ROMANOS 11 - Dios Rimashcata Quillcashcami

Israelcunamantaca maijancunalla quishpirina cashcamanta

¹ ¿Cunanca imatatac nishun? ¿Diosca pai acllashca israelcunataca shitashcachu? ¡Mana chashnachu! Ñucapish Abrahampac huahua huahuapuramanta, Benjamín aillupurami cani.

² Ñaupamanta pachami Diosca israelcunataca acllarca. Ashtahuanpish mana shitashcachu. Dios quillcachishcapi Eliasmanta ima nishcataca, ¿manachu yachanguichic? Chaipica, israelcunata juchanchishpa, Diosta mañacushpaca:

³ «Dioslla, can ima nishcata huillaccunatapish huañuchishcami, cambac altarcunatapish urmachishcami. Ñucallami saquirini. Ñucatapish huañuchishun nincunami» nirca.

⁴ Chashna mañacpi Diosca: «Canchis huaranga gentecunatami acllarcani. Paicunaca mana Baal diospac ñaupapi cungurishcachu» nirca.

⁵ Chai shinallatacmi cunanpish Diosca paipac cuyaillamanta maijancunata acllashca.

⁶ Diosca paicunataca mana ima allita ruhuashcamantachu acllashca. Ashtahuanpish cuyaillamantami acllarca. Paicuna allita ruhuashcamanta acllashca cacpica, Diospac cuyaica yangallami canman.

⁷ Shinashpaca, ¿imatatac nishun? Israelcunaca paicuna mashcacushcataca mana japircachu. Ashtahuanpish Dios acllashcacunallami japirca. Shuccunaca rumi shungumi tucurca.

⁸ Dios quillcachishcapica: «Diosmi paicunataca sinchi shunguta ruhuarca. Cunan punzhacamanmi ñahui mana ricuccunata, ringri mana uyaccunata ruhuashca» ninmi.

⁹ Shinallatac Davidca: «Paicunapac jatun micuica tuclla tucuchun, tiyarinapish mitcarina tucuchunmi mañani.

¹⁰ Ñahuicunapish imata mana ricushpa amsayachun, paicunapac huasha tullucunapish huiñaita aruyashca cachunmi mañani» nishcami.

Mana israelcunapish quishpirina cashcamanta

¹¹ Ñucaca: ¿Israelcuna urmashpaca, huiñaitachu chingarishca canga? ¡Mana chashnachu! Ashtahuanpish israelcuna mana cazushcamantami Diosca mana israelcunata quishpichirca. Israelcuna envidiachunmi chashnaca ruhuarca.

¹² Israelcuna mana cazushcaca tucui cai pachapi causaccunapac allipacmi cashca. Paicuna pandarishcaca mana israelcunapac allipacmi cashca. Israelcuna pandarishca mana israelcunapac allipac cacpica, israelcunata Dios quishpichicpicarin, ashtahuan alli cashcatami yachanchic.

¹³ Cancuna mana israelcunamanmi rimani. Ñucaca mana israelcunaman huillac apostolmi cani. Ñuca imata ruhuacushcataca yallimi cuyani.

¹⁴ Chashna ruhuashpaca, ñuca llacta aillucuna envidiashpa, maijancunallapish quishpirina munaita charichunmi munani.

¹⁵ Israelcunata Dios shitacpi, tucui cai pachapi causaccuna Diospacman cuchuyashca cacpi, ¡israelcuna Dios chasquicpicarin, huañushcacuna causarishca shinami canga!

¹⁶ Punta ruhuashca tanda Diospaclla cacpica, tucui chapumi Diospac canga. Shuc yura sapi Diospaclla cacpica, tucui ramacunami Diospac canga.

¹⁷ Maijan israelcunaca alli olivos yuramanta pitishca rama shinami. Cutin can mana Israelca, sacha olivos ramata pitishpa, alli olivos yurapi llutashca shinami cangui. Chaimantami canca chai sapimanta huiñashca yura shina, causaita japishcangui.

¹⁸ Shina cashpapish ama: “Caishuc ramacunamanta yallimi cani” nichu. Canca mana yurata charic sapichu cangui, ashtahuanpish sapimi canta charicun.

¹⁹ Canca: «Ñucata llutachingapacmi, chai olivospac ramacunataca pitirca» ninguichari.

²⁰ Ari, chai israelcunaca mana crishcamantami, pitishca shina tucurcacuna. Ashtahuanpish canca crishcallamantami chai yurapi huiñashca cangui. Chaimanta ama canllatac “allimi cani” nirichu, ashtahuanpish Diosta manchai.

²¹ Diosca chai yurapi huiñashca ramacunatapish pitishpaca, can llutachishcallatacarin, ¿ima nishpatac mana pitinga?

²² Dios llaquic cashcatapish, llaquichic cashcatapish yachanami cangui. Diosca mana cazuccunataca llaquichishcami. Shina cashpapish cantaca llaquishcami. Diospac cuyaita mana cungarishpaca causanguimi. Mana yuyarishpaca canpish anchuchishcami cangui.

²³ Israelcunapish sinchi shungu canata saquishpa, crishpaca chai yurapi llutashcami canga. Diosca cutin chai yurapi llutangapac poderta charinmi.

²⁴ Canca paillatac huiñashca sacha olivos yuramanta pitishpa, alli olivos yurapi churashca shinami cangui. Ashtahuanpish israelcunacarin alli olivos yura ramacuna cashcamantaca, quiquin yurallapitacmi Diosca churanga.

Israelcunapish quishpirina cashcamanta

²⁵ Cuyashca criccuna, cancuna ama jatun tucuchunmi, Dios manarac piman yachachishcata yachachun munani. Tucui mana israelcuna cringacamanmi, maijan israelcunaca sinchi shungu tucunga.

²⁶ Chai quipaca, tucui israelcunami quishpiringa. Dios quillcachishcapica: «Sión pueblomantami Quishpichic shamunga. Jacobopac huahua huahuacunapac juchacunatami anchuchinga.

²⁷ Diosca: “Paicunapac juchacunata anchuchingapacmi, ari nircani” nin» ninmi.

²⁸ Mana israelcunapac allipacmi, israelcunaca alli huillaita mana cazushpa, Dios piñashca tucushcacuna. Shina cacpipish, Diosca paicunapac ñaupa taitacunata acllashcamantami cuyacun.

²⁹ Diosca imata cushpapish mana quichunchu. Cayashpapish mana cungarinchu.

³⁰ Cancunapish ñaupaca Diosta mana cazuccunami carcanguichic. Shina cacpipish, cunanca israelcuna mana cazushcamantami Diosca cancunatapish llaquicun.

³¹ Paicunaca cancunata llaquishca shina Dios llaquichunmi, Diosta mana cazuncuna.

³² Diosca tucui gentecunata llaquingapacmi, paita mana cazuchun saquirca.

Dios yallita yachac cacpi cantashcamanta

³³ ¡Dios mandanapish, yachaipish, yuyaipish yalli jatunmi! Pai yuyacushcapish, maita mana yachaipacmi. Pai ruhuashcapish mana entendipacchu.

³⁴ Chaica, ¿pitac Diospac yuyaita ricsin? ¿Pitac paiman yuyaita cun?

³⁵ ¿Pitac Diosmanta imata chasquingapac, imata cui pudin?

³⁶ Chaica, tucui imapish Diosmantami tiyan. Tucui imapish paipacmi. ¡Chaimanta Diostaca huiñai huiñaita alli nishca cachun! Chashna cachun.