ROMANOS 15 - Dios Rimashcata Quillcashcami

Manarac sinchi criccunata ayudanamanta

¹ Ñucanchic sinchi criccunaca manarac sinchi criccuna pandaricpipish ayudanami canchic. Mana quiquinlla alli canata munanachu.

² Tucuimi shuctac criccuna crishpa catichun, paicunapac allipac ruhuana canchic.

³ Cristopish mana quiquinlla alli canata munarcachu, ashtahuanpish Dios quillcachishcapica: «Canta camishpa rimashpaca, ñucatami riman» nishcami.

⁴ Ñaupa quillcashcacunaca ñucanchicta yachachingapacmi quillcashca. Chai quillcashcami cushicushpa, mana piñarishpa shuyanata yachachin.

⁵ Mana piñaric, ashtahuanpish cushichic Dios, Jesucristo causashca shina, shuc yuyailla causanata yachachichun.

⁶ Tucui mashna shuc yuyailla, ñucanchic Apunchic Jesucristopac Diosta alli nichunmi munani.

Alli huillaica mana israelcunamanpish cashcamanta

⁷ Cristo ñucanchicta Dios alli nishca cachun chasquishca shina, cancunapish caishuc chaishucta chasquichic.

⁸ Cristoca, Dios ñaupa taitacunaman cusha nishcata pactachic cashcata ricuchingapacmi israelcunata servingapac shamurca.

⁹ Cristoca Dios quillcachishcapi nishca shina, mana israelcunatapish Diosta alli nichunmi shamurca. Dios quillcachishcapica: «Chaimantami tucui llactacunapi canta pagui nisha. Cambac shutitapish cantashami» ninmi.

¹⁰ Cutinllatac Dios quillcachishcapica: «Tucui llactacuna, ¡Dios acllashcacunahuan cushicuichic!» ninmi.

¹¹ Cutinllatac Dios quillcachishcapica: «Tucui llactacuna Mandac Diosta alli nichic. Tucui aillucuna, Diosta jatunyachichic» ninmi.

¹² Cutinllatac Dios ima nishcata huillac Isaiasca: «Isaipac huahua huahuapuramantami llactacunata mandangapac jatarimunga. Chaimantami paita cushicushpa shuyacuncuna» ninmi.

¹³ Diospac Espíritu crishpa, shuyana yuyaita yallita charichun, Diosllatac cushichishpa, crishpa cushi causaita cuchun. Diosca shuyana yuyaita cucmi.

Apóstol Pablo imata ruhuashcamanta

¹⁴ Cuyashca criccuna, cancuna yallita cuyac cashcatapish, alli yachac cashcatapish, caishuc chaishucta cunac cashcatapish yachani.

¹⁵ Shina cacpipish, cancuna ama cungarichunmi maijan rimaicunata sinchita rimashpa quillcani. Dios cuyashcamantami,

¹⁶ mana israelcunapac allipac Jesucristota servichun acllarca. Chaimantami cashna quillcani. Chaica, mana israelcunata Diospac Espíritu Diospacllata ruhuachun, paicuna mishquilla ashnacuc ofrenda shina cachunmi quishpirinamanta alli huillaita huillashpa Diosta servicuni.

¹⁷ Jesucristota crishcamanta Diosta servishpaca, yallitami cushicuni.

¹⁸ Chaica, mana israelcuna Diosta cazuchun, Cristo ñucata imata ruhuashcallatami rimasha nini. Chaitaca mana rimarcanillachu, ashtahuanpish ruhuarcanimi.

¹⁹ Chashnami poderyuc Diospac Espirituhuan mancharinacunatapish, milagrocunatapish ruhuashpa, Jerusalén pueblomantaca Iliria llactacaman maipipish Cristomanta alli huillaita huillarcani.

²⁰ Cristomanta pi mana huillashca llactacunapi huillanatami ashtahuan munarcani. Shuccuna Cristomanta huillashpa, criccunata callarichishca jahuapi callarichinataca mana munarcanichu.

²¹ Chaipac randica, Dios quillcachishcapi: «Jaicapi paimanta mana uyaccunaracmi paita ricungacuna. Paimanta jaicapi mana uyaccunami entendingacuna» nishca shinami ruhuarcani.

Roma puebloman Pablo rinata yuyarishcamanta

²² Tauca cutin ricungapac risha nishpapish, mana ri pudishcanichu.

²³ Cunanca, cai llactacunapi imata ruhuana mana tiyacpimi, tauca huatacunata ricungapac rina munaita charishcamanta,

²⁴ España llactaman rishpaca, ima shinapish cancunata ricuna yuyailla cani. Cancunata asha punzhacunata compañashca quipa, ñuca ricushcaman chayangapac ayudachunmi munani.

²⁵ Cunanca Jerusalén pueblopi causac criccunata ayudangapacmi rigrini.

²⁶ Acaya llacta, Macedonia llacta criccunami cushilla ofrendata tandashpa, Jerusalén huaccha criccunata ayudachun cacharca.

²⁷ Chai shina, paicunapac munaimanta ruhuashpaca, allitami ruhuashcacuna. Mana israelcunapish cric israelcunamanta Dios cushcata chasquishpaca, paicunatapish ayudanami can.

²⁸ Ñuca imata ruhuasha nishcata tucuchishpa, ofrendatapish cushpaca, España llactaman rishallami.

²⁹ Cancunapacman rishpa, Cristopac alli huillaimanta (achca bendicionhuan) chayanatami yachani.

³⁰ Cuyashca criccuna, Apunchic Jesucristomanta, Diospac Espiritupac cuyaimantami ñucamanta Diosta mañachun mañani.

³¹ Judea llactapi causac mana criccunamanta Dios huacaichichun, Jerusalén criccuna ñuca apashca ofrendata alli chasquichun Diosta mañaichic.

³² Chashna ruhuacpimi, Dios munacpica, cancunapacman alli chayashpa, cushilla samarisha.

³³ Cushi causaita cuc Dios tucui cancunahuan cachun. Chashna cachun.