ROMANOS 12 - Dios Rimashcata Quillcashcami

Diospaclla causanamanta

¹ Cuyashca criccuna, Dios cancunata cuyashcamanta caitami ruhuachun mañani: Cancunapac cuerpota Diosman ofrendata cuc shina, pai munashcata ruhuaichic. Chashna ruhuashpami, Diosta tucui shunguhuan alli ninguichic.

² Ama cai pacha gentecuna munashca shina causaichicchu. Chaipac randica, mushuc yuyaihuan shuctaclaya causaichic. Chashna causashpami, Diospac munaica sumac cashcata, yachac chayanguichic.

³ Dios ñucata cuyashcamantami, cancunataca ama yachac tucuichicchu, chaipac randica Dios crina yuyaita cushca shina, causachunmi ninimi.

⁴ Cuerpopica tauca partemi tiyan. Shina cashpapish mana tucuichu chaillatatac ruhuan.

⁵ Chai shinallatacmi ñucanchicca tauca cashpapish, Cristohuan shuc shinalla canchic. Shinallatac tucui ñucanchicpish shuc cuerpo shinallami canchic.

⁶ Dios cuyashcamantami tauca ruhuaicunata ruhuachun ñucanchicman cushca. Pai ima nishcata huillacta ruhuashca cacpica, ima shina crishca shina huillachun.

⁷ Shuccunata servicta ruhuashca cacpica, servishpa catichun. Yachachicta ruhuashca cacpica, yachachishpa catichun.

⁸ Shuccunata cunacta ruhuashca cacpica, cunashpa catichun. Shuccunaman ima illashcata cucta ruhuashca cacpica, tucui shunguhuan cushpa catichun. Mandacta ruhuashca cacpica, mandashpa catichun. Ayudacta ruhuashca cacpica, ayudashpa catichun.

Ima shina Diospacta ruhuanamanta

⁹ Mana nic tucushpalla caishuc chaishuc-huan cuyanacuichic. Imapish mana alli ruhuanacunata saquishpa, allita ruhuana yuyailla caichic.

¹⁰ Huauquindipura shina caishuc chaishuc-huan cuyanacuichic. Shuccunahuan sumacta causaichic.

¹¹ Tucui shunguhuan Apunchic Jesusta servichic, ama quilla caichicchu. Ashtahuanpish cusi caichic.

¹² Apunchic Jesusta shuyacushpaca, cushicushpa causaichic. Apunchic Jesusmanta llaquita apacushpaca, ama piñarichicchu. Diosta mañanataca ama saquichicchu.

¹³ Criccunapurapi ima illashcata, cushpa ayudaichic. Shuctac llactamanta shamuccunata pozachichic.

¹⁴ Cancunata piñaccunataca bendiciaichic. Paicunataca ama maldicianguichicchu. Chaipac randica bendiciaichic.

¹⁵ Cushilla caccunahuanca cushicuichic. Huacaccunahuanca huacaichic.

¹⁶ Cancunapurapica shuc shinalla caichic. Ama jatun tucuichicchu, ashtahuanpish yangalla gentecunahuan tandanacuichic. Cancunapurapica ama yachac tucuichicchu.

¹⁷ Maijan cancunata mana allita ruhuacpica, ama cancunapish chai shinallatac ruhuaichicchu. Chaipac randica, tucuipac ñaupapi alli caichic.

¹⁸ Tucuihuan cushilla causanata munaichic.

¹⁹ Cuyashca criccuna, cancunata maijan llaquichicpica, ama cancunallatac llaquichinata yuyaichicchu, ashtahuanpish Dios llaquichichun saquinguichic. Chaica, Dios quillcachishcapica: «Llaquichina cacpica, ñucami llaquichisha. Paicuna japina cashcatami cusha» ninmi.

²⁰ Dios quillcachishcapica: “Canta piñac yarcaihuan cacpica, carangui. Yacunayaihuan cacpica, ubiachingui. Chashna ruhuashpami, pingaichishpa ñahuita pucayachingui” ninmi.

²¹ Ama millai ruhuana yuyaicuna mishachun saquichicchu. Chaipac randica, allita ruhuashpa millaita mishai.