PROVERBIOS 25 - Dios Rimashcata Quillcashcami

Salomón yachachishpa rimashcacunamanta

¹ Cai yuyaita cuc rimaicunapish Salomón quillcashcallatacmi. Cai rimashcacunaca Judá llactata jatun mandac Ezequiaspac quillcaccuna copiashcami.

² Imata pacalla charinaca Diospac sumaimanami. Sumacta callarishpa ricunaca jatun mandacpac allimi.

³ Jahua pacha maicaman cactapish, cai pacha maicaman ucu cactapish, jatun mandaccunapac shungu imata yuyacushcatapish pi mana yachai pudinchu.

⁴ Cullquita yacuyachishpa mapata anchuchingui. Chashna anchuchicpimi, cullquita yacuyachic runamanca sumac imallacuna llucshinga.

⁵ Diosta mana manchac runata jatun mandacpac ñaupamanta anchuchingui. Shina anchuchicpimi, jatun mandacca cashcata ruhuashpa sinchiyanga.

⁶ Jatun mandacpac ñaupapi ama canllatac allimi cani ninguichu. Jatuncuna tiyarinapipish ama tiyaringuichu.

⁷ Mandacpac ñaupapi pingaihuan cumurinapac randica: «Caiman huichicui» ningacaman shuyanami ashtahuan alli.

⁸ Imatapish ricushpaca ama tigrai juezcunaman huillangapac ringuichu. Pacta shuctac huillac mana chashnachu nishpa canta pingaichinman.

⁹ Canta pi imata nicpipish, chaitaca paillahuan allichingui. Imata canlla yachashpaca ama piman huillanguichu.

¹⁰ Pacta can parlashcata maijan uyashpa pingaichinman. Pacta canta juchanchishpa pingaichishcapish, mana allichipac tucunman.

¹¹ Manarac llaqui tiyacpi, alli yuyarishpa rimarishcaca curi manzanapi cullquita churashpa, sumacta ruhuashca shinami.

¹² Imatapish uyaclla, yachaisapa runata jarcashpa rimac runaca curi zarcillo shina, ashtahuan alli curimanta ruhuashca sumac huallca shinami.

¹³ Tucuita pactachic huillacca huillachun cachacpacca, cosecha punzhapi chiri yacuta cushca shinami. Chai runaca paipac amopac causaitami samachin.

¹⁴ Jatun tucushpa imatapish cushami nishpa mana pactachic runaca tamya illac puyu huaira shinami.

¹⁵ Mandac piñaricpica, allimantallami cushichina. Sumac rimaicunaca tullutapish paquinllami.

¹⁶ ¿Bunga mishquita tarircanguichu? Tarishpaca pudishcallata micungui. Yallita micushpa arcadanguiman.

¹⁷ Vecinopac huasiman ama yallita ringuichu. Pacta canta mana ricusha nishpa piñai callarinman.

¹⁸ Maijanta yanga juchanchishpa huillac runaca martillo, espada, flecha shinami.

¹⁹ Llaqui punzhacunapi cashpa, mana cazuc runa ayudachun shuyanaca quiru paquirishca shina, chaqui quihuishca shinami.

²⁰ Llaquilla shungu runaman cantashpaca chiri punzhapi churanata quichushca shinami. Mana cashpaca chugri jahuapi vinagreta tallishca shinami.

²¹ Canta piñac runa yarcachicpica, micunata carangui. Yacunayaihuan cacpica, yacuta ubiachingui.

²² Shina ruhuacpica nina rupachic shinami pinganga. Mandac Diosca canmanca allicunatami cunga.

²³ Jahua ladota huaira shamushpaca, tamyatami apamun. Imatapish rimac runaca piñachishpami saquin.

²⁴ Imatapish rimarishpa yallita piñachic huarmihuan jatun huasipi causanapac randica, huasi azoteapi shuc cuchitupi causanami ashtahuan alli.

²⁵ Caru llactamanta alli huillaita huillac shamucca yallita yacunayachicucpi, chirilla yacu yaicuc shinami ruhuan.

²⁶ Cashcata ruhuac runa Diosta mana manchac runapac ñaupapi urmashpaca, tucyac yacu turuyashca, jundu yacu mapayashca shinami.

²⁷ Bunga mishquita yallita micunaca mana allichu. Quiquinllatac sumacmi cani ninapish mana allichu.

²⁸ Mana jarcarishpa utca piñaric runaca muyundi pirca urmashca pueblo shinami.