ROMANOS 13 - Dios Rimashcata Quillcashcami

Mandaccunata cazuna cashcamanta

¹ Tucui mandaccunaca Dios churashcami. Chaimanta tucui mashna paicunataca cazuichic.

² Mandaccunata mana cazucca, Dios mandashcatami mana cazun. Chashna mana cazuccunataca llaquichishcami canga.

³ Mandaccunaca mana allita ruhuac runata manchachingapacmi, ashtahuanpish allita ruhuac runataca, mana manchachinchu. Mandaccuna mana manchachishca causasha nishpaca, allita ruhuashpa causai. Shina causacpimi, mandaccunaca “allita ruhuac runami” ninga.

⁴ Mandaccunaca Diosta servic cashpami, cambac allipac can. Mana yanga churashcachu, ashtahuanpish mana allita ruhuac runata llaquichingapacmi. Paicunaca Diospacta ruhuac cashpami, maijanpish llaquichina cacpica, cashcata ruhuashpa llaquichin. Chaimanta mana allita ruhuashpaca manchanami cangui.

⁵ Mandaccunataca mana llaquichic cashcallamantachu cazuna can, ashtahuanpish quiquinpac yuyaipi alli cashcamantami cazuna can.

⁶ Mandaccunaca Diosta servic cashpami, chaillata ruhuashpa causancuna. Ima shuctac ruhuaita mana charinchu. Chaimanta impuestota cunami canguichic.

⁷ Imata debishpaca pagaichic. Imata pagana cacpica pagaichic. Impuestota cuna cacpica cuichic. Maijanta cazuna cacpica, cazuichic. Maijanta alli nina cacpica, alli nichic.

⁸ Ima mañashcataca ama charicuichicllachu, ashtahuanpish caishuc chaishuc-huan cuyanacuichic. Maijanpish cuyacca, Dios mandashcacunatami pactachin.

⁹ Dios mandashcacunapica: «Ama huainayangui, ama huañuchingui, ama shuhuangui, ama shucpac charishcata munangui» ninmi. Cai mandashcacunapish, caishuc mandashcacunapish (shucllamanmi tandarin.) Chaica: «Can ima shinami cuyaringui, chai shinallatac shuccunatapish cuyangui» ninmi.

¹⁰ Cuyacca, mana shuccunata llaquichinchu. Cuyaita charicca Dios mandashcacunatami tucuita pactachin.

¹¹ Tucui caicunataca cunan punzhapi ima tucushcata ricushpa yuyarichic. Ñucanchic crishca punzhamanta ricucpica, quishpichina punzhaca ñami shamucun. Chaimanta ama sueñucuichicchu, ashtahuanpish riccharishca shina caichic.

¹² Tutapish ñami pacarimugrin. Chaimanta amsapi mana allicunata ruhuashpa causanata saquishpa, achicta churaric shina, allita ruhuaichic.

¹³ Punzhapi puricuc shina, allita ruhuashpa causashunchic. Ama yalli micunallata, ubianallata munashunchic, ama huainayashunchic, ama piñanacuipi churashunchic, ama mana allicunata ruhuashunchic.

¹⁴ Chaipac randica, Apunchic Jesusta churanata churaric shina, paihuan millaita mishaichic. Ashtahuanpish ama cai pacha jucha munashcata ruhuaichicchu.