PROVERBIOS 4 - Dios Rimashcata Quillcashcami

Shuc taita cunashcata uyana cashcamanta

¹ Huahuacuna, shuc taita yachachishcata uyaichic. Allita entendishpa causangapac alli uyaichic.

² Ñucaca alli yachaitami cancunamanca cuni. Chaimanta ama cungarishpa saquichicchu.

³ Ñucapish ñuca taitapac cuyashca churi, ñuca mamapac shuclla huahua shina yallita cuyanami carcani.

⁴ Ñuca taita yachachishpaca: “Ñuca cunashpa rimashcacunata cambac shungupi huacaichingui. Ñuca mandashcacunata cazushpa causashpaca causanguimi” nircami.

⁵ ¡Alli yachac caiyari! ¡Allita entendiyari! Ñuca rimashpa yachachishcacunataca ama cungaringuichu, ama saquinguichu.

⁶ Alli yachaitaca ama saquichu. Alli yachaimi huacaichinga. Paita cuyacpica, canta cuidangami.

⁷ ¡Tucuimanta yallica alli yachac canami ashtahuan alli! ¡Allita yachacuiyari! Tucui charishcacunamanta yallica allita entendinatami munana cangui.

⁸ Chai alli yachaita jatunyachicpica, cantapish jatunyachingami. Paita can ucllaricpica, cantapish alli ningami.

⁹ Cambac umapica sumac coronatami churachinga. Sumaimana coronatami cunga» nishpami yachachic carca.

¹⁰ Ñuca huahualla, ñuca yuyaita cushpa rimashcacunata chasquingui. Shina chasquicpica, can causana huatacunatami mirachinga.

¹¹ Cantaca allita yachaccunapac, allita ruhuaccunapac ñantami pushashcani.

¹² Can chai ñanta puricpica, ima mana jarcangachu. Callpashpapish mana mitcaringuichu.

¹³ Alli yachaitaca chasquingui ama saquinguichu, chai yachaitaca alli huacaichingui. Chaimi cambac causaica.

¹⁴ Diosta mana manchaccuna purina ñanta ama puringuichu. Millaita ruhuaccunapac ñanpipish ama chaquita churanguichu.

¹⁵ ¡Chai ñanta rinataca cuidaringui! ¡Chai ñanmanta anchurishpa pasanguilla!

¹⁶ Paicunaca ima millaita mana ruhuashpaca, mana sueñuncunachu. Pitapish mana pandachishpaca, sueñuitapish mana charincunachu.

¹⁷ Paicunapac micuna shinaca mana allita ruhuanami. Ubiana vino shinaca, shuccunata yallita llaquichinami.

¹⁸ Ashtahuanpish cashcata ruhuaccunapac ñanca achicyamucucmanta chaupi punzhacaman achicyacuc luz shinami.

¹⁹ Diosta mana manchaccunapac ñanca pura tuta shina, imapi mitcaricushcatapish mana yachancunachu.

²⁰ Ñuca huahualla, ñuca yachachishpa rimashcacunata, ñuca yuyaita cushcacunatapish alli uyaiyari.

²¹ Cai alli yachachishcamantaca ama caruyanguichu. Cambac shungupi huacaichingui.

²² Cai alli yachaita chasquiccunamanca causaitami cun. Shinallatac cambac tucui cuerpopac jambimi can.

²³ Tucuimanta yallica cambac shunguta cuidangui. Shungumantami causaica tiyan.

²⁴ Cambac shimihuan mana allita rimanata jarcaringui. Cambac shimihuan llullanata cuidaringui.

²⁵ Mai ñanta ricushcata cambac ñahuihuan alli ricungui. Cambac ñahuihuanca ñaupata alli chapangui.

²⁶ Can saruna ñantapish ima shina cacta alli ricungui. Imata ruhuashpapish allita ruhuangui.

²⁷ Alli ñanmantaca alli ladomanpish, lluqui ladomanpish ama ladoyanguichu. Cambac chaquitaca mana allimanta anchuchinguichu.