RUT 3 - Dios Rimashcata Quillcashcami

Booz shinallatac Rut trillana pambapi cashcamanta

¹ Shuc punzhami Rutpac suegra Noemica: —Ñuca huahualla, can alli causachunca, ¿manachu canman cusata mashcana cani?

² Canca Boozpac servic huarmicunahuanmi carcangui. ¿Boozca manachu ñucanchic familia? Riqui, paica cunan tutami cebadata huairachingapac ringa.

³ Armarishpa mishquilla ashnacuc-huan cahuirishpa alli churanacunata churarishpa trillana pambaman ringui. Ashtahuanpish pai micungacaman, tucui ubiangacaman paipac ñaupapica ama ricuringuichu.

⁴ Pai sueñungapac siriricpica, pai maipi siririctapish alli ricushpa, chaiman rishpa chaquinic pulluta alzachishpa siriringui. Can imata ruhuanataca paillatac ningallami— nirca.

⁵ Shina nicpimi Rutca: —Can nishca shina tucuita ruhuashallami— nirca.

⁶ Rut trillana pambaman rishpaca paipac suegra nishca shinami tucuita ruhuarca.

⁷ Micushpa, ubiashpaca cushillami Boozca grano montón ladoman sueñungapac rirca. Chaipi sueñucucpimi, Rutca allilla chayashpa chaquinic pulluta alzachishpa siririrca.

⁸ Chaupi tutata Booz shuc ladoman muyurishpaca chaquipi shuc huarmi siricucta sintishpami mancharirca.

⁹ Chaipimi Boozca: —¿Pitac cangui?— nirca. Shina tapucpimi Rutca: —Canta servic Rutmi cani. Can cuchulla familiapura cashcamantaca canta servic ñucataca jahualla cambac churanahuanpish catachiyari— nirca.

¹⁰ Shina nicpimi Boozca: —Ñuca huahualla, cantaca Mandac Dios bendiciachun. Cunan can ruhuashpaca puntapi ruhuashcata yallimi allita ruhuashcangui. Mosocunataca charictapish, mana charictapish mana mashcangapac rishcanguichu.

¹¹ Cunanca ñuca huahualla, ama manchaichu. Imata can mañacpipish ñucaca ruhuashallami. Ñuca llactapi causaccunapish, cantaca alli huarmi cashcatami yachancuna.

¹² Ari, cambac familiami cani. Shina cacpipish, ñucatapish yalli ashtahuan cuchulla familiami tiyan.

¹³ Cunan tutaca caipi pacarilla. Caya punzha pai ayudasha nishpaca ayudangami. Pai mana nicpica, Mandac Diospish ricucunmi. Canta ayudangapac ari nishami. Cunanca pacaringacaman samarilla— nirca.

¹⁴ Shina nicpimi, Rutca pacaringacaman paipac chaquinicllapi sueñurca. Boozca: «Trillana pambaman shuc huarmi shamushcata pipish ama yachachun» nishcami carca. Chaimantami cayandi tutamantaca pipish ama ricsichun manarac alli achicyacpi rirca.

¹⁵ Shinallatac Boozca: —Jahualla can churana pañota ricuchishpa alli charingui— nirca. Chai pañota Rut ricuchicpica, sucta taza cebadatami churarca. Chaita apashpami pai causana puebloman cutirca.

¹⁶ Ña paipac suegrapacman chayacpica: —¿Ñuca huahualla, imatatac nirca?— nishpami tapurca. Rutca chai runaca imata paimanta ruhuashcatapish, tucuimi huillarca.

¹⁷ Shina huillashpaca: —Shinallatac: “Cambac suegrapacmanca ama chushac maquilla cutichu” nishpami cai sucta taza cebadata curca— nirca.

¹⁸ Shina nicpimi Noemica: —Ñuca huahualla, cunanca ima tucungacaman shuyailla. Chai runaca, pai nishcata cunanllatac allichingapac mana samaringachu— nirca.