PROVERBIOS 7 - Dios Rimashcata Quillcashcami

Cullquimanta huainayac huarmimanta

¹ Ñuca huahualla, ñuca yuyaita cushpa rimashcacunata cazushpa causangui. Ñuca mandashcacunataca valishcata shina yuyaipi charingui.

² Ñuca mandashcacunata cazushpa causashpaca causanguimi. Ñuca yachachishcataca cambac ñahui santa luzta shina cuidangui.

³ Chai yachachishcataca maqui dedopi huatashca shina, tablapi quillcashca shina shungupi charingui.

⁴ Alli yachaitaca: “Canca ñuca panimi cangui” niyari. Alli yuyaitaca: “Ñuca familiami cangui” niyari.

⁵ Chai alli yachachishcacunaca shucpac huarmimanta, mana ricsishca huarmi mishquillata rimashpa inquitanamantapish cuidangami.

⁶ Ñuca huasi ventanamantami yuyai illac tauca mosocunata ricurcani.

⁷ Chai yuyai illac mosocunapurapimi shuctac yallita yuyai illac mosota ricurcani.

⁸ Chai mosoca plaza esquina cuchuta rishpami chai huarmipac huasiman chayarca.

⁹ Paica ña chishi amsayagricucpimi, tuta rirca.

¹⁰ Chai huarmica cullquimanta huainayac huarmi shina churanata churarishcami, inquitana yuyaihuan tupangapac llucshirca.

¹¹ Chai huarmica piñanacuipi churac, mana pingac huarmimi. Huasipica mana tiyarinchu.

¹² Inquitangapacmi, maijan cutinca ñancunapi, plaza esquinacunapi shuyacun.

¹³ Chai huarmica chai mosota japishpami mucharca. Shinallatac imata mana pingashpami:

¹⁴ “Dios-huan alli tucungapacmi animalta huañuchishpa cusha nishcataca cunan pactachircani.

¹⁵ Chaimantami canta tupangapac llucshimurcani. Cambac ñahuita ricunayachishpami, utca mashcac shamushpa, cunanca tupani.

¹⁶ Ñuca camataca Egiptomanta apamushca lino catahuanmi sumacta allichimurcani.

¹⁷ Mishquilla ashnacuc mirrahuan, aloehuan shinallatac canelahuanmi mishquillata ruhuarcani

¹⁸ Shamuilla, pacaringacaman cuyanacushun. Yallita cuyanacushpa cushicungapac shamui.

¹⁹ Ñuca cusaca mana huasipichu, caru llactamanmi rirca.

²⁰ Mochila cullquita apashpami rirca. Quilla tucucpimi, huasimanca shamunga” nirca.

²¹ Mishquilla rimaicunahuanmi ari nichirca. Sumac shimicunahuanmi inquitarca.

²² Paica ari nishcahuanmi catishpa rirca. Huagra huañungapac ric shina, yuyai illac runa prezu japi tucushpa, llaqui tucungapac ric shinami rircalla.

²³ Shinallatac paipac huicsata flecha pasangacaman shina, urpi linchipi japi tucungacaman ric shinami rirca.

²⁴ Cunanca huahuacuna uyaichic. Ñuca yuyaita cushpa rimashcacunataca alli entendichi.

²⁵ Chai huarmi purina ñantaca, ama purinata yuyanguichu. Chai ñanta rishpa ama pandaringuichu.

²⁶ Paica taucacunatami pandachishpa huañuchishca. Chai huarmica mana yupaipactami huañuchishca.

²⁷ Chai huarmipac huasica Seolman apac ñanmi. Chai ñanca huañushcacunapacman chayachicmi.