PROVERBIOS 9 - Dios Rimashcata Quillcashcami

Alli yachaimanta, yuyaita mana charinamanta

¹ Alli yachaimi huasita allichishpa sinchiyachirca. Canchis pilarcunatapish paillatacmi labrarca.

² Shinallatac micuna mizapi churangapacpish, animalcunata huañuchishpa, vinotapish chapurca.

³ Quipaca paita servic huarmicunatami jatun pueblo muyundi pirca jahuamanta cayachun cachan. Paicunaca:

⁴ «Maijan yuyai illaccuna caiman shamuichic» nircami. Cutin mana entendiccunataca:

⁵ «Ñuca micunata micucushpa, ñuca chapushca vinotapish ubiac shamuichic.

⁶ Yuyai illac causaita saquishpaca causanguichicmi. Alli yuyaihuan purina ñanpi purichi» nircami.

⁷ Burlashpa asic runata cunashpa rimacca pingaipimi taririn. Diosta mana manchac runata jarcashpa rimacca shucpac rimanami tucun.

⁸ Burlashpa rimaric runataca ama jarcashpa rimaichu. Paica piñaringami. Chaipac randica yuyaisapa runata alli tucuchun rimai. Paica canta cuyangami.

⁹ Yachaisapa runaman yuyaita cungui. Paica ashtahuan yuyaisapami tucunga. Cashcatatac ruhuac runata yachachi. Paica ashtahuan yachacmi tucunga.

¹⁰ Alli yachaipac callaricca Mandac Diostaracmi manchana. Alli yuyaiyuc cangapacca jucha illac Diostaracmi ricsina.

¹¹ Ñucamantami can causana punzhacunapish ashtahuan miranga. Can causana huatacunapish yapachishcami canga.

¹² Yachaisapa cashpaca, chaica canllamantacmi alli canga. Burlashpa asic cashpaca, canllatacmi llaqui tucungui.

¹³ Yuyai illac huarmica imatapish rimaric, mana yachac, pingaita mana charic huarmimi.

¹⁴ Paica pueblo patapi tiyac paipac huasi pungupimi shuc bancopi tiyacun.

¹⁵ Chaica, paipac huasi lado ñanta pasaccunata cayangapacmi chaipi tiyacun.

¹⁶ Pai cayashpaca: «Maijan yuyai illaccuna, caiman shamuichic» ninmi. Cutin mana entendiccunataca:

¹⁷ «Shuhuashca yacuca mai sumacmi. Tandata pacallapi micunaca mai mishquimi» ninmi.

¹⁸ Ashtahuanpish chaiman riccunaca chaipi achca huañushcacuna cashcataca mana yachanchu. Chaiman cayashcacunaca Seol ucupimi.