PROVERBIOS 24 - Dios Rimashcata Quillcashcami

—19—

¹ Mana allita ruhuaccunapac causaitapish, paicunahuan tandanacunatapish ama munanguichu.

² Paicunapac shungupica macanacunallatami yuyacuncuna. Paicunapac shimica mapacunallatami rimancuna.

—20—

³ Allita yachaihuanmi huasita shayachina. Alli yuyarishpami mana cuyuchipacta callarina.

⁴ Yachaihuanmi huasi ucucunapica sumaccunata, alaja charinacunata jundachina.

—21—

⁵ Sinchi runa canapac randica yuyaisapa runa canami ashtahuan alli. Yachacushca runapacca imapish mana llashacchu.

⁶ Jatun macanacuitaca alli yuyaihuanmi ruhuana. Alli yachaccuna cunacpimi, jatun macanacuitaca mishachinga.

—22—

⁷ Yuyai illac runamanca allita yachaica mana entendipacmi. Tandanacushca gentecunapica, mana rimai pudinchu.

—23—

⁸ Llaquichina yuyailla puric runataca millai yuyaiyuc runa ningacunami.

⁹ Yuyai illac runaca juchallatacmi yuyarin. Burlashpa asic runaca gentecunapac ñaupapica millashcami.

—24—

¹⁰ Llaqui punzhacunapi fuerza illac cashpaca, fuerza illacmi saquiringui.

—25—

¹¹ Huañuiman apashcacunata quishpichingui. Ña huañunalla chucchushpa puriccunatapish quishpichingui.

¹² Can: «Chaitaca manatac yachashcanichu» nicucpipish, ¿tucuipac shunguta pezashpa ricuc Diosca manachu yachanga? Cambac causaita ricuc Diosmi chaitaca yachan. Runacunamanca paicuna imata ruhuashca shinallatacmi cunga.

—26—

¹³ Ñuca huahualla, bunga mishquica allimi. Chaimanta japishpa micuilla. Sinchiyashca bunga mishquipish cambac shimipica mishquimi canga.

¹⁴ Chashnallatac cambac almapac allipac alli yachacuiyari. Chashna yachacucpica, shamuc punzhacunaca allimi canga. Can shuyacushcapish mana yangachu canga.

—27—

¹⁵ Diosta mana manchac runalla, cashcata ruhuac runapac carpataca ama shuhuac shina muyuichu. Paipac huasi ucupi ima tiyashcatapish, ama shuhuashpa apaichu.

¹⁶ Chaica, cashcata ruhuac runaca canchis cutin urmashpapish jataringallami. Ashtahuanpish Diosta mana manchaccunaca jatun llaquipimi urmanga.

—28—

¹⁷ Canta piñac runa llaquipi urmacpica, ama cushicuichu. Mitcaric shina pandaricpipish, shungullapi ama cushicuichu.

¹⁸ Pacta Mandac Dios chaita ricushpa cantapish mana alli ninman. Pacta paita piñarishpa llaquichinatapish paimanta anchuchinman.

—29—

¹⁹ Mana allita ruhuaccunamanta ama piñarichu. Diosta mana manchac runacunapac causaitaca ama munaichu.

²⁰ Chaica, millaita ruhuac runacunaca mana cushicuita charingachu. Diosta mana manchaccunaca lámpara huañushca shinami tucunga.

—30—

²¹ Ñuca huahualla, Mandac Diostapish, jatun mandactapish manchangui. Mana cazuccunahuanca ama tandanacuichu.

²² Paicunataca cungaillami llaqui japinga. Paicunata ishcaita llaquichigricushcataca ¿pitac yachangayari?

Shuctac yachachina rimashcacunamanta

²³ Caicunapish yachaisapa cunashca rimashcacunami: Ima llaquita taripacushpaca ñahuita ricushpalla shucpac parte tucunaca mana allichu.

²⁴ Diosta mana manchac runata: «Canca cashcata ruhuacmi cangui» nictaca tucui gentecunami maldicianga. Shinallatac shuctac llactapi causaccunapish piñangacunami.

²⁵ Ashtahuanpish chai llaquichiccunataca cuyangacunami. Paicunaca bendiciashcami canga.

²⁶ Alli rimaicunahuan cutichic runapac shimitaca muchac shinami alli ninga.

²⁷ Canzha ruhuaicunatarac ruhuangui. Cambac allpacunapi ruhuaitarac yuyaringui. Chai quipaca cambac huasita shayachingui.

²⁸ Ama pitapish llullashpa, huillashpa llaquichinguichu. Cambac shimihuanpish ama llullanguichu.

²⁹ Ama: «Pai imata ruhuashca shinallatacmi ruhuasha, pai llaquichishca shinallatacmi llaquichisha» ninguichu.

³⁰ Quilla runapac allpa ladotami pasacurcani. Yuyaita mana charicpac uvas chagra ladotami ricurcani.

³¹ Chai pambacunapica chinicuna, cashacuna huiñashpa jundashcami carca. Chai pamba muyundi pircacunapish tucui urmashcami carca.

³² Chaita ricushpami, ñuca shungupi yuyarishpa cai yachachinata yuyarircani:

³³ Ashata sueñushpa, umata caiman chaiman cuyuchishpa, ashata samaringapac maquita cruzashpa siricucpica,

³⁴ huaccha cana punzhacunaca yanga puric runa shinami chayamun. Shinallatac imapish illac canaca macanacuc runa shinami shamun.