RUT 2 - Dios Rimashcata Quillcashcami

Rut Booz-huan tupashcamanta

¹ Noemica paipac cusa Elimelecmantami, shuc familiata charirca. Chai runaca achca charic, Booz shutimi carca.

² Shuc punzhami Rutca Noemitaca: —Cosechana pambaman rishpa chalagringapac ñucata saqui. Maijanpac ñahuipi alli ricurishpaca paipac huashata catishpa pallacushallami— nirca. Shina nicpimi Noemica: —Ñuca huahualla rilla— nirca.

³ Shina nicpi, chai pambaman chayashpami, cebadata piticuc huashata catishpa chalarca. Ashtahuanpish chai allpaca Elimelecpac familia Booz runapacmi carca.

⁴ Booz Belenmanta chayamushpami cebadata piticcunataca: —¡Mandac Dios cancunahuan cachun!— nirca. Shina nicpimi paicunaca: —¡Mandac Diosca cantapish bendiciachun!— nircacuna.

⁵ Booz cebadata piticcunata pushactaca: —¿Pipactac cai solteraca?— nishpa tapurca.

⁶ Shina tapucpi, piticcunata pushacca: —Paica Moab llactamanta Noemihuan shamushca moabita solterami.

⁷ Paica ñucatami: “Cebadata piticcunapac huashata, gavilla ladocunapi chalachun saqui” nirca. Paica tutamanta utca shamushpami cunancaman shuc ratollatapish mana samarishpa caipi cainacun— nirca.

⁸ Shina nicpimi, Boozca Ruttaca: —Uyai ñuca huahualla, shucpac allpacunapi ama chalangapac ringuichu. Caimantapish ama anchuringuichu. Ñucata servic huarmicunahuan caipi canguilla.

⁹ Ñucata serviccunataca cantaca ama imata nichunmi mandarcani Chaimanta maipi ñuca serviccuna cosechangapac ricpica, catishpa ringuilla. Can yacunayachishpaca, ñuca serviccuna llucchishca yacu puñucunamanta ubianguilla— nirca.

¹⁰ Shina nicpi, Rut pambacaman cumurishpaca: —Can ñucata alli chasquichunca, ¿imamantatac cambac ñahuipi alli ricurircaniyari? Ñucaca shuctac llactamanta shamushcallami cani— nirca.

¹¹ Shina nicpimi Boozca: —Cambac cusa huañushca quipa cambac suegramanta tucui imata ruhuashcatapish yachanimi. Cambac taita mamatapish, cambac huacharishca llactatapish saquishpami, mana ricsishca llactaman causangapac shamushcangui.

¹² ¡Can chashna ruhuashcamantaca Mandac Dios imata japina cashcata cuchun! Can japina cashcataca israelcunata Mandac Dios tucuita cuchun. Canca paipac rigra ucupi miticungapacmi shamushcangui— nirca.

¹³ Shina nicpimi Rutca: —Ñucata mandaclla, ñucaca, canta servic huarmicunapuramanta maijan huarmi shinapish mana canichu. Chashna cacpipish, sumacta rimashpami ñuca shungupi cushichishcangui. Chashnami ñucaca cambac ñahuipi alli ricurishcani— nirca.

¹⁴ Micuna horas chayacpica Boozca: «Caiman cuchuyai, tandata japishpa vinagrepi jucuchishpa micui» nirca. Rutmi cebadata piticcunahuan tandanacushpa tiyacucpimi, Boozca camchashca granota cararca. Shina caracpica mana nicta micushpami puchuchirca.

¹⁵ Rut jatarishpa cutin chalangapac ricpimi, Booz paipac serviccunataca: «Gavillamanta japicpipish misashpa ama pingaichinguichicchu.

¹⁶ Ashtahuanpish pai chalachun gavillamantapish ashata urmachishpa saquinguichic. Ama llaquichinguichicchu» nirca.

¹⁷ Tutayangacamanmi chai pambapica chalacurca. Pai chalashca cebadata cacucpica, ishcai chunga ishcai kilo cebadami llucshirca.

¹⁸ Chai cebadata apashpami paicuna causana puebloman cutirca. Chaiman chayacpimi, paipac suegra Noemica pai chalashcata ricurca. Chai quipaca pai mana micui pudishpa puchuchishca micunatapish curca.

¹⁹ Chaita ricushpami paipac suegraca: —¿Cunanca maipitac chalarcangui? ¿Maipitac trabajarcangui? ¡Can chalachun alli chasquic runamanca allicunata cushca cachun!— nirca. Shina nicpi, Rut pihuan trabajashcata paipac suegraman parlashpaca: —Ñucaca Booz shuti runapac cosechapimi chalamuni— nirca.

²⁰ Shina nicpimi, Noemica paipac nuerataca: —¡Paitaca, Mandac Dios bendiciachun! Paica huañushcacunatapish, ñucanchic causaccunatapish llaquishcami— nirca. Chai quipaca: —Chai runaca ñucanchicpac familiamari. Paimi ñucanchicta ayudai pudinga— nirca.

²¹ Shina nicpimi, moabitapuramanta Rutca: —Ashtahuan cashnapish nircami: “Tucui cosecha tucuringacaman ñucata serviccunahuan puricuilla” nircami— nirca.

²² Shina nicpimi, Noemica paipac nuera Ruttaca: —Ñuca huahualla, shucpac allpacunapi ama piñachichunca allimi paita servic huarmicunahuan saquirishpa purinaca— nirca.

²³ Shina nicpimi, Rutca cebadata, trigota cosechana tucuringacaman chalashpa Boozta servic huarmicunahuan tandanacushpa purirca. Chashna cashpapish paica paipac suegrahuanmi causarca.