SALMOS 108 - Dios Rimashcata Quillcashcami

Dios ayudachun mañashcamanta

Cantangapac David ruhuashca Salmomi.

¹ Dioslla, ñuca shunguca canta cantana yuyaillami. Ñuca almahuanmi salmocunata sumacta cantashpa cushicuni.

² ¡Arpapish, salteriopish riccharichicyari! Mushuc punzhatami ricchachisha.

³ Mandac Dioslla, tucui gentecunapac chaupipimi alabasha. Shuctac llactacunapac chaupipimi salmocunata cantasha.

⁴ Can llaquic cashcaca jahua pachacaman jatunmi. Can cashcata nic cashcaca puyucaman jatunmi.

⁵ ¡Dioslla, jahua pachapipish jatunyachishca cachun! ¡Can sumaimana cashcata tucui cai pachapi ricsishca cachun!

⁶ Can cuyashcacunataca cambac alli maquihuan llaquimanta quishpichiyari. Ñuca mañashcata uyashpa quishpichiyari.

⁷ Diosca paipaclla huasipi rimashpaca: «¡Ñucaca yallitami cushicusha! Siquem pueblotaca chaupishami. Sucot pueblo pambatami medishpa cusha.

⁸ Galaad llactapish, Manasés llactapish ñucapacmi. Efraín llactaca ñuca umapi churarina fierromi. Judá llactaca ñuca churashca mandacmi.

⁹ Moab llactaca ñuca jahuarina mangami. Ñuca churarina ushutataca Edom llactapimi shitasha. Filisteo llactata mishashpaca cushicushami» nircami.

¹⁰ ¿Pitac muyundi jatun pircashca pueblomanca pushangayari? ¿Pitac Edom llactamanca apangayari?

¹¹ ¡Dioslla, ñucanchicta shitashpa saquishcanguimi! ¡Mandac Dioslla, ñucanchic soldadocunahuanca mana llucshinguichu!

¹² Ñucanchicta piñaccunata mishangapac ayudaiyari. Gentecuna ayudashcaca yangallami.

¹³ Dios-huanca jatun mancharinacunatami ruhuashun. Paimi ñucanchicta piñaccunata sarunga.