ROMANOS 3 - Dios Rimashcata Quillcashcami

¹ Shina cacpica, ¿israel runa canapish, circuncisionta ruhuashcapish imapactac valin?

² Chaicunaca imapacpish valinmi. Chaica, Diosca puntaca israelcunamanmi pai rimashcacunataca cushca.

³ Paicunapuramanta maijancunaca mana cazurcachu. Paicuna chashna mana cazucpica, ¿Diosca pai nishcataca, mana pactachishpa saquingallachu?

⁴ ¡Mana chashna ruhuangachu! Tucui gentecuna llullac cacpipish, Diosca ima nishcata pactachicmi. Dios quillcachishcapica: «Tucuimi: “Cashcata nicmi” ningacunami. Canta taripacpipish, allimi llucshingui» ninmi.

⁵ Ñucanchic mana allita ruhuashcacunallatac Dios cashcata ruhuac cashcata ricuchicpica, ¿imatatac nishun? Ñucanchicta llaquichicpica, ¿Diosca millaimantami llaquichin nishunchu? Caitaca gentecuna yuyashca shinami rimagrini.

⁶ ¡Chaica mana chashnachu! Dios chashna cashpaca, ¿ima shinatac cai pachapi causaccunata taripanga?

⁷ Maijan: “Ñuca llullashcacuna Dios cashcata nic cashcatapish, pai jatun cashcatapish ricuchicpica, ¿ima nishpatac paica juchanchin?” nishpa yuyangami.

⁸ (Shina cacpica, ¿manachu maijanca: “Dios jatunyachishca cachunca, mana allicunata ruhuashpa catishun” ninman? Maijancunaca chashnami, ñucata llaquichingaraicu “Pabloca chashnami yachachin” nincuna.) Ashtahuanpish chashna niccunataca llaquichina cashca shinami Diosca llaquichinga.

Tucui mashna juchayuc cashcamanta

⁹ Chashna cacpica, ¿ñucanchic israelcunaca mana israelcunata atishpa allichu canchic? ¡Mana chashnachu! Ña nishca shina, israelcunapish, mana israelcunapish tucui mashna juchapi huatashca shinami canchic.

¹⁰ Dios quillcachishcapica: «Cashcata ruhuacca shucllapish mana tiyanchu.

¹¹ Pipish mana entendinchu. Diosmanta yachacpish, pi mana tiyanchu.

¹² Tucuimi pandarishcacuna, tucuimi mana vali tucushca. Pipish allita ruhuacca mana tiyanchu, shucllapish mana tiyanchu.

¹³ Paicunapac shimipish sepulturata pascashca shinami. Callupica llullallami tiyan. Paicunapac shimimantaca culebrapac veneno shinami llucshin.

¹⁴ Paicunaca llaquichic, millai rimaicunallatami riman.

¹⁵ Chaquicunapish huañuchingapac callpacunmi.

¹⁶ Maita purishpapish, llaquichina, quichuna yuyaillami purincuna.

¹⁷ Cushi causaitaca mana ricsincunachu.

¹⁸ Diosta manchana yuyaica paicunapac yuyaipica mana tiyanchu» ninmi.

¹⁹ Dios taripana punzhapi tucui mashna imata mana nishpa upalla saquirichunmi, tucui Moisés mandashcacunaca chai mandashcacunata chasquiccunaman huillacun. Chaitaca yachanchicmi.

²⁰ Mandashcacunata pactachishcallamantaca pipish Diospac ñaupapi mana chasquishcachu canga. Ashtahuanpish mandashcacunaca juchayuc cashcata ricuchingapacmi can.

Jesucristota crishpalla quishpirina cashcamanta

²¹ Chaica, cunanmi Diosca mana mandashcacunata pactachishcallamanta chasquic cashcata ricuchishca. Chaitaca Moisés mandashcacunapish, ñaupa huillaccunapish allimi huillan.

²² Diosca Jesucristota crishcamantami, tucui criccunata chasquin. Diospac ñaupapica tucui gentecunami chashnallatac can.

²³ Tucui mashna juchayuc cashcamantami Diospac sumaimana achicmanta carupi cancuna.

²⁴ Dios cuyashcallamantami Jesucristota crishpa, Dios chasquishca cancuna.

²⁵ Diosca gentecunamanta yahuarta jichashpa huañuchunmi Jesucristotaca cacharca. Jesucristota crishpallami quishpirinchic. Ñaupaca, Diosca mana piñaric cashpami, ñucanchic juchacunata perdonarca.

²⁶ Cunanmi Diosca ima shina chasquic cashcata ricuchin. Jesusta criccunata chasquishpami, pai cashcata ruhuac cashcata ricuchin.

²⁷ Mandashcacunata pactachishcamanta jatun tucuc runaca, ¿imatac jatun? Chaica yangallami. ¿Imatac ruhuashcamanta Diosca chasquin? ¿Mandashcacunata pactachishcamantachu chasquin? Mana, ashtahuanpish crishcallamantami chasquin.

²⁸ Shinaca, mandashcacunata pactachishcallamantaca Dios mana chasquic cashcata, ashtahuanpish Jesusta crishcamanta chasquic cashcatami yachac chayanchic.

²⁹ ¿Diosca israelcunapaclla Dioschu? ¿Manachu mana israelcunapacpish Dios? Ari, shinami can. Diosca tucuipac Diosmi.

³⁰ Chaica, Diosca shucllami. Paimi circuncisionta ruhuashca cacpipish, mana ruhuashca cacpipish, Jesusta crishcallamanta chasquin.

³¹ Shina cacpica, Jesusta crishcamantaca, ¿Moisés mandashcacunata yangallami ninachu canchic? ¡Mana chashnachu! Ashtahuanpish chai mandashcacuna alli cashcatami ricuchinchic.