PROVERBIOS 27 - Dios Rimashcata Quillcashcami

¹ Caya ima ruhuana cashcata ama nichu. Caya punzha ima tucuna cashcataca mana yachanguichu.

² Ama cambac shimihuan allimi cani nichu. Shuccuna canta alli nichun shuyangui.

³ Rumipish llashacmi. Tiyu allpapish llashacllatacmi. Ashtahuanpish mana entendic runa yallita piñarishcami chai ishcaicunata yalli llashac.

⁴ Yallita piñarishca runaca pitapish mana llaquishpa tucuchina yuyaillami. Imatapish charina yuyaihuan puric runapac ñaupapica ¿pitac shayari pudingayari?

⁵ Pacalla cuyanapac randica, ñahui ñahui rimana alli.

⁶ Cuyac runa rimashpa chugrichishcami ashtahuan alli. Ashtahuanpish piñashpa muchashcaca mana allichu.

⁷ Yallita micushca runaca bunga mishqui sinchiyashcatapish mana micunayachinchu. Ashtahuanpish yarcaihuan cac runamanca ima jayacpish mishquimi.

⁸ Quiquin huasita saquishpa caruyac runaca shuc urpi cuzhata shitashpa ric shinami.

⁹ Aceitepish, mishquilla ashnacucpish shungutami cushichin. Shuc ricsishca cunashcaca caishuc runapac shungutami cushichin.

¹⁰ Canhuan apanacuctapish, cambac taitahuan apanacuctapish ama cungaringuichu. Llaquihuan cashpaca ama cambac huauquipac huasiman ringuichu. Carupi causac huauquipac randica, cambac ladopi causaccunami ashtahuan alli.

¹¹ Ñuca huahualla, yachaisapa tucushpa ñuca shunguta cushichiyari. Shina cacpimi ñucata piñaccunamanca rimashpa cutichi pudisha.

¹² Yuyaisapa runaca maita ricushpa ima llaqui japigricucpica anchurinmi. Ashtahuanpish yuyai illac runaca rishpa llaquipi urmanllami.

¹³ Mana ricsishca runapac, mana ricsishca huarmipac garante tucuc runamanta pai mañashcata cutichingacaman churanatapish, shinallatac imacunatapish quichungui.

¹⁴ Tutamanta caparishpa allillachu cangui nishcaca llaqui tucuchun nishca shinallatacmi.

¹⁵ Tamya punzhacunapi shutuc huasipish, caparishpa rimaric huarmipish chashnallatacmi.

¹⁶ Chai huarmita jarcanaca huairata jarcana shinami. Mana cashpaca aceiteta alli maquihuan japina shinami.

¹⁷ Fierrotaca fierrollahuantacmi mulana. Runataca, runallatacmi alliyachin.

¹⁸ Higo chagrata cuidacca chai yuracunapi pucushcatami micunga. Amo munashcata ruhuac servicca alli nishcami canga.

¹⁹ Ima shinami ñucanchic yacuta ricucpi, llandu ricurin, chashnallatacmi shuc runa imalaya shungu cashcaca ricurin.

²⁰ Seolpish Abadonpish mana sacsanchu. Chai shinallatacmi runapac ñahuipish mana shaicun.

²¹ Cullquitaca pailapi churashpa, curitaca hornopi churashpami alli cashcataca ricun. Runa alli cashcaca shuccuna alli nicpimi yacharin.

²² Yuyai illac runaca cutana rumipi trigota cutac shina, cutin cutin tigrachishpa tacacpipish manatac entendingachu.

²³ Cambac ovejacuna ima shina puricucta ricurangui, cambac manada ovejacunataca alli ricushpa michingui.

²⁴ Ima charishcacunapish mana huiñaicamanchu. Coronapish mana huahua huahuacunacamanchu.

²⁵ Pambacunapi quihua huiñashpaca quihua pambacunami tucun. Lomacunamantami quihuataca tandachishca canga.

²⁶ Maltón ovejacunaca cambac churanata randingapac, cutin cambac cari chivocunaca allpata randingapacmi canga.

²⁷ Mama chivocunapac achca lecheca cambac, shinallatac cambac huasi ucupuracunapac, canta servic huarmicunapac micungapacmi can.