PROVERBIOS 26 - Dios Rimashcata Quillcashcami

¹ Rasuca mana usyai punzhacunachu, tamyapish mana cosecha punzhacunapacchu, ima allicunapish yuyai illac runapacca mana canchu.

² Zhutacuna atishpa ric shina, golondrina volac shinami, maldiciashcaca mana yanga shamun.

³ Chicoteca caballota macangapacmi. Frenoca burrota cazuchingapacmi. Varaca yuyai illac runata lomopi shitangapacmi.

⁴ Yuyai illac runa shina mana tucungapacca, ama pai shinallatac cutichinguichu.

⁵ Yuyai illac runa paipac yuyaipi yachacmi cani ama nichunca, pai ima shina cashca shinallatac rimangui.

⁶ Yuyai illac runata huillachun cachacca chaquita paquic shina, mana cashpaca ima mana allita ubiac shinami paillatac llaqui tucun.

⁷ Yuyai illac runamanca yuyaita cuc rimaicunaca suchu runapac chaqui paquirishpa yanga huarcuracuc shinami.

⁸ Yuyai illac runata alli ninaca rumita huaracapi huatac shinami.

⁹ Yuyai illac runapac shimipica yuyaita cuc rimaicunaca machashca runa cashapi taunallishpa mana nanaric shinami.

¹⁰ Yuyai illac yanga puric runacunata cullquimanta trabajachic runaca, flechata cacharishpa tucui mashnata chugrichic shinami.

¹¹ Allcu arcadashcata cutin micuc shinami, yuyai illac runaca paipac shungupi yuyarishcata cutinllatac ruhuan.

¹² ¿Paipac yuyaillapi yuyaisapami cani niric runata ricushcanguichu? Chaipac randica, yuyai illac runamantami imallatapish shuyana can.

¹³ Quilla runaca: «¡Leonmi ñanpi chapacun! ¡Canzhapica leonmi shayacun!» ninmi.

¹⁴ Bisagrapi pungu muyucuc shinami, quilla runaca paipac camapi caiman chaiman singucun.

¹⁵ Quilla runaca platomanta micunata paipac maquihuan shimiman apanatami quillacun.

¹⁶ Quilla runaca paipac shungupica alli yuyaita cuc canchis runacunatapish, yalli ashtahuan yachacmi cani yuyanmi.

¹⁷ Shuccunapac piñanacuipi satiricca, ñanta pasacuc allcuta ringripi japiric shinami.

¹⁸ Loco tucushpa ninata japichishpa, flechata cacharishpa huañuchic shinami,

¹⁹ paihuan apanacucta imatapish nishpa pandachin. Chai quipaca: «¡Asingapacllami chashna ruhuarcani!» ninmi.

²⁰ Yanta illacpica, ninapish huañunmi. Huashalla parlaccuna illacpica, piñanacuipish tucurinmi.

²¹ Carbonca brazasta ruhuangapacmi. Yantaca rupachingapacmi. Piñarishpa rimaric runaca piñanacuitami callarichin.

²² Huashalla parlac runa parlashcaca micuna shinami ucu huicsaman rinlla.

²³ Mana alli shunguhuan crinallata llullashpa parlashcaca cullquita yacuyachishpa mapata llucchishpa, barro mangapi saquishca shinami.

²⁴ Piñac runaca nic tucushpallami mishquillata riman. Ashtahuanpish shungupica pandachina yuyaillami puricun.

²⁵ Canhuan apanacuc tucushpa rimacpica, ama cringuichu. Chaica, paipac shungupica canchis jatun millanayai yuyaicuna jundami.

²⁶ Pai piñarishcata shimihuan pacacushpapish, pai mana allita ruhuashcaca tandanacuipimi ricuringa.

²⁷ Ucuta jutcuc runaca chaillapitacmi urmanga. Jatun rumita singuchicpica, paipac jahuallatatacmi shamunga.

²⁸ Llulla callu runaca llaquichishca runatami ashtahuan llaquichin. Crinallata llullashpa parlashcaca llaquipimi urmachin.