SALMOS 106 - Dios Rimashcata Quillcashcami

Israelcuna Diosta mana cazushcamanta

¹ ¡Mandac Diosta alabaichicyari! ¡Mandac Diosca allimari, paita alabaichicyari! Paica huiñaitami llaquicun.

² ¿Pitac Mandac Dios sumaimanacunata ruhuashcataca huillai pudingayari? ¿Pitac paita tucui alabanacunataca uyachingayari?

³ Maijanpish cashcata ruhuashpa, allita ruhuashpa causacca yallita cushicuchun.

⁴ Mandac Dioslla, can acllashcacunaman allita ruhuashca shinallatac ñucatapish yuyariyari. Ñucata quishpichingapac shamuiyari.

⁵ Can acllashcacuna allita ruhuashcata ricungapac, cambac gentecuna cushicucpi cushicungapac, can cushcacunahuan cushicungapacmi chashnaca quishpichina cangui.

⁶ Ñucanchic ñaupa taitacuna shinallatacmi juchata ruhuashcanchic. Mana allita ruhuashpami juchallishcanchic.

⁷ Egiptopi Dios mancharinacunata ruhuashcataca ñucanchic ñaupa taitacunaca mana entendircachu. Dios yallita llaquic cashcataca mana yuyarircacunachu. Chaipac randica Puca Cucha patapica Diosta mana cazushpami cariyarcacuna.

⁸ Shina cacpipish, Diosca tucuita ruhuac cashcata ricuchingapacmi paipac shutita cuyashpa quishpichirca.

⁹ Puca Cuchataca rimashpallami chaquichirca. Chashnami shitashca pambata shina cucha chaupita pasachirca.

¹⁰ Paita piñaccunapac maquimantami quishpichirca. Huañuchiccunapac maquimantami quishpichirca.

¹¹ Yacu tapacpimi, paicunata piñaccunaca shucllapish mana saquirirca.

¹² Shina ruhuacpimi, pai rimashcacunata crishpa, alli nishpa cantarcacuna.

¹³ Ashtahuanpish Dios ruhuashcacunata utca cungarishpami can yuyaita cuchunca mana shuyarcacuna.

¹⁴ Paicunaca shitashca pambapimi, paicuna munashcata ruhuarcacuna. Dios imata ruhuacta ricungapacmi, caita chaita ruhuachun nircacuna.

¹⁵ Diosca paicuna mañashcatami cararca. Shina cashpapish huañuchic ungüihuanmi paicunata llaquichirca.

¹⁶ Carpacunapi cashpami Moisés shina casha nishpa piñarircacuna. Shinallatac Mandac Diospaclla chicanyachishca Aarontapish piñashpami rimarcacuna.

¹⁷ Chaimantami Datantaca allpa pascarishpa millpurca. Abiramhuan caccunatapish taparcami.

¹⁸ Paicuna tandanacushcapi nina japirishpami, Diosta mana manchaccunataca tucui rupachirca.

¹⁹ Horeb urcupica curita yacuyachishpa, ruhuashca becipac ñaupapimi cungurircacuna.

²⁰ Chashnami paicunapac sumac Diosta yuyarinapac randica, quihuata micuc huagraman ricchata yuyarircacuna.

²¹ Egiptopi mancharinacunata ruhuac, quishpichic Diostami cungarircacuna.

²² Paica Cam llactapipish mancharinacunata, Puca Cuchapipish pi mana ricushcatami ruhuarca.

²³ Chaimantami Diosca tucuchinata munarca. Pai acllashca Moisés paipac ñaupapi mañashpa mana jarcashca cacpica, tucuchinmanmi carca. Paimi ama tucuchichun paipac ñaupapi mañashpa jarcarca.

²⁴ Ashtahuanpish Dios cushami nishcata mana crishpami, sumac llactaman mana rishun nircacuna.

²⁵ Chaipac randica paicunapac carpa huasipimi huashalla rimashpa, Mandac Dios rimashcata mana uyarcacuna.

²⁶ Chaimantami Mandac Diosca shitashca pambapi llaquichingapac maquita alzarca.

²⁷ Shinallatac pai acllashcacunapac huahua huahuacunata caita chaita shuctac llactaman cachashpa pingaichingapacmi chashnaca ruhuarca.

²⁸ Paicunaca Baal-peor yanga diosta caticcunahuan tandanacushpami, huañushcacunaman rupachishpa cushca animal aichata micurcacuna.

²⁹ Chashna millaita ruhuashpami Diostaca llaquichircacuna. Chaimantami Diosca huañuchic ungüita cachashpa, tauca gentecunata huañuchirca.

³⁰ Chashna huañui caticpimi, Finees jatarishpa, millaita ruhuac runataca huañuchirca. Chaimantami mana ashtahuan huañurcacuna.

³¹ Pai chashna allita ruhuashcaca huahua huahuacuna yuyaringapacmi saquirirca.

³² Meriba yacu patapipish Diosta piñachircacunami. Paicunamantami Moisesca llaqui tucurca.

³³ Chaica yallita llaquichicpimi, Moisesca imatapish rimarircalla.

³⁴ Mandac Dios tucuchichun nishca gentecunatapish mana tucuchircacunachu.

³⁵ Chaipac randica chai gentecunahuan tandarishpami mana allita ruhuanata yachacurcacuna.

³⁶ Chai gentecunapac dioscunata servishcamantami llaqui tucurcacuna.

³⁷ Paicunapac churicunatapish, ushicunatapish supaicunaman cushpami huañuchirca.

³⁸ Mana faltayuc runapac, paicunapac churicunapac, ushicunapac yahuarta jichashpami Canaán llacta yanga dioscunaman huañuchishpa curca. Chai yahuarhuanmi llactaca mapayarca.

³⁹ Chashnami paicunaca mana allita ruhuashpa mapayarcacuna. Chai ruhuashcacunahuanmi huainayashca shina tucurcacuna.

⁴⁰ Chaimantami Mandac Diosca pai acllashcacunahuan yallita piñarirca. Paipacllatac charicushpapish millanayachircami.

⁴¹ Shuctac llactapi causac gentecunaman cucpimi chaipi causac gentecunaca paicunataca cumurichishpa causarcacuna.

⁴² Paicunata piñaccuna llaquichicpimi, paicunapac maquipi llaquichishca causarcacuna.

⁴³ Chai llaquicunamantaca tauca cutinmi Diosca quishpichirca. Shina cacpipish pai cunashcataca mana cazurcacunachu. Ashtahuanpish paicunallatac millaita ruhuashcamantami llaquinayaita causarcacuna.

⁴⁴ Shina cacpipish, Diosca paicuna yallita llaquipi causacushcata ricurcami. Paicuna caparishpa mañashcatapish uyarcami.

⁴⁵ Pai yallita llaquic cashpami paicunahuan ari nishcata yuyarishpa, paicunamanta mai llaquirca.

⁴⁶ Shinallatac paicunata prezushpa chariccunamanpish, llaquina yuyaitami curca.

⁴⁷ ¡Ñucanchicta Mandac Dioslla, ñucanchicta quishpichiyari! Can jucha illac Diosta jatunyachingapac tucui llactacunamanta tandachiyari. Cushicuihuanmi cantaca jatunyachishun ninchic.

⁴⁸ ¡Israelcunata Mandac Diosca ñaupamanta huiñaicaman alli nishca cachun! Shinallatac tucui gentecuna: «Chashna cachun» nichicyari. ¡Mandac Diosta alabaichicyari!