ROMANOS 4 - Dios Rimashcata Quillcashcami

Taita Abraham crishpalla Dios-huan alli tucushcamanta

¹ ¿Imatatac ñaupa taita Abrahammantaca nishun? ¿Paica imatatac japishca canga?

² Dios Abrahamta pai imata ruhuashcamanta chasquishca cacpica, jatun tucunmanmi carca. Shina cacpipish, mana Diospac ñaupapi jatun tucunmanchu carca.

³ Dios quillcachishcapica: “Abrahamca Diostami crirca. Chaimantami Diosca paita chasquirca” ninmi.

⁴ Trabajashcamanta pagashca cullquica mana yanga cushcachu, ashtahuanpish debimanta cushca cullquimi.

⁵ Ashtahuanpish Diosca ima allita mana ruhuacpipish, paita cricpica, juchacunata perdonashpa chasquinmi. Chaica, crishcallamantami chasquin.

⁶ Ima allita mana ruhuacpipish, Dios chasquicpi, cushicunamanta David huillashpaca:

⁷ «Millaita ruhuashcatapish, juchacunatapish perdonashca runaca cushicuchun.

⁸ Dios mana juchanchishca runapish cushicuchun» nishcami.

⁹ Chai cushicuica, ¿circuncisionta ruhuashcacunallamanchu? Mana cashpaca, ¿circuncisionta mana ruhuashcacunamanpishchu canga? Ñami: “Diosca Abrahamtaca crishcallamantami chasquirca” nishcanchic.

¹⁰ ¿Abrahamtaca manarac circuncisionta ruhuacpichu chasquirca? Mana cashpaca, ¿circuncisionta ruhuashca quipachu chasquirca? Mana, chaica manarac circuncisionta ruhuacpimi, Diosca chasquirca.

¹¹ Abrahamtaca crishcallamantami Diosca chasquirca. Ashtahuanpish Dios chasquishcata ricuchingapacmi, quipata circuncisionta ruhuarca. Chaica, Abrahamca mana circuncisionta ruhuashca cashpapish, tucui criccunapac taitami tucurca. Diosca paicunatapish crishcallamantami chasquirca.

¹² Abrahamca circuncisionta ruhuashcacunapacpish taitami. Paicunaca mana circuncisionta ruhuashcallachu carca. Chaica, Abraham manarac circuncisionta ruhuashpa, crishpa causacushcata caticcunami carca.

Crishpalla Dios cusha nishcata japinamanta

¹³ Diosmi Abrahammanpish, paipac huahua huahuacunamanpish cai pachata cusha nishpa ari nirca. Chaica, mana Abraham Moisés mandashcacunata pactachishcallamantachu cusha nirca, ashtahuanpish crishcamantami chasquirca.

¹⁴ Mandashcacunata pactachishpalla Dios cusha nishcata chasquina cacpica, crinapish, Dios cushami nishcapish yangallami canman.

¹⁵ Mandashcacunata mana pactachicpica, Diosca llaquichingami. Mandashcacuna mana tiyacpica, pipish mana juchanchishcachu canga.

¹⁶ Diosca cuyashcallamantami Abrahamman cushca nishcataca paipac huahua huahuacunamanpish cushca. Dios cushami nishcaca mana mandashcacunata cazuccunallamanchu, ashtahuanpish Abraham shina criccunamanpishmi can. Abrahammi tucuipac taita tucushca.

¹⁷ Dios quillcachishcapica: «Tauca llactacunapac taita cachunmi churani» ninmi. Abrahamca huañushcacunatapish causachic, ima mana tiyashcacunata ruhuac Diosta crishcamantami tucuipac taita tucushca.

¹⁸ Dios Abrahamta: «Cambac huahua huahuacunaca achcami canga» nishcamantami Abrahamca maita mana huahuata charipac cashpapish, tauca llactacunapac taita tucurca. Chaitaca Abrahamca crishpami shuyarca.

¹⁹ Abrahamca patsac huatayuc cashpapish, ña huañunalla cashpapish, paipac huarmi Sara yuyac cacpipish, huahuata charinataca crircami.

²⁰ Dios cusha nishcataca chasquina yuyaillami carca. Chashnami Diosta “allimari cangui” nishpa, crishpa shuyacurca.

²¹ Abrahamca: “Diosca, pai cusha nishcata cungapac poderta charinmi” nishpami shuyacurcalla.

²² Diosca Abrahamtaca crishcamantami chasquirca.

²³ Dios quillcachishcapica mana Abrahamllata chasquinamantachu nicun,

²⁴ ashtahuanpish ñucanchicta chasquinamantapishmi nicun. Ñucanchictapish Apunchic Jesusta huañushcacunapuramanta causachic Diosta cricpica, chasquinamantapishmi nicun.

²⁵ Apunchic Jesusca ñucanchic juchacunamantami huañurca. Diosca ñucanchictapish chasquingapacmi Jesustaca huañushcacunapuramanta causachirca.