ROMANOS 14 - Dios Rimashcata Quillcashcami

Shuccunata mana juchanchina cashcamanta

¹ Manarac sinchi criccunata chasquishpaca, ama caita chaita ninguichicchu.

² Maijancunaca: “Imatapish micunallami” nincunami. Manarac sinchi criccunaca: “Llullu micunallatami micuna” nishpami yuyancuna.

³ Chaimanta tucuita micucca, mana tucuita micucta piñanachu, mana tucuita micucpish mana tucuita micucta piñanachu. Chaica, Diosca tucuitami chasquishca.

⁴ Shucpac serviccunata juchanchingapacca, ¿pitac canca cangui? Amomi servic alli cashcata, mana alli cashcata ninga. Poderyuc Apunchic Jesusmi imatapish allita ruhuachun sinchiyachinga.

⁵ Maijan criccunaca: “Shuc punzhami caishuc punzhamanta ashtahuan alli” nincunami. Cutin maijan criccunaca: “Tucui punzhacunami chai shinallatac” nincunami. Tucuimi quiquin imata yuyashcataca alli cashcata yuyana can.

⁶ Maijanpish shuc punzhata chicanyachishpaca, Apunchic Jesusta alli ningapacmi chicanyachin. Shinallatac tucuita micucpish, Apunchic Jesusta alli ningapacmi Diosta pagui nishpa micun. Mana tucuita micucpish, Apunchic Jesusta alli ningapacmi Diosta pagui nishpa, mana chashna micun.

⁷ Maijanpish mana quiquinpacllachu causanchic. Huañushpapish, mana quiquinpacllachu huañunchic.

⁸ Chaimanta causashpapish, Apunchic Jesuspacmi causanchic. Huañushpapish, Apunchic Jesuspacmi huañushun. Shinaca causashpapish, huañushpapish Apunchic Jesuspacmi canchic.

⁹ Chaipacmi Apunchic Jesusca huañurca, shinallatac causarirca. Chashnami tucuipac Mandac cangapac causarirca.

¹⁰ Shina cacpica, ¿ima nishpatac shuctac cricta juchanchingui? ¿Ima nishpatac caishuc cricta mana valichingui? Tucuimi Diospac ñaupapi taripashca cangapac ricurishun. Paimi allitapish, mana allitapish ninga.

¹¹ Dios quillcachishcapica: «Mandac Diosca: “Tucuimi ñucapac ñaupapi cunguringacuna. Tucui rimaipimi ñucataca ‘canca Diosmi cangui’ ningacuna” nin» ninmi.

¹² Chaimanta tucui ñucanchicmi imata ruhuashcacunata Diosman ricuchigrina canchic.

Shuctac criccunata mana pandachinamanta

¹³ Chaimanta ñucanchicca mana shuctac cricta juchanchinachu canchic. Chaipac randica, ama pandarichunmi, ima millaita mana ruhuanata yuyana canguichic.

¹⁴ Mana imapish paillatac mapaca tiyanchu. Apunchic Jesusmantami chashna nini. Ashtahuanpish maijan mapa cashcata yuyacpica, paimanmi mapa can.

¹⁵ Can imatapish micushpa, shuctac criccunata llaquichishpaca, mana cuyac cashcatami ricuchingui. Can micushcallamanta pacta shuctac criccuna chingarinman. Paicunamantapishmi Cristoca huañurca.

¹⁶ Pacta cancunaman allita causacushpaca, shuccunaman mana allita ruhuacunguichicman.

¹⁷ Dios mandashca causanaca mana ubianata, micunata yuyashpalla causanachu, ashtahuanpish Diospac Espíritu ayudacpi, cashcata ruhuashpa, cushilla causanami.

¹⁸ Chai shina Cristota servishpami, Diosta cushichishpa, runacunapacpish alli nishca causan.

¹⁹ Chaimanta shuctac criccunahuan cushilla causashpa, Jesusta criccunata sinchiyachishunchic.

²⁰ Dios imata ruhuasha nicushcataca ama micushcallamanta yangapi churaichu. Tucui micuimi micunalla, ashtahuanpish micushpa shuctac criccunata juchapi urmachinami mana alli.

²¹ Shuctac criccunata pandachinapac randica, aichatapish mana micuna, vinotapish mana ubiana, ima shuctaccunatapish mana ruhuanami ashtahuan alli.

²² Can imata crishcataca canllatacmi Diospac ñaupapi charina cangui. Maijanpish paipac yuyaipi mana juchanchishca cashcamanta alli yuyacmanca, ¡mai cushicuimi!

²³ Ashtahuanpish “¿cai micunaca allichu, mana allichu?” nishpa micucca juchallinmi. Pai crishca shina mana micushpaca juchayucmi tucun.