PROVERBIOS 6 - Dios Rimashcata Quillcashcami

Garante tucuna mana alli cashcamanta

¹ Ñuca huahualla, can maijanpac garante tucushpaca mana ricsishca runapac randimi debiyuc tucushcangui.

² Chaita ruhuashca cashpaca, cambac shimillahuantacmi pandarishcangui. Cambac rimashcallahuantacmi, tucllapi japi tucushca shina saquiringui.

³ Ñuca huahualla, chashna cambac ricsishca runapac maquipi urmashpa llaqui tucushcamanta cachariringapacca caita ruhuai: Paipacman rishpa, paipac ñaupapi cumurishpa allichichun mañai.

⁴ Ama sueñuichu, cambac ñahui sueñunayachichunca ama saquichu.

⁵ Shinallatac tarugata huañuchicpac maquimanta cachariric shina, utca cachariri. Linchimanta urpi llucshishpa ric shina utca cachariri.

⁶ Quilla runacunalla, hormigata ricui. Hormiga imata ruhuacta ricushpa, yachaisapa caiyari.

⁷ Hormigaca mandactapish, mayoraltapish, amotapish mana charinchu.

⁸ Shina cashpapish usyai quillacunapi, cosechana punzhacunapimi micunata tandashpa huacaichincuna.

⁹ Quilla runalla, ¿ima horascamantac siricugringui? ¿Ima horastac riccharigringui?

¹⁰ Ashtahuan sueñushpa, samarishpa, maquicunata cruzashpa siricunguilla.

¹¹ Chashna siricucpimi, huaccha punzhacunaca ñanta puric runa shina shamunga. Shinallatac imapish illac punzhacunaca macashpa shuhuac runa shinami shamunga.

¹² Millaita ruhuac mana pingac runaca mana allillata rimashpami purin.

¹³ Chai runaca ñahuita quimllac, chaquita cuyuchishpa, maqui dedohuan señata ruhuacmi can.

¹⁴ Paipac shungupica mana allita ruhuana yuyaimi tiyan. Tucui causaipimi ima llaquita ruhuanallata, piñanacuipi churanallata yuyarishpa purin.

¹⁵ Chaimantami cungailla jatun llaquica japinga. Shuc ñahui quimllaillapimi chingaringa. Paica imata mana ruhuai pudingachu.

¹⁶ Mandac Diosca cai sucta juchatami piñan. Canchisniqui juchatacarin yallitami millanayachin:

¹⁷ Jatun tucushpa puricta, llulla calluta, mana faltayuc runata huañuchishpa yahuarta jichacta,

¹⁸ shungupi millaillata ruhuanata yuyacta, mana allita ruhuangapac callpacta,

¹⁹ manapish yachashpa llullashpa huillacta shinallatac huauquindipura piñanacuipi churactami yallita piñan.

Huainayac huarmita rimashcamanta

²⁰ Ñuca huahualla, cambac taita mandashcata pactachingui. Cambac mama yachachishcata ama cungaringuichu.

²¹ Chaicunataca cambac shungupi huacaichishpa puringui. Cungapi huallcata churarishca shina puringui.

²² Chaicunaca can maita ricpipish allitami pushanga. Can sueñucucpipish cuidangami. Riccharicpipish cambac yuyaipimi rimacunga.

²³ Chai mandashcaca lámpara shinami. Yachachishcaca luz shinami, cunashpa rimashcacunaca causaiman apac ñan shinami.

²⁴ Chaicunaca, mana alli huarmimanta jarcangami. Shucpac huarmi mishquilla rimashcamantapish anchuchingami.

²⁵ Chai huarmi sumac cacpipish, ama shungupi munanguichu. Paipac sumac ñahuihuan cambac shunguta shuhuachunpish ama saquinguichu.

²⁶ Cullquimanta huainayac huarmihuan puric runaca, pitishca tanda shinami saquiringa. Cusayuc huarmihuan puric runaca paipac valishca causaitami chingachin.

²⁷ Shuc runa ninata micllashpa charicucpica, ¿paipac churanacunaca manachu rupanga?

²⁸ ¿Runaca mana rupashpa nina jahuata puringachu?

²⁹ Maijanpish shucpac huarmihuan purishpaca chashnallatacmi tucun. Maijanpish chashna chayarishpaca, llaquita apangatacmi.

³⁰ Maijanpish yarcaimanta micunata shuhuashpa micucpica, mana piñanchu.

³¹ Ashtahuanpish shuhuacpi japi tucushpaca, canchis-huan yallitami cutichinga. Paipac huasipi charishcatapish tucuimi cunga.

³² Ashtahuanpish shucpac huarmihuan chayarinacucca alli yuyaitaca mana charinchu. Chaita ruhuashpaca paipac causaitami chingachin.

³³ Chai runaca macashpa chugrichishca, pingaichishcami canga. Chai pingaichishcataca mana cungaringachu.

³⁴ Cusaca huarmita celashpami yallita piñarin. Llaquichina punzha japishpaca, cusaca manatac perdonangachu.

³⁵ Alli tucusha nishpa imata cucucpipish, mana chasquingachu. Ima achca valishcata cusha nicpipish, manatac perdonangachu.