RUT 4 - Dios Rimashcata Quillcashcami

Booz Ruthuan cazarashcamanta

¹ Boozca pueblo yaicuna punguman rishpami tiyarirca. Chaipimi Booz rimacushca paipac familia runaca chaita pasacurca carca. Paita ricushpami Boozca: —Uyai, caiman shamui, caipi tiyari— nirca. Shina nicpimi, chai runa rishpa chaipi tiyarirca.

² Shina tiyaricpica, pueblota pushaccunapuramanta chunga yuyaccunata cayashpami Boozca: —Caipi tiyarichic— nirca. Paicuna ña tiyaricpimi,

³ Boozca paipac familia runataca: —Noemimi Moab llactamanta cutimushca. Paica ñucanchic huauqui Elimelec charishca allpatami ashata catucun.

⁴ Caitami canman huillashpa, shinallatac caipi tiyaccunapac ñaupapi, ñuca pueblopi pushac yuyaccunapac ñaupapi can randichun nisha nicurcani. Can randisha nishpaca randi. Cutin mana randisha nishpaca ñucaman huillailla. Chaica, canmi randi pudingui, cutin can mana randisha nicpica, ñucallami randi pudini, ashtahuanpish pipish mana randingachu— nirca. Shina nicpimi, chai familia runaca: —Ñuca randisha— nirca.

⁵ Shina nicpimi Boozca: —Noemipac maquimanta allpata randicui punzhallatami, moabitapuramanta viuda Ruthuanpish cazarana cangui. Chai allpapish huañushca cusapac shutillapitac saquirichunmi chashnaca ruhuana cangui— nirca.

⁶ Shina nicpimi, chai runaca: —Shina cacpica, mana randinata pudinichu. Ñuca charishcataca mana yanga chingachisha ninichu. Ñucapac randi can randisha nishpaca randilla. Ñucaca mana chaita ruhuai pudinichu— nirca.

⁷ Israelcunaca punta huatacunamanta pachami ayudanamantapish, randinamantapish cashna ruhuaccuna carca: Familiacuna mana randinata pudishpaca caishuc familiaman cushcata ricuchingapacmi, paipac ushutata llucchishpa paipac ricsishcaman cuc carca. Israelcunapurapica cai shina ruhuashcaca shuc ricuchinami carca.

⁸ Chaimantami Boozpac familia runaca: —Can randilla— nishpa paipac ushutacunata llucchishpa curca.

⁹ Shina cucpimi, Boozca pushac yuyaccunatapish, chaipi tiyacuc tucui gentecunatapish: —Cunanca cancunallatacmi ricunguichic. Elimelecpac, Quelionpac, Mahlonpac tucui ima charishcacunatami Noemipac maquimanta japini.

¹⁰ Huañuc Mahlonpac huarmi moabitapura Ruttaca ñuca huarmi cachunmi japini. Shinallatac huañushca cusapac allpacunapish paipac shutillapitacmi saquiringa. Shina ruhuacpimi, caipi tandanacushcacunapish, paipac familiacunapish huañushcapac shutitaca mana cungaringa. Chaitaca cancunallatacmi ricucunguichic— nirca.

¹¹ Shina nicpimi, pushac yuyaccunahuan chai pungupi tiyacuc gentecunaca: —Ari, ricunchicmi. Cambac huasiman yaicuc huarmitaca Raquel, Leata ayudashca shinallatac Mandac Dios ayudachun. Paicunamantami ñucanchic israelcunaca mirai callarishcanchic. ¡Canpish Efrata nishca Belén pueblopica alli nishca, tucuipac ricsishca causachunmi munanchic!

¹² Cambac huasipi cai huarmi charishca huahuacunataca Mandac Dios Fares runapac huasi familiapi shina achcata mirachichun. Faresca Tamar huarmipi charishca Judapac huahuami can— nirca.

¹³ Chashnami Boozca Ruthuan cazararca. Pai chai huarmipi chayaricpica, Mandac Dios cucpimi huicsayuc tucushpa, shuc cari huahuata charirca.

¹⁴ Chaimantami huarmicunaca Noemitaca: «¡Mandac Diosmi cambac familia tiyachun cai huahuataca cushca! ¡Cai huahua huiñashpaca tucui Israel llactapi alli nishca cachun!

¹⁵ Paica cambac nuerapac huahua cashcamantami cantaca cushichinga shinallatac cuidanga. Canta cuyac nueraca achca sumacmi. Canchis cari huahuacunata atishpami ashtahuan alli» nircacuna.

¹⁶ Noemí chai huahuata japishpaca, marcarcami shinallatac huiñachic mamami tucurca.

¹⁷ Chaita ricushpami chai vecina huarmicunaca: «¡Noemimanmi shuc huahua huacharishca!» nircacuna. Chashna nishpami Obed shutita shutichirca. Paimi Isaipac taita carca. Cutin Isaica Davidpac taitami carca.

¹⁸ Fares runapac huahua huahuacunaca caicunami: Farespac churica Hezronmi carca.

¹⁹ Hezronpac churica Rammi carca. Rampac churica Aminadabmi carca.

²⁰ Aminadabpac churica Naasonmi carca. Naasonpac churica Salmonmi carca.

²¹ Salmonpac churica Boozmi carca. Boozpac churica Obedmi carca.

²² Obedpac churica Isaimi carca. Isaipac churica Davidmi carca.