SALMOS 102 - Dios Rimashcata Quillcashcami

Llaquihuan cashpa Diosta mañashcamanta

Llaquihuan causac runa Mandac Diospac ñaupapi huacashpa, yuyaita chingachishpa mañashcami.

¹ Mandac Dioslla, ñuca mañashcata uyaiyari. Ñuca caparishpa mañashcaca canman uyarishca cachun.

² Ñuca llaqui punzhapi cacpica, cambac ñahuita ama pacanguichu. Cambac ringrihuan uyaiyari. Ñuca mañacuc punzhapica utcashpa cutichiyari.

³ Ñuca causaica cushni chingaric shinami tucuricun. Ñuca tullucunaca yanta ninapi rupacuc shinami rupacun.

⁴ Ñuca shunguca chugririshpa quihua shinami chaquishca. Chaimantami ñuca micunatapish cungarircani.

⁵ Huacacushpallami, tulluhuan, carallahuan tucushcani.

⁶ Shitashca pambapi causac pucu shinami cani. Chaquishcapi causac mashu shinami cani.

⁷ Huasi jahuapi pailla tiyacuc zhuta shinami mana sueñuni.

⁸ Ñucata piñaccunaca punzhantami rimashpa llaquichin. Ñucata yalli piñaccunaca llaquichingapacmi tandanacushpa yuyaricun.

⁹ Chaimantami tandata shina uchupata micurcani. Ñuca ubianataca huiquihuanmi chapuni.

¹⁰ Can yallita piñarishcamantami chashna tucuni. Ñucata jahuaman huichicuchishpami tangashpa shitarcangui.

¹¹ Ñuca causaica llandu shinami chingaricun. Quihua shinami chaquicuni.

¹² Mandac Dioslla, ashtahuanpish canca, huiñaitami mandashpa tiyacungui. Cantaca huahua huahuami yuyaricunlla.

¹³ Sión pueblota llaquina punzhacunaca chayamushcami, llaquingapac jatariyari. ¡Ayudana huatacunami ña chayamushca.

¹⁴ Canta serviccunaca pueblo urmashca rumicunatami cuyacun! Chai pueblo ñuto allpatami llaquincuna.

¹⁵ Mandac Diospac shutitaca tucui llactapi causaccunami manchanga. Can sumaimana cashcataca tucui cai pachapi causac jatun mandaccunami manchanga.

¹⁶ Mandac Diosmi Siontaca shayachinga. Paipac sumaimanami ricuringa.

¹⁷ Imatapish mana ruhuai pudic gentecuna mañashcataca uyangami. Paicuna yallita mañacushcataca mana yangapi saquishpa chasquingami.

¹⁸ Quipa huahuacunapish yachachunmi quillcashca canga. Quipa huahuacunapish chaita yachac chayashpaca, Mandac Diosta alabangacunami.

¹⁹ Mandac Diosca jahuapi cac paipac huasimantami ricurca. Jahua pachamantami cai pachataca ricurca.

²⁰ Chaica prezucuna huacashpa mañashcata uyangapac, huañuchingapac charicushcacunata cacharichingapac chashnaca ricurca.

²¹ Shinallatac Mandac Dios tucuita ruhuac cashcata Sión pueblopi huillachun, cutin Jerusalenpica paita jatunyachichunmi chashnaca ruhuarca.

²² Shuctac llactapi causaccuna paita servingapac shuc shinalla tandanacucpi, huillachunmi chashnaca tandachirca.

²³ Paimi chaupi ñanpi ñuca fuerzata quichushpa ñuca causana punzhacunatapish chaupirca.

²⁴ Chashna ruhuacpimi ñucaca: «Ñuca Dioslla, ama ñuca causana chaupi punzhacunata quichuichu. ¡Cambac huatacunaca huiñai huiñaitami can!»

²⁵ Imapish manarac tiyacpimi, cai pachataca ruhuarcangui. Jahua pachaca cambac maquihuan ruhuashcami can.

²⁶ Tucui chaicunaca tucuringami. Ashtahuanpish canca causacunguillami. Tucui chaicunaca churana shinami maucayanga. Mushuc churanata shinami cambiangui.

²⁷ Ashtahuanpish canca canllatacmi cangui. Cambac huatacunaca mana tucuringachu.

²⁸ Canta serviccunapac huahuacunaca cambac maquipimi mana manchashpa causanga. Paicunapac huahua huahuacunatapish cambac ñaupamantaca pi mana anchuchingachu.