ROMANOS 8 - Dios Rimashcata Quillcashcami

Diospac Espíritu ayudanamanta

¹ Cunanca Jesucristohuan shuc shinalla caccunamanca, ña mana jatun llaquica tiyangachu.

² Chaica, Jesucristohuan shuc shinalla tucucpimi, Diospac Espirituca jucha mandashpa charinamantapish, huañuimantapish cacharichirca.

³ Runaca aichayuc cashcamantami Moisés mandashcacunataca maita mana pactachi pudirca. Chaimantami Diosca paipac shuclla Churita, runa shina aichayuc tucushpa, runacunapac juchacunamanta llaquita huañuchun cacharca. Chai shina ruhuashpami, gentecunapi tiyac juchataca tucui chingachirca.

⁴ Chaica, cashcata nic mandashcacunata pactachichunmi, chashnaca ruhuarca. Ñucanchicca mana jucha munashca shinachu causacunchic, ashtahuanpish Diospac Espíritu yuyaita cushca shinami causacunchic.

⁵ Jucha munashcata ruhuaccunaca, jucha munashca shina causanatami munancuna. Ashtahuanpish Diospac Espíritu yuyaita cushca causaccunaca, Diospac Espíritu munashca shina causanatami munancuna.

⁶ Jucha munashcata ruhuashpa causaccunaca huañuitami japinga. Ashtahuanpish Diospac Espíritu yuyaita cushca causaccunaca, cushi causaitami charinga.

⁷ Juchata ruhuana yuyailla caccunaca Diostaca piñanmi. Paicunaca Dios mandashcacunata mana cazuncunachu, mana cazui pudincunachu.

⁸ Jucha munashcata ruhuashpa causaccunaca, Diosta mana cushichi pudincunachu.

⁹ Cancunapica Diospac Espiritumi causacun. Chaimantami jucha munashca shina, mana causacunguichic, ashtahuanpish Diospac Espíritu yuyaita cushca shina causacunguichic. Cristopac Espirituta mana charicca, mana Cristopacchu.

¹⁰ Cristo cancunapi causacucpica, cuerpoca juchamanta huañushcami can. Shina cacpipish, Dios cashcata ruhuac cashcamantami, paipac Espíritu causaita cun.

¹¹ Jesusta causachic Diospac Espíritu cancunapi causacucpica, Diosllatacmi cancunapi cac Espirituhuan cancunapac cuerpota causachinga.

¹² Shinaca cuyashca criccuna, mana jucha munashca shina causanachu canchic.

¹³ Chashna causacushpaca huañunguichicmi. Ashtahuanpish Diospac Espíritu munashca shina causashpaca, jucha munaita chingachishpa causanguichicmi.

¹⁴ Tucui Diospac Espíritu munashca shina causaccunami Diospac huahuacuna can.

¹⁵ Cancunaca mana cutinllatac manchaita cuc, huatashca shinata charic espiritutachu chasquircanguichic, ashtahuanpish Diospac huahuata ruhuac Espiritutami chasquircanguichic. Chai Espiritumantami: «Ñuca Taitalla» nishpa mañanchic.

¹⁶ Diospac Espiritullatacmi ñucanchic espirituman Diospac huahua cashcata huillan.

¹⁷ Paipac huahuacuna cashpaca, pai cusha nishcatapish Cristohuan pacta japishunmi. Apunchic Jesucristo llaquita apashca shina llaquita apashpami, alli nishca cashun.

¹⁸ Cunan punzha llaquita apacushcaca, quipa punzhapi alli nishca canahuan chimbapuracpica, ima mana canchu. Chaitaca yachanimi.

¹⁹ Tucui Dios ruhuashcacunami, maijancunalla Diospac huahuacuna cashcata ricuna yuyailla shuyacun.

²⁰ Tucui Dios ruhuashcacunaca, mana paicuna munaimantachu yangalla tucurca, ashtahuanpish Diosmi punzhanta shuyachun chashnaca ruhuarca.

²¹ Chaimantami Diosca tucui pai ruhuashcacunata huatashca shinamanta cacharichinga. Chashnami paipac huahuacunata ruhuashpa, alli ninga.

²² Tucui Dios ruhuashcacuna, shuc huarmi sajuarina nanaihuan, llaquihuan cunancaman caparicushcatami yachanchic.

²³ Mana paicunallachu llaquita apacun, ashtahuanpish Dios cusha nishcata japingapac ña paipac Espirituta chariccunapish llaquita apacunchicmi. Chaica, Dios paipac huahuacunata ruhuangacaman, ñucanchic cuerpota huatashca shinamanta llucchingacamanmi shungupi llaquita apacunchic.

²⁴ Chaita shuyacushpami quishpirishca canchic. Shina cacpipish, chai shuyacushcata ricushpaca, mana shuyanachu can. Ña ricushcataca, ¿pitac shuyangayari?

²⁵ Ashtahuanpish manarac ricushcata shuyacushpaca, llaquita apashpapish ricuna yuyaillami shuyacunchic.

²⁶ Ñucanchic irquiyashca cacpipish, Diospac Espiritumi ayudan. Ima shina Diosta mañanatapish mana yachanchicchu. Shina cacpipish, Diospac Espiritullatacmi llaquirishpa, ñucanchic mana rimaipac rimaicunahuan ñucanchicmanta mañacun.

²⁷ Shungupi imata yuyacushcata yachac Diosca, paipac Espíritu imata mañacushcataca yachanmi. Chai Espirituca Dios munashca shinami, Diospaclla caccunamanta mañacun.

Crishpa mishana cashcamanta

²⁸ Diosca, paita cuyaccunataca tucui ima ruhuanapipish allitami pushan. Paicunaca Dios munashcata ruhuangapac acllashcacunami.

²⁹ Diosca, ñaupaman ricsishcacunataca paipac Churi shina cachunmi acllarca. Chashnami achca criccunamanta punta cachun chicanyachirca.

³⁰ Callarimanta chicanyachishcacunataca Diosca cayarcami. Chai cayashcacunataca chasquircami. Chasquishcacunataca alli nircami.

³¹ Shina cacpica, ¿imatatac nishun? Dios ñucanchic-huan cacpica, ¿pitac ñucanchictaca llaquichi pudinga?

³² Diosca, paipac quiquin Churitapish tucui ñucanchicmanta llaquita apachun, mana jarcarishpa, cushpaca, ¿manachu paipac Churita cushca shina imatapish cunga?

³³ ¿Pitac Dios acllashcacunataca juchanchinga? Diosmi paicunataca chasquin.

³⁴ ¿Pitac paicunataca juchanchinga? Jesucristomi ña huañurca. Paimi huañushcacunapuramanta causarishpa, Diospac alli maquiman rishpa ñucanchicmanta mañacun.

³⁵ ¿Pitac ñucanchictaca Cristopac cuyaimantaca anchuchinga? ¿Llaquicuna? ¿Yarcai? ¿Llaquichishpa caticcuna? ¿Churana illai? ¿Huañui, mana cashpaca espada?

³⁶ Dios quillcachishcapica: «Canmantami ima punzhapish huañunalla canchic. Ovejata huañuchingapac apashca shinami charincuna» ninmi.

³⁷ Tucui chai llaquicunapica Cristo cuyacpimi, imatapish mishaccunalla canchic.

³⁸ Diospac cuyaimantaca huañuipish, causaipish, angelcunapish, poderyuc espiritucunapish, cunan ima tucushcapish, quipa ima tucunapish mana anchuchinchu.

³⁹ Shinallatac jahua pachapish, ucu pachapish, tucui ima tiyaccunapish Apunchic Jesucristomanta ñucanchicta Dios cuyashcamantaca mana anchuchingachu. Chaitaca allimi yachani.