ROMANOS 1 - Dios Rimashcata Quillcashcami

Roma pueblopi causac criccunaman Pablo quillcashcamanta

¹ Jesucristota servic, apóstol cangapac acllashca, alli huillaita huillachun Dios chicanyachishca Pablomi caita quillcani.

² Chai alli huillaitami Diosca ñaupaman pai ima nishcata huillaccunaman huillachishpa, cushami nishca.

³ Cai alli huillaica Diospac Churi, Mandac Jesucristomantami huillacun. Pai Runa tucungapacca, ñaupa mandac Davidpac huahua huahuapuramantami huacharirca.

⁴ Diospac jucha illac Espiritumi poderhuan huañushcacunapuramanta causachirca. Chashnami Diospac Churi poderyuc cashcata ricuchirca.

⁵ Tucui llactacunapi paita crishpa cazuchun, paipac shutita alli nichunmi Jesucristoca cuyashcallamanta apóstol cachun ñucataca acllarca.

⁶ Chai cayashcacunaca Roma pueblopi causac cancunapish Jesucristo acllashcami canguichic.

⁷ Roma llacta criccuna, cancunataca Diosmi cuyashpa, paipaclla cachun acllarca. Ñucanchic Diospish, Apunchic Jesucristopish yallita cuyachun, cushi causaita cachun ninimi.

Pablo Roma puebloman rinata yuyarishcamanta

⁸ Puntaca cancuna crishca tucui llactacunapi uyarishcamantami, Jesucristopac shutipi Diosta pagui nini.

⁹ Ñuca cancunamanta punzhanta mañacushcataca Diosllatac yachanmi. Ñucaca paipac Churimanta huillashpami, tucui shunguhuan Diosta servini.

¹⁰ Dios munacpica, cancunata ricungapac rishapishchari nishpami Diosta mañacuni.

¹¹ Cancuna sinchi cric cachunmi, Diospac Espíritu yuyaita cushcata cancunaman huillangapac rinata munacuni.

¹² Chaica, cancunapish, ñucapish cric cashcamantami sinchi cric cangapac caishuc chaishuc yuyachinacunata munani.

¹³ Cuyashca criccuna, shuctac llactacunapi huillashpa criccunata tandachishca shina, cancunapac llactapipish tandachingapacmi tauca cutin cancunata ricugrinata munarcani. Shina cashpapish, imapish jarcaicuna tiyashcamantami mana ricugri pudircani. Chaitami yachachun munani.

¹⁴ Ñucaca griegocunamanpish, mana griegocunamanpish, yachaccunamanpish, mana yachaccunamanpish huillanami cani.

¹⁵ Chaimantami Roma pueblopi causac cancunamanpish alli huillaita huillana yuyailla cani.

Alli huillaica poderyuc cashcamanta

¹⁶ Alli huillaica maijanpish cricta quishpichingapacmi poderta charin. Chaica, puntaca israelcunatami, quishpichinga. Shinallatac mana israelcunatapish quishpichingami. Chaimantami alli huillaimantaca mana pingani.

¹⁷ Chai alli huillaimi crishcallamanta Dios-huan alli tucushcata, cashcata ruhuac cashcata ricuchin. Chaica, Dios quillcachishcapica: «Runaca crishcallamantami causanga» ninmi.

Runacuna juchayuc cashcamanta

¹⁸ Diosca jahua pachamantami paita mana cazuccunaman, millaita ruhuaccunaman pai piñarishcata ricuchin. Paicunaca mana allita ruhuashpami, cashcata ruhuanata jarcancuna.

¹⁹ Diosmanta yachanataca tucuimi yachancuna. Chaitaca Diosllatacmi ricsichirca.

²⁰ Cai pacha callarimanta pachami, Diosta mana ricushpapish, pai ruhuashcacunata ricushpaca, paica poderyuc cashcata, Diosllatac cashcata yachancuna. Chaimanta chai runacunaca: “Mana ricsishcanichu” mana ni pudincunachu.

²¹ Diosta ricsishpapish, mana Diosta shinachu alli nircacuna, mana pagui nircacunachu. Ashtahuanpish yangallata yuyashpami, paicunapac shunguca imata mana entendic tucurca.

²² Yallita yachac tucusha nishpapish, yuyai illaccunami tucushca.

²³ Huiñaita causac, sumaimana Diosta alli nina shinaca, tucuriclla runaman, volac animalman, aisarishpa puric animalman, chuscu chaquiyuc animalman riccha dioscunatami adorarca.

²⁴ Chaimantami paicunapac shungu munashcata ruhuachun Diosca saquishca. Chashna saquicpimi, caishuc chaishuc-huan pingaipac, millana juchacunata ruhuarca.

²⁵ Paicunaca cashcata nic huillashcata saquishpami, llulla huillashcata catincuna. Diosta cungurishpa, alli ninapac randica, pai ruhuashcacunatami cungurishpa adorancuna. Diosllami huiñaita alli nishca cana can. Chashna cachun.

²⁶ Chaimantami Diosca pingaipac juchacunata ruhuachun saquirca. Shina saquicpimi, huarmicunaca carihuan chayarinata saquishpa, huarmipura chayarinacurca.

²⁷ Caricunaca huarmihuan chayarinata saquishpami, caripura nina japiric shina munaihuan pingaipac juchacunata ruhuarca. Caishuc chaishuc pingaipac juchacunata ruhuashcamantami paicunapac cuerpopi llaquita apancuna.

²⁸ Diosca, paimanta yachanata mana munacpimi, manapish caipaccunata ruhuachun, paicunapac yuyaipi millai junda cachun saquirca.

²⁹ Chaimantami millaita ruhuana yuyailla cancuna. Mapacunallata ruhuancuna, envidiancuna, huañuchincuna, piñanacuncuna, llullancuna, huashalla rimanacuncuna, tucui imapish millaita ruhuancuna.

³⁰ Shuccunata mana alli nishpa rimancuna, Diostapish piñancuna, pitapish yangapi churashpa rimancuna, jatun tucuncuna, pi mana ruhuashca millaita ruhuancuna, taita mamata mana cazuncuna,

³¹ yuyai illac tucuncuna, ari nishpapish mana pactachincuna, pitapish mana cuyancuna, pitapish mana llaquincuna, mana perdonancuna.

³² Chashna causaccunata Dios taripashpa llaquichigricushcata yachashpapish, chaicunallatatac ruhuashpami catincuna. Shinallatac shuccuna chaita ruhuacta ricushpacarin “allimi” nincunami.