RUT 1 - Dios Rimashcata Quillcashcami

Rutmantapish Noemimantapish

¹ Juezcuna mandacuc punzhacunapimi, Israel llactapica yallita yarcai tiyarca. Chaimantami Judá llactapi cac Belén pueblomanta shuc runaca paipac huarmindi, ishcai churicunandi Moab llactapi causangapac rirca.

² Chai runaca Elimelecmi carca. Paipac huarmica Noemimi carca. Churicunaca Mahlón, Quelionmi carca. Paicunaca Judá llacta Belén pueblomanta efrateopurami carca. Moab llactaman chayashpaca chaipi causangapacmi saquirircacuna.

³ Ashtahuanpish Noemipac cusa Elimelecca huañurcami. Noemica paipac ishcai cari huahuacunallahuanmi saquirirca.

⁴ Chai huahuacunaca moabita huarmicunahuanmi cazararca. Chai huarmicunaca shucca Orfa, caishucca Rutmi carca. Paicunaca chunga huata shinatami causarcacuna.

⁵ Chai quipaca Mahlonpish, Quelionpish huañurcami. Chaimantami Noemica ishcai huahuacunapish, cusapish huañucpi, pailla saquirirca.

⁶ Noemica Moab llactapi cashpami: “Mandac Diosca pai acllashcacunata llaquishpami cutinllatac granota pucuchi callarishca” nicta uyarca. Shina uyashpami paipac ishcai nueracunandi Moab llactamanta cutirca.

⁷ Noemica pai causacushca pushtumantami ishcai nueracunandi Judá llactaman cuti callarirca.

⁸ Chashna cuticushpami Noemica paipac ishcai nueracunataca: —Cancunaca, quiquin taitacunapac huasiman cutichiclla. Cancunapac huañushca cusacunahuanpish, ñucahuanpish allimi causarcanguichic. Chashnallatac Mandac Diospish cancunata llaquichun.

⁹ Cancuna cazarashpa cancunapac cusacunapac huasipi causacucpi, Mandac Dios sumac cushi causaita cuchun— nirca. Shina nishpami Noemica muchashpa caya minchacaman nirca. Ashtahuanpish paicunaca sinchita huacashpami:

¹⁰ —Ñucanchicca canllahuantacmi cambac llactaman cutishun ninchic— nircacuna.

¹¹ Shina nicpimi Noemica: —Ñuca huahuacunalla, cutichiclla. ¿Imapactac ñucahuanca ringuichicyari? Cancunahuan cazarachunca mana cutin huahuacunata huicsapi charinichu.

¹² Ñuca huahuacunalla, cutichiclla. Ñucaca cutin cazarangapacpish ñami paya cani. Cunan tuta cusahuan sueñushpa huahuacunata charigrinimi nicpipish,

¹³ ¿Cancunaca paicuna huiñangacaman shuyanguichicmanchu? ¿Paicuna huiñangacaman mana cazarashpa shuyanguichicmanchu? Ñuca huahuacunalla, ama chashna ruhuaichicchu. Mandac Diospac poder ñucata llaquichicpimi, cancunata yalli llaquita apacuni— nirca.

¹⁴ Cutinllatacmi paicunaca sinchita huacarcacuna. Shina cashpapish Orfaca paipac suegrata muchashpami paipac huasiman cutirca. Ashtahuanpish Rutca paihuanmi saquirirca.

¹⁵ Chaimantami Noemica: —Riqui, cambac cuñadaca ñami paipac puebloman paipac dioscunapacman cutin. Canpish paita catishpa cutilla— nirca.

¹⁶ Ashtahuanpish Rutca: —Canta saquishpa, canmanta caruyachun ama mañaichuyari. Can maiman ricpipish, ñucapish chaimanmi risha. Can maipi causacpipish chaipimi causasha. Cambac llactapish ñuca llactami canga. Cambac Diospish ñuca Diosmi canga.

¹⁷ Maipimi can huañungui, chaipimi ñucapish huañusha, chaillapitacmi enterrashca casha. Ñuca nishcata mana pactachishpa canta saquishpa ricpica, Mandac Diosllatac yallita llaquichichun. Ñucanchic ishcaimantaca huañushpami raquirishun— nirca.

¹⁸ Paihuan ringapactac yuyarishcata yachashpami Noemica imatapish mana ashtahuan nirca.

¹⁹ Paicunaca Belén puebloman chayangacamanmi ishcaita rircacuna. Chai llactapi causaccunaca tucuimi paicuna chayacta ricushpaca mancharirca. Shina mancharishpami: —¿Manachu caica Noemí?— nishpa tapunacurca.

²⁰ Shina cacpimi Noemica: —Ama Noemí nishpa cayaichicchu, ashtahuanpish Mara nishpa cayaichic. Imatapish ruhuac Diosca yalli llaquitami ñucaman cushca.

²¹ Caimantaca achca charishcahuanmi rircani. Ashtahuanpish Mandac Diosca chushacllatami cutichimushca. ¿Ima nishpatac Noemí ninguichic? Mandac Diosca ñucataca llaquichishcami. Imatapish ruhuac Diosmi ñucataca llaquishca— nirca.

²² Chashnami Noemica Moab llactamantaca moabitapuramanta paipac nuera Ruthuan Belenman cutirca. Paicunaca cebadata cosechana callari punzhacunapimi chayamurcacuna.