PROVERBIOS 3 - Dios Rimashcata Quillcashcami

Cazuchun rimashcamanta

¹ Ñuca huahualla, ñuca yachachishcacunata amatac cungaringuichu. Ñuca mandashcacunataca cambac shungupi huacaichingui.

² Shina ruhuashpami unai punzhacunata, unai huatacunata cushilla causangui.

³ Cashcata nina, shinallatac llaquic canaca, jaicapi ama anchurichun. Cungapi churarishca shina, shungupi quillcashca shina, chai yuyailla puringui.

⁴ Chashna cashpami, Diospac ñaupapipish, runacunapac ñaupapipish alli nishca cangui.

⁵ Mandac Diostaca tucui shunguhuan cringui. Cambac yachaipica ama shunguta churanguichu.

⁶ Imata ruhuashpapish Diosta yuyaringui. Paimi cantaca alli ñanta pushanga.

⁷ Ama canllatac yachaisapa cashcata yuyanguichu. Ashtahuanpish Mandac Diosta manchashpa, mana allimanta anchuringui.

⁸ Shina ruhuacpica, cambac cuerpopacca jambic, cutin tullucunapacca sinchiyachicmi canga.

⁹ Mandac Diostaca cambac charishcacunahuan, punta pucushca granocunahuan alli ningui.

¹⁰ Shina ruhuacpimi, granota huacaichina ucupipish yallita jundanga. Llullu vinopish yalli yalli tiyanga.

¹¹ Ñuca huahualla, Mandac Dios llaquichicpica, ama yangalla cashcata yuyanguichu. Alli tucuchun llaquichicpipish, ama piñaringuichu.

¹² Mandac Diosca cuyashpami, shuc taita paipac churita cuyashpa llaquichic shina llaquichin.

¹³ Cai alli yachaita tarishpa, allita entendicca cushicunmi.

¹⁴ Cai alli yachaica cullquitapish yalli valicmi. Cai alli yachaimanta japinaca valishca curitapish yallimi.

¹⁵ Valishca perlastapish yalli valicmi. Cai yachaihuanca ima sumaccunahuanpish maita mana chimbapuraipacchu.

¹⁶ Alli maquipica unai huata causanatami charicun. Cutin lluqui maquipica charic tucunata, alli nishca canatami charicun.

¹⁷ Paipac ñancunaca sumac cushilla purina ñancunami.

¹⁸ Paita ucllarishpa causaccunamanca causaita cuc yura shinami can. Cai alli yachaita chariccunaca yallitami cushicun.

¹⁹ Mandac Diosca cai alli yachaihuanmi cai allpataca ruhuarca. Alli yuyaihuanmi jahua pachataca maita mana cuyuchipacta sinchita churarca.

²⁰ Tucuita yachac cashpami, jatun mama cuchatapish raquirca. Jahua pacha puyumantami tamyapish urman.

²¹ Ñuca huahualla, caicunataca yuyarangui. Mandashcatapish, cunashcacunatapish ama cungaringuichu.

²² Cambac almamanca causaita cunga. Cungapi churashca huallca shinami cushichinga.

²³ Shina cacpimi ñancunataca mana manchashpa puringui. Shinallatac cambac chaquipish mana mitcaringachu.

²⁴ Camapi siririshpapish mana manchanguichu. Ashtahuanpish siririshcahuanmi sumacta sueñungui.

²⁵ Cungailla canta llaqui japinatapish, shinallatac Diosta mana manchaccunata llaqui japicpipish, canca mana manchanguichu.

²⁶ Mandac Diosmi canhuan canga. Paimi cambac chaqui tucllapi urmagricucpipish cuidanga.

²⁷ Maijanta ayudana cacpi, ayudai pudishpaca ayudangui.

²⁸ Maijan imata mañacpi, mañacushcata maquipi charicushpaca: “Cutimugri, caya cushallami” ama ninguichu.

²⁹ Maijan canpi shunguta churashpa causacpica, ama paita llaquichinguichu.

³⁰ Canta ima millaita manapish ruhuacpica, ama paihuan piñanacunguichu.

³¹ Yallita llaquichic runa ima shina cacta ricushpa, ama canpish chashnallatac casha ninguichu. Pai imata ruhuashpa causacuctapish ama catinguichu.

³² Mandac Diosca millaita ruhuac runataca millanayachinmi. Ashtahuanpish cashcata ruhuac runahuanca tandarishpami causan.

³³ Mandac Diosca paita mana manchacpac huasitaca maldiciangami. Ashtahuanpish cashcata ruhuacpac huasitaca bendiciangami.

³⁴ Burlashpa asiccunataca Mandac Diospish burlashpa asingami. Ashtahuanpish yangallacunataca cuyangami.

³⁵ Yachaisapacunaca alli nishcami canga. Ashtahuanpish mana entendiccunaca pingaichishcami canga.