SALMOS 104 - Dios Rimashcata Quillcashcami

Mandac Diosta pagui nishpa cantanamanta

¹ ¡Ñuca almalla, Mandac Diosta alli niyari! ¡Ñucata Mandac Dioslla, canca yallita jatun Diosmi cangui! Canca achic nicuc-huan, sumaimanahuan churarishca shinami cangui.

² Canca churanata churarishca shinami luz-huan jahuata pillurishca cangui. Canmi jahua pachataca lienzota chutac shina tendishcangui.

³ Can causana huasitaca yacucuna jahuapimi churashcangui. Puyupimi carretapi shina puringui. Huaira jahuatami puringui.

⁴ Huairataca canmanta huillachun, culun nicuc ninataca canta servichunmi ruhuangui.

⁵ Allpataca callari rumicuna jahuapimi sinchita ruhuarcangui. Chaimantaca pipish mana cuyuchingachu.

⁶ Cai pachataca mama cucha yacuhuanmi churanahuan pilluc shina pillurcangui. Urcucunapish yacupimi taparirca.

⁷ Can rimacpica anchurircami. Can tulun nishpa uyaricpica, utcashpami anchurirca.

⁸ Lomacunata tapashpami pugru pambacunacaman urai rirca. Can churashca pushtullapitacmi tandarirca.

⁹ Maicaman can churashca pushtumantaca mana pasangachu. Allpatapish mana cutin tapangachu.

¹⁰ Canmi urcupi tucyac yacucunata ruhuashpa, jatun yacucuna tucuchun ruhuashcangui.

¹¹ Chai yacutami pambapi causac animalcunaca ubiancuna. Sacha burrocunapish chai yacuta ubiashpami yacunayaita pasachincuna.

¹² Volac animalcunapish chai yacu uricunapimi causan. Yura ramacunapi tiyarishpami cushilla silbancuna.

¹³ Jahua pachapi cac cambac huasipi tiyarishpami urcucunapi tamyachingui. Cambac tamyahuanmi allpaca sumacta pucushpa jundan.

¹⁴ Canmi animalcunamanca quihuata, gentecunamanca micunata pucuc chagracunata huiñachingui.

¹⁵ Gentecunata cushichic vinopish, ñahuita sumacyachic aceitepish, micuna granopish canmantami tiyan.

¹⁶ Can Mandac Dios churashca yuracunapish, Líbano urcupi can tarpushca cedro yuracunapish, yacusapa verdinlla yuracunami tucun.

¹⁷ Chai yuracunapimi zhutacunaca causan. Ciprés yuracunapimi cigüeñacunaca cuzhata ruhuashpa causan.

¹⁸ Jatun urcucunataca sacha chivocuna causanatami ruhuashcangui. Rumi quingraicunataca conejocuna huachanatami ruhuashcangui.

¹⁹ Quillataca ima quillacuna cashcata ricuchunmi churashcangui. Intitaca ima horas tigranata yachachunmi churashcangui.

²⁰ Can amsayachicpica tutayanmi. Tutayacpimi sacha animalcunaca callpancuna.

²¹ Leoncunaca micunata mana tarishpami huacancuna. Chashnami Diosta mañancuna.

²² Inti llucshicpica tandanacushpami, paicuna causana jutcuman yaicuncuna.

²³ Runacunaca imatapish ruhuangapac llucshishpaca, tutayangacamanmi trabajancuna.

²⁴ ¡Mandac Dioslla, can ruhuashcacunaca mana yupaipacmi! Tucui chaicunataca allita yachac cashcamantami ruhuarcangui. Cai pachapica can ruhuashcacunami jundan.

²⁵ Caica yallita ancho mama cuchami. Caipimi mana yupaipac jatun, uchilla challuacunaca tiyan.

²⁶ Chai yacutami jatun barcocunapish purin. Chaipimi pucllachun churashca Leviatán animalpish causan.

²⁷ Chai tucui animalcunami micuna horaspi, can carachun shuyacun.

²⁸ Can micunata cacharicpimi, paicunaca tandan. Cambac maquita pascacpica, sacsactami micuncuna.

²⁹ Can mana micunata caracpica imata mana micui pudincunachu. Can samaita quichucpica ña mana causancunachu. Chashnami allpaman cutincuna.

³⁰ Cambac Espirituta cachacpimi cutin miran. Shina ruhuashpami allpapi tiyactaca mushucyachingui.

³¹ ¡Mandac Diospac sumaimanaca huiñaita cachun! ¡Mandac Diosca pai ruhuashcacunahuan cushicuchun!

³² Pai allpata ricucpica chucchunmi. Urcucunapi tuparicpica cushninmi.

³³ Ñuca causaipica Mandac Diostami cantasha. Ñuca causacushcacamanca Diostami salmocunahuan cantasha.

³⁴ Mandac Diosta shungu ucupi yuyarishpaca cushicunimi. Ñucaca Mandac Dios-huanmi yallita cushicuni.

³⁵ Juchata ruhuaccunaca cai pachamanta chingachishca cachun. Diosta mana manchaccunaca tucuchishca cachun. ¡Ñuca almalla, Mandac Diosta alli niyari! ¡Mandac Diostaca alli alabaiyari!