ROMANOS 10 - Dios Rimashcata Quillcashcami

¹ Cuyashca criccuna, tucui shunguhuanmi israelcuna quishpirichun Diosta mañacuni.

² Paicuna Diosta servina munaita yallita charishcataca yachanimi. Shina cashpapish, ima shina pactachinataca mana yachancunachu.

³ Paicunaca Dios chasquisha nicucpipish mana entendishpami, quiquin ruhuashcahuan Dios chasquishca canata munarcacuna.

⁴ Maijanpish crishpalla Dios chasquishca cachunca, Cristollami mandashcacunata pactachirca.

⁵ Mandashcacunata pactachishpalla Dios chasquishca canamanta Moisés quillcashpaca: «Maijanpish mandashcacunata pactachicca, pai pactachishcamantami causanga» ninmi.

⁶ Crishcallamanta Dios chasquishca canamanta Moisés quillcashpaca: «Ama shungupi: “¿Pitac jahua pachaman huichicungayari?” ninguichu. (Chashnaca, jahua pachamanta Cristota uricuchina shinatami nicungui).

⁷ Mana cashpaca ama: “¿Pitac ucu pachamanca yaicungayari?” ninguichu» ninmi. (Chashna nishpaca, Cristota huichaiman llucshimuna shinatami nicungui).

⁸ Shina cacpica, ¿imatatac Diospac shimica nin? Chaica: «Dios rimashcaca cambac cuchupimi, cambac shimipimi, cambac shungupimi» ninmi. Caimi crinamanta alli huillaita huillashca:

⁹ Cambac shimihuan “Jesusca ñucata Mandacmi” nishpa, tucui shunguhuan Dios Jesusta huañushcacunapuramanta causachishcata crishpaca quishpiringuimi.

¹⁰ Chaica, Dios chasquishca cangapacca tucui shunguhuanmi crina. Quishpiringapac quiquin shimihuanmi “Jesusca ñucata Mandacmi” nina.

¹¹ Dios quillcachishcapica: «Maijanpish paita cricca mana pingaichishcachu canga» ninmi.

¹² Apunchic Jesusca shucllami, tucuita Mandacmi, maijanpish mañaccunamanca yallita cucmi. Paimanca Israelcunapish, mana israelcunapish chai shinallatacmi.

¹³ Dios quillcachishcapica: “Maijanpish Mandac Diosta mañacca quishpiringami” ninmi.

¹⁴ Chaica, ¿ima shinatac Jesusta manarac crishpaca mañangacuna? ¿Ima shinatac paimanta huillashcata mana uyashpapish cringacuna? ¿Ima shinatac mana pi huillacpica uyangacuna?

¹⁵ ¿Ima shinatac mana pi cachacpica huillangacuna? Dios quillcachishcapica: «Alli huillaita huillashpa purinaca, ¡mai sumacmi!» ninmi.

¹⁶ Shina cacpipish, mana tucuichu alli huillaitaca cazurca. Chaimantami Dios ima nishcata huillac Isaiasca: «Mandac Dioslla, ¿ñucanchic huillashcataca pitac crishcayari?» nin.

¹⁷ Chaica, alli huillaita uyashpami crincuna. Chai uyashcaca Cristomanta huillashcami.

¹⁸ Ashtahuanpish ñucaca: «Cristomanta huillashcataca, ¿manachu uyarcacuna?» nishpami tapuni. ¡Paicunaca uyarcacunami! Dios quillcachishcapica: «Paicuna huillashcaca tucui cai pachapimi uyarishca. Paicunapac rimashcaca allpa tucuricamanmi uyarishca» ninmi.

¹⁹ Cutinllatacmi ñucaca: «Israelcunaca caicunataca, ¿manachu entendirca?» nishpa tapuni. ¡Ari, entendircami! Ñaupaman Moisés huillashpaca: «Mana ñucapac gentecunata acllashpami piñachisha. Mana entendic gentecunata acllashpami, piñachisha» ninmi.

²⁰ Isaías mana manchashpa huillashpaca: «Mana mashcac gentecunami ñucataca tarirca. Ñucata mana tapuc gentecunamanmi ricurircani» ninmi.

²¹ Israelcunamanta Isaías cutin rimashpaca: «Ñucata mana cazuc, piñac gentecunataca tucui punzhacunami rigrata pascashpa cayacurcanilla» ninmi.