SALMOS 103 - Dios Rimashcata Quillcashcami

Diosta alli ninamanta

David ruhuashca Salmomi.

¹ Ñuca almalla, Mandac Diostaca alli niyari. Paipac jucha illac shutitaca tucui shunguhuan alli niyari.

² Ñuca almalla, Mandac Diosta alli niyari. Tucui pai bendiciashcataca shucllatapish ama cungarichu.

³ Paimi tucui can mana allita ruhuashcacunataca perdonan. Tucui nanaicunatapish paimi jambin.

⁴ Paimi cambac causaitaca enterrana jutcumanta quishpichin. Paimi llaquinatapish, allicunatapish coronata churachic shina cun.

⁵ Paimi can munashca allicunataca mana nicta cun. Angata shinami sinchirac causachun mushucyachin.

⁶ Mandac Diosmi llaquihuan causaccunamanca cashcata ruhuashpa, japina cashcata cun.

⁷ Pai imata ruhuasha nishcataca Moisesmanmi huillarca. Cutin pai imata ruhuashcacunataca israelcunamanmi huillarca.

⁸ Mandac Diosca cuyac shungupish, yallita llaquicpish, shinallatac mana utca piñaricpish, yallita cuyacpish canmi.

⁹ Piñarishpapish mana unaicaman piñaringachu. Paica mana huiñaicaman piñashcalla cangachu.

¹⁰ Ñucanchictaca mana ñucanchic millaita ruhuashca shinallatac llaquichishcachu. Ñucanchic juchacunamanta cuna cashcatapish mana cushcachu.

¹¹ Cai pachamantaca jahua pachaca ashtahuanmi jahuaman. Chai shina jatun cuyaitami charin. Paita manchaccunataca yallitami cuyan.

¹² Inti llucshinamanta inti tigranaca carupimi. Juchacunata ñucanchicmanta anchuchishpaca chashnami caruyachirca.

¹³ Mandac Diosca shuc taita paipac huahuacunata llaquic shinami, paita manchaccunataca llaquin.

¹⁴ Paica ñucanchic imalaya cashcata ricsishpami, ñucanchicca allpamanta cashcata yachan.

¹⁵ Runapac causaica quihua shinami. Campopi huiñashca sisa shina cashpapish,

¹⁶ huaira huactacpica, chaquishpa huañunllami. Chai quipaca maipi cashcataca pi mana yachanchu.

¹⁷ Ashtahuanpish paita manchaccunataca ñaupamanta huiñaicamanmi cuyacunlla. Shinallatac huahua huahuacunacamanmi cashcata ruhuacungalla.

¹⁸ Chaica paihuan ari nishcata pactachiccunahuan, pai mandashcacunata pactachishpa causaccunahuanmi chashnaca ruhuanga.

¹⁹ Mandac Diosca pai mandashpa tiyanata jahua pachapi churashpami tucuita mandacun.

²⁰ ¡Imatapish ruhuac angelcuna Mandac Diosta alli nichicyari! Cancunaca pai imata nishcata cazuccunami canguichic.

²¹ ¡Mandac Diostaca jahua pachapi tucui causaccuna alli nichicyari! Cancunaca pai munashcata ruhuac mandaccunami canguichic.

²² ¡Mandac Diostaca tucui pai ruhuashcacuna alli nichicyari! Tucui ima tiyactaca paimi mandacun. ¡Ñuca almalla, Mandac Diosta alli niyari!