SALMOS 10 - Dios Rimashcata Quillcashcami

Diosta ayudachun mañanamanta

¹ Mandac Dioslla, ¿ima nishpatac ñuca llaqui punzhapi cacpica, miticushpa carupi canguiyari?

² Millaita ruhuaccunaca jatun tucushpami huacchataca catinta llaquichin. ¡Shina cashpapish huacchacuna urmachun, paicuna churashcallapitacmi urmanga!

³ Millaita ruhuacca paipac shungu munashcata ruhuashpami cushicun. Charinallata munactaca alli ninmi, Mandac Diostaca mana ricunayachinchu.

⁴ Millaita ruhuacca ñahui shuctacyashpa jatun tucushpami Diostaca mana mashcan. Paica Dios mana tiyashcatami yuyan.

⁵ Paica tucui punzhacunami mana allita ruhuashpalla causan. Dios taripashca canatapish carupi cashcatami yuyan. Paita piñaccunataca burlashpami asin.

⁶ Paipac shungupica: «Ñucaca jaicapi mana urmashachu. Huiñaitami ima llaquipish mana japinga» nishpami yuyan.

⁷ Paipac shimica mana alli ninallata, llullanata, llaquichinallatacmi riman. Paipac shimipica millaillata rimashpa llaquichic shimicunami pacashca shina tiyacun.

⁸ Uchilla llactacunapimi pacalla chapacun. Pacallapimi mana faltayuc runataca japishpa huañuchin. Imatapish mana ruhuai pudic runataca llaquichingapacmi chaparacun.

⁹ León shinami pacallapi huacchacunata japingapac chapacun. Huaccha runataca paipac tucllapi urmachishpami, aisashpa rin.

¹⁰ Mana misaric pudiccunataca arcoyashpa, cumurishpa saltashpami, paipac maquicunahuan japin.

¹¹ Paipac shungupica: «Diosca cungarishcami. Paipac ñahuica tapashcami. Jaicapi manatac ricungachu» nishpami yuyan.

¹² ¡Mandac Dioslla shayariyari, cambac maquita alzaiyari! Huacchacunataca ama cungarichu.

¹³ ¿Ima nishpatac millaita ruhuac runaca Diostaca mana ricunayachin? Paipac shungupica: «Diosca imata mana ruhuangachu» nishpami yuyan.

¹⁴ Pai yallita llaquichicuctaca canllatacmi ricucungui. Paicuna imata ruhuashca shinallatacmi llaquichingui. Imata mana ruhuai pudiccunaca cambac maquimanmi cuchuyan. Canca taita mama illaccunata ayudacmi cangui.

¹⁵ Millaita ruhuaccunapac rigrata paquiyari. Paicuna ima millai ruhuashcamantaca tucui paicuna chingaringacaman llaquichiyari.

¹⁶ ¡Mandac Diosca huiñaita jatun mandacmi! Paipac allpamantaca mana cazuccunaca chingaringami.

¹⁷ Mandac Dioslla, yangalla runacuna mañashcataca uyashcanguimi. Paicuna mañashcata uyashpami, paicunapac shungutapish cushichingui.

¹⁸ Allpallamantac ruhuashca runa ama llaquichishpa catichunmi taita mama illac huahuacunatapish, llaquichishca causaccunatapish ayudashcangui.