ROMANOS 5 - Dios Rimashcata Quillcashcami

Dios-huan alli tucushcamanta

¹ Ñucanchic crishcamanta Dios chasquicpimi, Apunchic Jesucristomanta Dios-huan cushi causanchic.

² Shinallatac Apunchic Jesucristota crishcallamantami Dios cuyashca, cushilla causacunchic. Shinami Diospac sumaimana mandanata cushicushpa shuyacunchic.

³ Mana chaillachu, ashtahuanpish llaquita apashcamantapishmi cushicunchic. Chai llaquicuna mana piñarina yuyaita cuc cashcatami yachanchic.

⁴ Mana piñaric cashpami sinchi cric cashun. Sinchi cric cashpami, cushicuihuan shuyashun.

⁵ Diosca paipac Espirituta cachashpami, ñucanchic shungupi cuyaita churashca. Chaimantami mana yanga shuyacunchic.

⁶ Ñucanchic maita mana quishpiripac cacpimi, Dios acllashca punzha Cristoca juchayuccunamanta huañurca.

⁷ Pipish cashcata ruhuac runamantaca mana huañungachu. Maijan allita ruhuac runamanta huañusha nic tiyangapishchari.

⁸ Ashtahuanpish Diosca ñucanchic juchayuc cacpipish, Cristota ñucanchicmanta huañuchun cachashpami, cuyac cashcata ricuchin.

⁹ Apunchic Jesucristo huañushcamanta, Dios chashquishca cashpaca, Dios piñarishpa, llaquichicui punzhapica quishpirishcami cashun.

¹⁰ Dios ñucanchic-huan piñashca cashpapish, paipac Churi huañushcamantami ñucanchicta chasquirca. Ña chashquishca cashpacarin Cristo causacushcamantami quishpichishca cashun.

¹¹ Shinallatac Apunchic Jesucristomanta Dios-huan alli tucushcamantapishmi Diosmanta yallita cushicunchic.

Adanmantapish, Cristomantapish

¹² Shuc runallamantami cai pachapica juchaca yaicurca. Chai juchamantami huañuica tiyan. Shinallatac tucui mashna juchallishcamantaca huañunami can.

¹³ Mandashcacuna manarac tiyacpimi, juchaca ña cai pachapi tiyarca. Mandashcacuna mana tiyacpica, pipish mana juchanchishcachu carca.

¹⁴ Shina cacpipish, Adanpac causai punzhamanta Moisespac causai punzhacamanmi huañuica ña tiyarca. Adán shina Dios mandashcacunataca mana cazushpapish huañurcami. Adanca chai shamuna cashca runata ricuchicmi carca.

¹⁵ Dios cuyashpa cushcaca maita mana Adán juchallishcahuan chimbapuraipacchu. Shuc runa juchallishcamantami tucui gentecuna huañuna carca. Shina cacpipish, Dios cuyashpa, Jesucristota cachashpaca, tucuipac allipacmi cacharca.

¹⁶ Dios cuyashpa cushcaca, mana shuc runa juchallishca shinachu carca. Chaica, Adán juchallishcamantami, Diosca taripashpa llaquichinaca yaicurca. Shina cacpipish, Dios cuyashpa, cushca Jesucristoca tauca juchayuccunatami Diospacman cutichishca.

¹⁷ Shuc runa juchallishcamanta tucui gentecuna huañuna cacpica, Dios cuyashpa, cushcamanta Dios-huan alli tucushcacunacarin Jesucristollamantami mushuc causaita japinga.

¹⁸ Ima shinami Adán juchallishcamanta tucui gentecuna juchayuc tucushpa llaquichina tucurca, chai shinallatacmi Apunchic Jesucristo cashcata ruhuac cashcallamanta tucui gentecuna mana juchanchishca canga. Shinallatac causaitapish charingami.

¹⁹ Ima shinami shuc runa mana cazushcamanta, tucui gentecuna juchayuc tucurca. Chai shinallatacmi shuc runa cazushcamanta, tucui gentecunata Diosca chasquinga.

²⁰ Mandashcacunaca jucha ashtahuan mirarichunmi churashca carca. Chashna jucha miraricpica, Diosca ashtahuanmi cuyaita ricuchirca.

²¹ Ima shinami juchaca cai pachaman yaicushpa tucuita huañuiman aparca, chai shinallatacmi Diosca cuyashpa, Apunchic Jesucristomanta chasquishpa, huiñai causaita cunga.