñuca cuerpopish huira illacpimi tucui chaquicun.

²⁵ Ñucaca paicunapac mana ricunayachishca rimashcallami carcani. Ñucata ricushpaca umata cuyuchishpami ricuc carcacuna.

²⁶ Ñucata Mandac Dioslla ayudaiyari. Can llaquic shinallatac quishpichiyari.

²⁷ Chashna ayudacpimi, cambac maquihuan ruhuashcata yachangacuna. Can Mandac Diosllatac chashna ruhuashcatami yachangacuna.

²⁸ Paicuna maldiciacpipish, canca bendiciaiyari. Paicuna ñucata llaquichingapac jataricpipish pingaichishca cachun. Shina cacpipish, canta servicca cushilla cachun.

²⁹ Ñucata yanga juchanchiccunaca churanata churaric shina pingaihuan cachun. Shinallatac jahuallata churarishca shina pandarishca cachun.

³⁰ Ñuca rimashcahuanmi Mandac Diostaca pagui nisha. Tauca gentecunapac chaupipimi canta alabasha.

³¹ Diosca almata juchanchiccunamanta quishpichingapacmi, imatapish mana charic runapac alli ladopi shayaringa.