SALMOS 101 - Dios Rimashcata Quillcashcami

Jatun mandac allita ruhuasha nishcamanta

David ruhuashca Salmomi.

¹ Mandac Dioslla, can llaquic cashcamanta, allita mandac cashcamantami cantasha.

² Allita causanatami yachacusha. ¿Ima horastac ñucapacmanca shamugringui? Ñuca mandana huasipica allita ruhuanata shungupi yuyarishpami purisha.

³ Mana alli ruhuanataca ricunallatapish mana ricushachu. Diosmanta anchurishpa millaita ruhuanataca manatac ricunayachishachu. Paicunapuramantaca pipish ñucapacmanca mana cuchuyangachu.

⁴ Mana alli shungu runaca ñucamanta anchuringami. Millaita ruhuac runataca ricsinatapish mana ricsishachu.

⁵ Maijanta mana alli nishpa huashalla rimactaca ñucami tucuchisha. Ñahuipipish, shungupipish jatun tucushcacunataca manatac ricushachu.

⁶ Ñuca ladopi causachunca cai pachapi alli causaccunatami ricusha. Ima millaita mana ruhuashpa causacmi ñucata servinga.

⁷ Ñuca mandana huasipica umac millai shungu runaca mana causangachu. Llullata rimac runaca ñuca ñaupapica mana causangachu.

⁸ Diosta mana manchac cai pachapi causaccunataca tutamantami tucuchisha. Mana allita ruhuaccunataca tucuitami Mandac Diospac pueblomantaca chingachisha.