PROVERBIOS 5 - Dios Rimashcata Quillcashcami

Huainayanamanta cuidarina cashcamanta

¹ Ñuca huahualla, ñuca alli yachaipi yuyaita churangui, shinallatac alli entendichishcata uyangui.

² Chaica ñuca alli yuyaita cushcata cazungapac, cambac shimihuanpish allita rimangapacmi chashna uyana cangui.

³ Huainayac huarmipac shimica bunga mishqui llucshicuc shinami. Pai rimashcaca aceitetapish yalli ñutunllami.

⁴ Ashtahuanpish quipataca ajenjotapish yalli jayac, ishcai ladoman filoyuc espada chugrichic shinami tucun.

⁵ Paipac chaquicunaca huañuiman, paipac purishcaca Seolmanmi pushacun.

⁶ Paica causaiman rina ñanta rinataca mana munanchu. Paipac ñan maiman apacushcatapish mana yachanchu. Mana allita ruhuacushcatapish mana yuyarinchu.

⁷ Huahuacuna, cunanca ñucata uyaichic. Ñuca yachachishpa rimashcataca ama cungaringuichu.

⁸ Chai huainayac huarmimanta anchuri. Paipac huasi pungumanpish ama cuchuyanguichu.

⁹ Pacta can tauca huata trabajashcata mana llaquic shuctaccunaman cushpa, can charishcacunata chingachinguiman.

¹⁰ Pacta cambac fuerzahuan trabajashcataca mana ricsishcacuna mana nicta micunman. Pacta can trabajashpa charishcacunaca mana ricsishca runapac huasipi jundagrinman.

¹¹ Quipaman cambac cuerpo yuyacyacpi, causai tucurimucpica, yallita llaquiringuimi.

¹² Chashna Llaquirishpa pacta: “¡Ima nishpatac yuyaita cushcatapish, cunashpa rimashcatapish ñuca shungupi mana huacaichircani!

¹³ Ñuca yachachiccuna yachachishpa rimacpipish, mana uyasha nircanichu. Ñucata yachachishcataca mana entendircanichu.

¹⁴ Ñuca llactapi causaccunapac chaupipipish, tandanacushcacunapac chaupipipish tucuilaya llaquicunahuanmi cashcani” nicunguiman.

Quiquin huarmihuan cushicunamanta

¹⁵ Quiquinpac yacuta huacaichina jundumanta ubiangui. Cambac jundullaman tucyacuc yacuta ubiangui.

¹⁶ Cambac jundu yacutaca ama ñancunapi tallichu. Cambac callpac yacutaca ama plazacunapi tallichu.

¹⁷ Chai yacuca cambacllami. Ama shuccunamanpish ubiachichu.

¹⁸ Cambac jundumanta llucshic yacuca bendiciashca cachun. Huambrarac cashpa cazarashca quiquin huarmihuan cushicungui.

¹⁹ Paica llambuclla sumac taruga shina, cushilla gacela nishca shina sumacmi. Paipac chuchucunapish huiñaita cushichichun. Paipac cuyaihuanca tucui causaipi cushicungui.

²⁰ Ñuca huahualla, ¿ima nishpatac shucpac huarmitaca cuyangui? ¿Ima nishpatac shucpac huarmipac chuchucunapi ucllaringui?

²¹ Mandac Diosca runacunapac causaita ricucunmi. Tucui imata ruhuacucpipish yachanmi.

²² Diosta mana manchactaca pai mana allita ruhuashcacunallatacmi llaquichinga. Pai ruhuashca juchallatacmi tuclla shina japishpa urmachinga.

²³ Paica mana yachachishca cashcamantami huañunga. Yallita yuyai illac shina, cashcamantami chingaringa.