PROVERBIOS 30 - Dios Rimashcata Quillcashcami

Agur rimashcamanta

¹ Jaquepac churi Agur Itielta, Ucalta rimashpaca:

² Ñucaca tucui runacunamanta yalli mana entendicmi cani. Runacunapac alli yuyaitaca mana charinichu.

³ Ñucaca alli yachaitaca mana yachacushcanichu. Jucha illac Diosmantapish mana yachanichu.

⁴ ¿Pitac jahua pachaman rishpa, cutimushcayari? ¿Pitac maquipi huairata tandachishcayari? ¿Pitac yacuta montonashpa chari pudishcayari? ¿Pitac cai pachataca muyundita ruhuashcayari? ¿Paica ima shutitac canyari? ¿Paipac churipac shutitaca yachanguichu?

⁵ Mandac Dios rimashca shimicunaca jucha illacmi. Diosca paipi shunguta churaccunapac jarcarina escudomi.

⁶ Dios rimashcata ama yapachinguichu. Pacta canta rimanman. Pacta canllatac llullac llucshinguiman.

⁷ Ñuca Dioslla, cai ishcaillatami mañani. Chaitaca ñuca manarac huañucpi cuiyari.

⁸ Yangalla yuyaitapish, llullanatapish ñucamanta anchuchiyari. Shinallatac chayucyana yuyaitapish, huacchayana yuyaitapish ama cuichu.

⁹ Pacta huicsa pactata micushpa, canta cungarishpaca: «¿Mandac Diosca pitacyari?» niman. Pacta huacchayashpa shuhuashpa, ñuca Diospac shutita mana alli niman.

¹⁰ Ama servic runata juchanchishpa paipac amoman huillanguichu. Pacta canta maldiciashpa, mana alli ninman.

¹¹ Maijan huahua huahuacunaca paicunapac taitata maldiciashpa, paicunapac mamata mana bendicianchu.

¹² Maijan huahua huahuacunaca juchacunata manarac saquishca cashpapish paicunapac yuyaillapi jucha illaccunami canchic nincunami.

¹³ Maijan huahua huahuacunaca jatun tucushpami shuccunataca piña ñahuihuan ricuncuna.

¹⁴ Maijan huahua huahuacunapac ñaupa quirucunaca espadata shina, cuchu quirucunaca cuchillota shinami can. Paicunaca llactapi causac huacchacunata, runacunapurapi yangalla gentecunata lambic shina tucuchingapacmi causancuna.

¹⁵ Sanguijuela curuca ishcai ushicunatami charin. Paicunaca: «Carailla, carailla» nicunmi. Huicsapi jaicapi mana jundachicca quimsami tiyan. Chuscuniquica jaicapi mana “¡Chailla!” ninchu.

¹⁶ Chaicunaca Seolpish, huahuata mana charic huarmipish, mashnata tamyacpipish yacuta mana sacsac chaquiclla allpapish, shinallatac ninapish jaicapi mana: «¡Chailla!» ninchu.

¹⁷ Taitata burlashpa asic churica mama yachachishcatapish yangapimi churan. Chai churipac ñahuitaca yacu huaicupi causac angacuna surcuchun. Jatun angapac huahuacuna micuchun.

¹⁸ Ñucaca cai quimsacunatami mana yachai pudini. Chuscuniquitapish mana entendinichu:

¹⁹ Jatun anga maita huairata rishcata, quingraita maita culebra rishcata, mama cucha yacupi maita barco rishcata, carihuan manarac chayarishca solterapi cari chayarishcatami mana yachai pudini.

²⁰ Huainayac huarmica micushpa, shimita picharishpaca: «Ima mana allita mana ruhuashcanichu» ninmi.

²¹ Cai quimsatami cai pachapi causaccunaca manchashpa chucchuncuna. Chuscuniquitacarin manchashpa llaquita mana apai pudincunachu:

²² Servic runa mandac tucucpi, mana entendic runa huicsa pactata micucpi,

²³ tucui mashna mana ricunayachishca huarmi cazaracpi, servishpa causac huarmi paipac amapac tucui charishcacunata quichucpimi mancharincuna.

²⁴ Cai pachapica chuscu uchilla animalcunami tiyan. Chaicunaca yachaisapa runacunatapish, yalli yachaisapacunami.

²⁵ Hormigacunaca mana sinchicuna cashpapish, usyai punzhacunapimi micunata tandancuna.

²⁶ Conejocunaca mana sinchicuna cashpapish, jatun rumi ucupimi huasita charincuna.

²⁷ Langostacunaca jatun mandacta mana charishpapish, tucui mashnami tandanacushpa llucshincuna.

²⁸ Maquihuan japinalla arañapish, jatun mandac mandana ucupimi causan.

²⁹ Sinchita puriccunaca quimsami tiyan. Chuscuniquicarin sumactami purin.

³⁰ Tucui animalpurapica leonmi ashtahuan sinchi. Paica imata ricushpapish mana huashaiman cutinchu.

³¹ Cari cari gallopish, cari chivopish, pi mana cariyaipac jatun mandacpish tiyanmi.

³² Yuyai illac shina jatun tucushca cashpa, mana cashpaca pitapish llaquichinata yuyarishca cashpaca, shimipi maquita churashpa jarcarichun.

³³ Maijanpish lecheta yallita cuyuchishpaca mantequillatami llucchin. Singata yallita quic nishpaca yahuartami llucchin. Pihuanpish yallita piñarishpaca, piñanacuipimi churan.