ROMANOS 9 - Dios Rimashcata Quillcashcami

Israelcunata Dios acllashcamanta

¹ Apunchic Jesusta cric cashcamantami, mana llullashpa cashcatatac nicuni. Ñuca yuyaitaca Diospac Espiritumi pushacun. Paimi ñuca mana llullacushcataca ricuchin.

² Ñuca shungupica yallita llaquirishpami punzhanta nanaihuan cani.

³ Ñuca quiquin aillucunapac randi, ñucallatac Cristomanta anchurishpa, llaquichishca canatami munaiman.

⁴ Paicunaca Diospac huahuacunami. Taita Israelpac huahua huahuacunami. Chaimantami Diosca paipac huahuacuna cachun acllarca. Diosca paipac sumaimana cashcatapish paicunaman ricuchircami. Moisés mandashcacunatapish, Dios cuyashpa ari nishcacunatapish, Dios cusha nishcacunatapish charinmi. Diosta mañanatapish yachancunami.

⁵ Paicunaca ñucanchic ñaupa taitacunapac huahua huahuacunami. Paicunapuramantami Cristoca runa tucurca. Paitaca tucuita Mandac Dios cashcamantami huiñai huiñaita alli nina canchic.

⁶ Chaita nishpaca mana: Israelcunaman Dios cushami nishcaca mana pactachishcachu nisha ninichu. Ashtahuanpish taita Israelpac huahua huahuacuna mana tucui mashna israelcunatac cashcamanta,

⁷ Abrahampac huahua huahuacunapish mana tucui paipac huahuacunatac cashcamantami chashna nini. Ashtahuanpish Diosca Abrahamtaca: «Cambac churi Isaacpac huahua huahuacunallami cambac huahuacuna canga» nishcami.

⁸ Shina cacpica, mana tucui Abrahampac huahua huahuacuna cashcamantachu Dios acllashca cancuna, ashtahuanpish Dios cusha nishcamanta tiyashca huahuacunami Dios acllashca cancuna.

⁹ Dios Abrahamman cusha nishpaca: «Cunan shina punzha ñuca cuticpica, cambac huarmi Saraca shuc cari huahuatami charinga» nishcami.

¹⁰ Mana chaillachu, ashtahuanpish ñucanchic ñaupa taita Isaacpac huarmi Rebecapish ishcai huahuatami charirca.

¹¹ Chai huahuacuna manarac huacharicpi allitapish, mana allitapish manarac ruhuacpimi, (Diosca mana imata ruhuashcamanta, ashtahuanpish pai munashcamanta acllarca).

¹² Diosca Rebecataca: «Punta churimi quipa churita servic canga» nishcami.

¹³ Dios quillcachishcapipish: «Jacobotami cuyarcani, Esautaca mana cuyarcanichu» ninmi.

¹⁴ Chashna cacpica, ¿imatatac nishun? ¿Diosca mana cashcata ruhuacchu nishunchu? ¡Mana chashnachu!

¹⁵ Diosca Moisestaca: «Maijanta ñuca llaquisha nishcatami llaquisha, maijanta ñuca cuyasha nishcatami cuyasha» nishcami.

¹⁶ Shina cacpica, mana gentecuna munashcamanta, mana imata ruhuashcamantachu Diosca llaquin, ashtahuanpish pai cuyashcallamantami llaquin.

¹⁷ Dios quillcachishcapica Egipto llactata jatun mandactaca: «Canpi ñuca poderta ricuchingapac, tucui llactacunapi ñuca shutita ricsichingapacmi, jatun mandac cachun churarcani» nishcami.

¹⁸ Shina cacpica, Diosca maijanta llaquisha nishpaca llaquinllami, maijanta shunguta sinchiyachisha nishpaca sinchiyachinllami.

¹⁹ Shina cacpica cancunaca: «¿Imamantatac Diosca juchanchinga? Diospac munaitaca pipish mana jarcai pudinchu» ninguichari.

²⁰ Canca Diosta taripangapacca, ¿imatac cangui? ¿Allpamanta mangata ruhuactaca mangaca: «¿Ima nishpatac chashna ruhuarcangui?» ningachu?

²¹ Mangata ruhuacca allpamanta pai munashcatami ruhuai pudin. Chai allpallamantatacmi yanga mangatapish, alli mangatapish ruhuan.

²² Chai shinallatacmi Diosca piñashpa tucuchina cacpipish, mana llaquichishpa, pai llaquichic cashcatapish, poderyuc cashcatapish ricuchin.

²³ Diosca sumaimana cashcata ricuchingapacmi, ñaupamanta pacha cuyac cashcata ñucanchicman ricuchirca. Chaitaca ñaupamanta pachami, allichishca carca.

²⁴ Diosca ñucanchictaca israelcunapuramantapish, mana israelcunapuramantapishmi acllarca.

²⁵ Dios ima nishcata huillac Oseas quillcashpaca: «Mana ñuca cuyashca gentecunatami “ñucapacmi” nisha. Mana ñuca cuyashcacuna cacpipish, “ñuca cuyashcacunami” nishami.

²⁶ Shinallatac maipimi “cancunaca mana ñuca huahuacunachu canguichic” nircani, chaillapitacmi “cancunaca causac Diospac huahuacunami canguichic” nisha» nishcami.

²⁷ Isaías israelcunamanta huillashpaca: «Israelpac huahua huahuacuna tiyu shina achca cashpapish, ashallami quishpiringa.

²⁸ Chaica, Diosca utcami cai pachapi causaccunataca cashcata ruhuashpa taripashpa llaquichinga» nircami.

²⁹ Utcapi Isaías huillashpaca: «Tucuita Mandac Dios shucllatapish mana saquishpa, tucui huahua huahuacunata mana saquishca cacpica, cunanllatacmi Sodoma shina, Gomorra shina tucunchicman carca» nishcami.

Alli huillaica israelcunamanpish cashcamanta

³⁰ Shina cacpica, ¿imatatac nishun? Diosca mana israelcunataca paita crishcamantami chasquirca. Mana paicuna cashcata ruhuac cashcamantachu chasquirca.

³¹ Ashtahuanpish israelcunaca Moisés mandashcacunata pactachishpa, Dios chasquishca canata munashpapish mana pudircachu.

³² ¿Imamantatac chashnaca carca? Paicunaca crishcallamanta Dios chasquishca canataca mana munarcacunachu, ashtahuanpish mandashcacunata pactachishpami, chasquishca canata munarcacuna. Chaimantami mitcarina rumipi mitcarircacuna.

³³ Chaitaca, Dios quillcachishcapica: «Sión pueblopimi shuc rumita churani. Chai rumipi mitcarishpami urmangacuna. Pipish chai rumipi shunguta churacca mana pingaichishcachu canga» ninmi.