SALMOS 105 - Dios Rimashcata Quillcashcami

Dios israelcunaman allita ruhuashcamanta

¹ ¡Mandac Diosta pagui nichicyari! ¡Paipac shutipi mañaichicyari! Pai imata ruhuashcataca shuctac gentecunaman huillaichicyari.

² Paita cantaichicyari. Salmocunahuan paita cantaichicyari. Sumaimana pai ruhuashcacunata parlaichicyari.

³ Jucha illac paipac shutimanta cushicuichicyari. Mandac Diosta mashcaccunaca shungumanta cushicuichicyari.

⁴ Mandac Diostapish, paipac podertapish mashcaichicyari. Paipac ñahuitaca punzhanta mashcaichicyari.

⁵ Pai ruhuashca sumaimanacunatapish, jatun mancharinacunata ruhuashcatapish, paipac shimihuan rimashpa llaquichinatapish yuyarichicyari.

⁶ Diosta servic Abrahampac huahua huahuacuna. Pai acllashca Jacobopac huahua huahuacuna paita yuyarichicyari.

⁷ Paica ñucanchicta Mandac Diosmi. Paica tucui cai pachapimi mandacun.

⁸ Pai ari nishcataca huiñaitami yuyaricurca. Huaranga huaranga huahuacunahuanpish mana cungarishpa huiñaita pactachingallami.

⁹ Chaitaca Abrahamhuanpish, Isaac-huanpish ari nircami.

¹⁰ Chaitaca Jacobomanmi mandashpa curca. Israelcunahuanmi huiñaicaman ari nirca.

¹¹ Chashna ari nishpaca: «Canaán llactatami cancunapac cachun cusha» nirca.

¹² Paicuna ashalla tucushpa, shucpac llactapi causacucpi,

¹³ paicuna llacta llacta puricucpi, shuc llactamanta shuctac gentecunahuan tandarishpa causacucpica,

¹⁴ paicunata llaquichichunca mana saquircachu. Ashtahuanpish paicunamantami jatun mandaccunataca llaquichirca.

¹⁵ Paica: «¡Aceitehuan cahuishca ñuca mandaccunapica ama tuparinguichicchu! ¡Ñucamanta huillaccunataca, ama llaquichinguichicchu!» nirca.

¹⁶ Paicunapac llactamanca yalli yarcaitami cacharca. Tucui micuna granocunatami chingachirca.

¹⁷ Paicunapacmanca shuc runatami ñaupachishpa cacharca. Paica Josemi carca. Paitaca huatashca shina servichunmi catushca carca.

¹⁸ Paipac chaquipica grillocunata churashca, cutin cungapica cadenacunata churashcami.

¹⁹ Dios huillashca pactangacaman huichcashca carca. Mandac Dios rimashcami José ima shina cacta ricuchicurca.

²⁰ Jatun mandacmi cacharichun mandarca. Chashna mandacpimi, gentecunata mandacca cacharirca.

²¹ Chashna cacharishpami Josetaca chai mandacpac huasitapish, tucui pai charishcacunatapish mandachun churarca.

²² Shinallatac pai churashca mandaccunatapish, pai munashca shina cazuchichun, pushac yuyaccunatapish alli yachachichun churarca.

²³ Chai quipami israelcunaca Egiptoman yaicurca. Chashna yaicushpami Jacoboca Cam shuti allpapica shuctac llactamanta shamushca shina causarca.

²⁴ Chaipimi pai acllashcacunataca achcata mirachishpa, paicunata piñaccunata atishpa ashtahuan sinchi gentecunata ruhuarca.

²⁵ Shina cashpapish Diosca pai acllashcacunata piñachun, paita serviccunataca llullashpa llaquichichunmi chai gentecunapac shungupi piñana yuyaita churarca.

²⁶ Chai quipami pai acllashca paita servic Moisestapish, Aarontapish cacharca.

²⁷ Chaipimi Dios rimashca señalcunata ricuchirca. Cam llactapica jatun mancharinacunatami ruhuarca.

²⁸ Amsata cachashpa chai llactata tucui tutayachicpipish pai rimashca shimitaca mana cazurcacunachu.

²⁹ Chai yacucunata yahuarta ruhuashpami, tucui challuacunata huañuchirca.

³⁰ Chai llactapica sapocunatami yallita mirachirca. Jatun mandacpac huasi ucucaman sapocunaca yaicurca.

³¹ Dios mandacpimi chuspicunapish, usacunapish puyu shina tucui llactapi jundarca.

³² Paicunapac llactamanca tamaipac randica runduta, shinallatac rupacuc ninatami cacharca.

³³ Chashna ruhuashpami uvas chagratapish, higo yuracunatapish tucuchirca. Paicunapac tucui llactapimi yuracunatapish polvoshpa tucuchirca.

³⁴ Dios mandacpimi langostacunapish, saltashpa puric animalcunapish yallita mirashpa,

³⁵ tucui quihuatapish, chaipi tucui pucushcacunatapish tucuchirca.

³⁶ Chai llactapi tucui punta huacharishcacunatami huañuchirca. Chaica chai sinchirac cashpa charishca punta churicunatami huañuchirca.

³⁷ Pai acllashcacunataca cullquindi, curindimi llucchirca. Paicunapac aillupica ungushcaca shucllapish mana tiyarcachu.

³⁸ Egiptopi causaccunaca yalli manchaihuanmi causacurca. Chaimantami israelcuna llucshicpica, yallita cushicurcacuna.

³⁹ Paicunata llanduchunca puyuta, tutata achicyachichunca ninatami cacharca.

⁴⁰ Paicuna mañacpica codorniz animalcunatami cacharca. Shinallatac jahua pachata tandatami mana nicta cararca.

⁴¹ Rumi quingraita chaupishpami yacuta llucchirca. Chai yacuca chaquishca allpacunatami jatun yacu tucushpa callparca.

⁴² Chaica paita servic Abrahamman paipac jucha illac shimihuan ari nishcata yuyarishpami pactachirca.

⁴³ Chashnami paipac gentecunataca cushicuihuan llucchirca. Pai acllashcacunaca cushicuihuanmi cantashpa llucshirca.

⁴⁴ Shuc llactapi causaccunapac allpacunata cushpami, chai runacuna tarpushca chagracunata paicunaman curca.

⁴⁵ Chaica quillcashpa mandashcacunatapish, pai rimashcacunatapish pactachichunmi chashnaca curca. ¡Mandac Diosta alabaichicyari!