ROMANOS 2 - Dios Rimashcata Quillcashcami

Dios taripanamanta

¹ Chaimanta can pi cashpapish shuccunata juchanchishpaca, mana perdonashcachu cangui. Chashna shuccunata juchanchishpaca, quiquinllatacmi llaqui tucucungui. Canpish paicuna shinallatacmi ruhuacungui.

² Diosca chashna ruhuaccunataca cashcata ruhuashpami taripanga. Chaitaca yachanchicmi.

³ Canpish chashnallatac ruhuacushpa, shuccunata juchanchishpaca, ¿Dios taripashpa llaquichinamanta anchuri pudinguichu?

⁴ ¿Dios cuyac cashcata, llaquic cashcataca yangalla cashcatachu yuyangui? ¿Dios llaquishpa, paiman cuti richun shuyacushcatapish yangapichu churangui?

⁵ Can sinchi shungu tucushpa, Diosman mana cutirishpaca, Dios yallita piñarishpa taripana punzhapacmi llaquita ashtahuan mirachicungui. Diosca cashcata ruhuashpami,

⁶ imata ruhuashcata ricushpa, tucuiman cunga.

⁷ Diosca maijanpish allillata ruhuashpa, paipac ñaupapi alli ricurinata, huiñai causaita japinata munashpa causaccunamanca huiñai causaitami cunga.

⁸ Ashtahuanpish Diosca maijanpish quiquin munashcata ruhuashpa causanata munashpa, cashcata nic huillashcata piñaccunataca yallita piñarishpa llaquichingami.

⁹ Tucui mana allita ruhuaccunami yalli llaquihuan llaquilla canga. Puntaca israelcunaracmi llaquita apangacuna. Mana israelcunapishmi llaquita apangacunami.

¹⁰ Ashtahuanpish tucui allita ruhuaccunamanca Diosca mandac canatapish, cushi causaitapish, alli canatapishmi cunga. Chashnami puntaca israelcunaman cushpa, mana israelcunamanpish cunga.

¹¹ Diosca pimanpish mana tucushpami cunga.

¹² Moisés mandashcacunata mana yachashpa juchalliccunaca, chai mandashcacunata mana yachashpami huañunga. Ashtahuanpish mandashcacunata yachashca jahua juchalliccunaca, mandashcapi nishca shinami taripashca canga.

¹³ Mandashcacunata uyashcallamantaca pipish mana Dios-huan alli tucunchu, ashtahuanpish chai mandashcacunapi ima nishcata cazushpami, Dios-huanca alli tucun.

¹⁴ Mana israelcunaca Moisés mandashcacunata mana yachashpapish, paicunapac yuyaipi imami, alli, imami mana alli cashcata yachashcamantami mandashcacunata pactachincuna.

¹⁵ Paicunaca, paicunapac ruhuashcahuanmi, shungupi mandashcacuna quillcashca shina cashcata ricuchin. Paicunapac yuyaipimi ima alli cashcata, mana alli cashcata yachashpa, mana alli cacpica, mana allichu nin.

¹⁶ Alli huillaita ñuca huillashca shinami, ima pacalla ruhuashcatapish Diosca Jesucristohuan taripai punzhapi taripanga.

Moisés mandashcacuna israelcunata juchanchishcamanta

¹⁷ Canca: “Israelmi cani, Moisés mandashcacunatapish charinmi, Dios-huanpish allimi cani” nishpami jatun tucungui.

¹⁸ Diospac munaitapish, pai mandashcacunata yachacushpa, ima allita acllana cashcatapish yachanguimi.

¹⁹ Canca ñahui mana ricuccunata pushacpish, amsapi puriccunata achicman apacpish,

²⁰ mana yachaccunata yachachicpish, huahua shinacunata alli pushacpishmi cani yuyanguimi. Shinallatac mandashcacuna cashcata nic cashcatapish yachachinimi yuyangui.

²¹ Shuccunata yachachishpaca, ¿ima nishpatac mana canllatac yachacungui? Can “Mana shuhuanachu” nishpa yachachishpaca, ¿ima nishpatac shuhuanata mana saquingui?

²² Can “Mana huainayanachu” nishpa yachachishpapish, ¿ima nishpatac huainayangui? Ruhuashcalla dioscunata “piñanimi” nishpaca, ¿ima nishpatac paicunata adorana huasimantaca shuhuangui?

²³ Mandashcacunata charishcamanta jatun tucushpaca, ¿ima nishpatac chai mandashcacunata mana cazushpa, Diosta yangapi churangui?

²⁴ Dios quillcachishcapica: «Cancunamantami mana israelcunaca Diosta mana alli nishpa rimancuna» ninmi.

²⁵ Moisés mandashcacunata pactachishpaca circuncisionta ruhuashcaca allimi. Shina cacpipish, Moisés mandashcacunata mana pactachicpica, circuncisionta ruhuashcaca yangallami.

²⁶ Maijan mana circuncisionta ruhuashca cashpapish, mandashcacunata pactachishpaca, circuncisionta ruhuashca shinami can.

²⁷ Chaica aichapi mana circuncisionta ruhuashca cashpapish mandashcacunata pactachiccunaca, circuncisionta ruhuashca jahua, mandashcacunata yachashca jahua mana pactachiccunataca juchanchingami.

²⁸ Shungupitac Israel runa cashpami, Israel runa can. Aichallapi circuncisionta ruhuashcaca mana circuncisionta ruhuashca shinami can.

²⁹ Tucui shunguhuanmi Israel runa cana. Shinallatac circuncisionta ruhuashcapish shungumantami cana. Chai yuyaicunaca mana mandashpa quillcashcamantachu, ashtahuanpish Diospac Espiritumantami shamun. Chashna caccunataca mana gentecunallachu alli nin, ashtahuanpish Diosmi alli nin.