PROVERBIOS 31 - Dios Rimashcata Quillcashcami

Jatun mandac Lemuel rimashcamanta

¹ Caicunaca jatun mandac Lemuel rimashcami. Dios huillashcata paipac mama paiman yachachishpaca:

² ¡Ñuca huahualla! ¡Ñuca huicsamanta llucshishca huahualla! ¡Ñuca munashca huahualla!

³ Cambac fuerzataca ama huarmicunapi tucuchichu. Jatun mandaccunata tucuchic ñanpica ama causanguichu.

⁴ Lemuel-lla, jatun mandaccunaca mana vinota ubianchu. Mandaccunaca sidrataca mana ubianachu.

⁵ Pacta chaicunata ubiashpa mandashcacunata cungaringuiman. Pacta llaquilla causaccunaman allita ruhuanata cungaringuiman.

⁶ Sidrataca ña huañugricuccunaman cui. Vinotaca llaquirishcacuna ubiachun saquichilla.

⁷ Chaita ubiashpami huaccha cashcatapish, llaquilla cashcatapish mana ashtahuan yuyaringa.

⁸ Mana rimari pudiccunamanta rimariyari. Imata mana ruhuai pudiccunata juchanchishpa llaquichigricucpi misaiyari.

⁹ Cambac shimihuan rimarishpa cashcata ruhuashpa taripaiyari. Huacchacunatapish, imata mana chariccunatapish misaiyari.

Alli huarmita alli nishcamanta

¹⁰ Yuyaisapa huarmitaca ¿pitac tari pudingayari? Chashna huarmica achic nicuc sumac rumitapish yalli valimari.

¹¹ Paipac cusapish paipi shunguta churashpami causan. Paihuanca ima illacpish mana causangachu.

¹² Chai huarmica punzhantami llaquichinapac randica, allita ruhuashpa causan.

¹³ Millmata, linota mashcashpami cushicushpa paipac maquihuan imatapish ruhuan.

¹⁴ Jatun barco catunahuan shamuc shinami micunata apashpa carumanta chayamun.

¹⁵ Manarac achicyacpi jatarishpami, paipac tucui familiamanpish, paita servicmanpish micunata caran.

¹⁶ Alli allpata ricushpa randishpami, paipac maquihuan uvas chagrata ruhuan.

¹⁷ Sinchita chumbillishpa, paipac rigrata sinchiyachishpami imatapish ruhuan.

¹⁸ Ima shina caturicucta ricuranmi. Paipac lamparapish tutaca mana huañunchu.

¹⁹ Shuc maquihuanca sicsicta, caishuc maquihuanca piruruta muyuchishpami puchcacun.

²⁰ Huacchacunamanpish, imata mana chariccunamanpish maquita chutashpami caran.

²¹ Paipac tucui familiacunami racu churanacunahuan purin. Chaimantami rasucpipish paipac familia chirichinataca mana manchan.

²² Pullucunatapish paillatacmi ruhuan. Paipac churanacunapish ashtahuan alli linota ahuashca yana puca churanami.

²³ Pushac yuyaccunahuan paipac cusa pueblo pungupi tiyaricpica tucuimi ricsin.

²⁴ Baitacunata ahuashpami catun. Catushpa, randishpa puriccunamanmi chumbicunatapish achcata catun.

²⁵ Paica sumac churanata churarishca shinami fuerzatapish charin, alli nishcapish can. Quipa punzha ima tucunatapish mana manchashpami asin.

²⁶ Paica alli yachac cashpami imatapish riman. Shinallatac cuyaihuanmi yachachin.

²⁷ Huasipi imapish alli cachunmi ricuran. Paica mana yanga micushpalla causanchu.

²⁸ Paipac huahuacuna jatarishpaca: “Cushicui mamita” nincunami. Paipac cusaca:

²⁹ “¡Achca huarmicunami allita ruhuan. Shina cashpapish canmi tucui paicunata yalli alli cangui!” ninmi.

³⁰ Ñahuilla sumac cashpaca inquitanllami. Ricuilla sumac cashcapish yangallami can. Ashtahuanpish Mandac Diosta manchac huarmimi alli nishca canga.

³¹ ¡Paipac maquihuan imata ruhuashcamantaca paimanpish ima allicunata cuichicyari! ¡Pai imata ruhuashcataca pueblo pungucunapi alli nichicyari!