PROVERBIOS 29 - Dios Rimashcata Quillcashcami

¹ Cunashpa rimacpi, piñarishpa sinchi tucuc runataca cungailla llaqui japingami. Paitaca pi mana allichi pudingachu.

² Cashcata ruhuaccuna miracpica, tucuimi cushicuncuna. Ashtahuanpish Diosta mana manchaccuna mandacpica, gentecunaca llaquirishpami huacancuna.

³ Alli yachacunata munac runaca paipac taitata cushichinmi. Ashtahuanpish cullquimanta huainayac huarmihuan puricca tucui charishcatami yanga tucuchin.

⁴ Jatun mandacca cashcata ruhuashpa mandashpami, llactata sinchiyachin. Ashtahuanpish yallita impuestohuan gentecunata llaquichic mandacca llactatami tucuchin.

⁵ Paihuan apanacuc runata alli nic runaca chai runa purina ñanpi tucllata churac shinami.

⁶ Millaita ruhuac runaca pai ruhuashca millaillapitacmi tucllapi shina urman. Ashtahuanpish cashcata ruhuac runaca cushicushpami cantan.

⁷ Cashcata ruhuac runaca huacchacunatapish llaquinmi. Ashtahuanpish Diosta mana manchac runaca chai llaquina cashcata mana entendinchu.

⁸ Burlashpa asiccunaca pueblopi causaccunatami ninata japichic shina jatarichin. Ashtahuanpish yachaisapacunaca yallita piñarishcatapish allichinmi.

⁹ Yachaisapa runa yuyai illac runahuan piñanacushpaca, burlashpa asishca, piñashcallami canga. Imapish mana allichiringachu.

¹⁰ Pitapish mana llaquishpa huañuchiccunaca allita ruhuactaca mana ricunayachinchu. Ashtahuanpish allita ruhuac runacunaca paita cushichinatami munan.

¹¹ Mana entendic runa piñarishpaca pai ima munashcatami ruhuanlla. Ashtahuanpish yachaisapa runaca jarcarinmi.

¹² Shuc mandac llullashcata crishpa chasquicpica, tucui paita serviccunami Diosta mana manchaccuna tucunga.

¹³ Huaccha runapish, cullquita mañachishpa llaquichic runapish chashnallatacmi. Mandac Diosca chai ishcaimantacmi ñahuita cun.

¹⁴ Jatun mandac huaccha runata cashcata ruhuashpa mandashpaca paipac mandanataca huiñaitami sinchiyachin.

¹⁵ Varahuan macashpa yachachicpimi, huahuaca allita yachacunga. Ashtahuanpish imata ruhuachun saquicllapica mamatami pingaichinga.

¹⁶ Diosta mana manchaccuna miracpica, juchacunapish mirarinmi. Ashtahuanpish cashcata ruhuaccunaca paicuna llaquita apactami ricunga.

¹⁷ Cambac churita alli yachachicpica, cantaca samachingami. Shinallatac cambac causaipipish cushichingami.

¹⁸ Dios huillashcata mana pi huillacpica, quiquin munashcata ruhuashpami chingarin. Ashtahuanpish mandashcacunata pactachic runaca yallitami cushicun.

¹⁹ Servic runataca mana rimashpallachu allichina. Chai rimashcata entendishpapish mana cazunchu.

²⁰ ¿Mana alli yuyarishpa rimaric runata ricushcanguichu? Chai runapac randica, yuyai illac runami ashtahuan alli.

²¹ Amo paipac servicta uchillamanta pacha yallita cuyashpa huiñachicpica, quipamanca paimi amopac herenciata japinga.

²² Jahualla piñaric runaca piñanacuillapimi churan. Yallita piñaric runaca yalli juchacunatami ruhuan.

²³ Jatun tucuc runataca llaquimi japinga. Ashtahuanpish shungupi yangalla cac runaca alli nishcami canga.

²⁴ Shuhuac parte tucuc runaca paipac causaitami piñan. Ima shuhuashcata yachashpaca mana huillanchu.

²⁵ Manchashpa causac runaca tucllapimi urmanga. Ashtahuanpish Mandac Diospi shunguta churacca quishpiringami.

²⁶ Achcacunami mandactaca paicunaman allita ruhuachun mañancuna. Ashtahuanpish Mandac Diosmi ima shina cashcata ricushpa cun.

²⁷ Cashcata ruhuaccunaca mana allita ruhuac runataca millanayachinmi. Cutin Diosta mana manchac runaca allita ruhuashpa causaccunatami millanayachin.