PROVERBIOS 23 - Dios Rimashcata Quillcashcami

—6—

¹ Shuc mandac-huan micungapac tiyarishpaca, paihuan tiyacushcataca alli yuyaringui.

² Yallita micunayaihuan cashpaca, cuchillota cungapi churac shina jarcaringui.

³ Chai mandacpac sumac micunataca ama yallita munanguichu. Chaicunaca pandachiclla micunami.

—7—

⁴ Ama chayucyanallata munanguichu. Chai munaita saquishpa, alli yuyaihuan puringui.

⁵ ¿Charic tucunaca yangalla cashcataca, manachu ricungui? Chaicunaca alas huiñacpi, anga jatarishpa jahuata ric shinami, cungailla chingarinlla.

—8—

⁶ Ama misa runahuan micungapac tiyaringuichu. Chai sumaimana micunata ama munanguichu.

⁷ Paica, paipac shungupi ima shina yuyaricushca shinallatac cashpami: «Micuilla, ubiailla» ninga. Shina cashpapish mana tucui shunguhuanchu chashnaca nicun.

⁸ Chai micushcataca arcadanguimi. Can sumacta pagui nishcapish yangami canga.

—9—

⁹ Yuyai illac runataca ama rimanguichu. Can cushca alli yuyaitaca mana chasquisha ningachu.

—10—

¹⁰ Cambac ñaupa taitacuna churashca linderotaca ama cuyuchinguichu. Taita mama illac huahuacunapac allpapipish ama yaicuringuichu.

¹¹ Paicunata cuidac Diosca yallita sinchimi. Paimi paicunata llaquichishcamanta cantapish llaquichinga.

—11—

¹² Yachachishca shimicunataca tucui shunguhuan pactachingui. Alli yachachishpa rimashcacunata cambac ringrihuan uyangui.

—12—

¹³ Huahuata yachachishpa dalinataca ama saquinguichu. Angullahuan dalicpica mana huañungachu.

¹⁴ Anguhuan yachachishpa dalishpaca, paipac alma Seolman rinamantami quishpichingui.

—13—

¹⁵ Ñuca huahualla, cambac shungu yuyaisapa cacpica, ñuca shungupish cushicungami.

¹⁶ Can imatapish allita rimacpica, ñuca shungupish cushicungami.

—14—

¹⁷ Ama cambac shungupi juchayuccuna shina causanata munaichu. Chaipac randica punzhanta Mandac Diosllata manchashpa causangui.

¹⁸ Chashna cacpica, shamuc punzhacuna canman allimi canga. Shinallatac can shuyacushcaca mana yangachu canga.

—15—

¹⁹ Ñuca huahualla, ñucata uyashpa alli yachaisapa cangui. Cambac shunguta allichishpa, alli ñanta catingui.

²⁰ Vinota ubiaccunahuanpish, yallita micuc runacunahuanpish ama tandanacunguichu.

²¹ Chaica, machac runapish, yallita micuc runapish huacchami tucunga. Sueñushpalla causashpami lliqui churanata churaringa.

—16—

²² Cambac quiquin taitataca cazungui. Cambac mama yuyacyacpica ama millanguichu.

²³ Cashcata nishpa causanatapish, alli yachaitapish, alli yuyaita cushcatapish randic shina chasquishpaca, ama catunguichu.

²⁴ Cashcata ruhuac runapac taitaca yallitami cushicun. Yuyaisapa churipac taitaca chai churihuanmi cushicunga.

²⁵ Cambac taitapish, canta sajuaric mamapish yallita cushicuchun.

—17—

²⁶ Ñuca huahualla, tucui shunguhuan ñucata uyaiyari. Cambac ñahuihuanca ñuca ima shina causashcata ricuiyari.

²⁷ Cullquimanta huainayac huarmica yallita ucu jutcu shinami. Shucpac huarmica quichqui jutcu shinami.

²⁸ Chai huarmica shuhuac shinami, pacalla chapacun. Paica achca runacunatami pandachishpa urmachin.

—18—

²⁹ ¿Pipactac aij nishpa purinaca? ¿Pipactac nanaihuan causanaca? ¿Pipactac piñanacushpa purinaca? ¿Pipactac aij nishpa huacanaca? ¿Pipactac yanga chugrichishca purinaca? ¿Pipactac ñahui verdiyashca purinaca?

³⁰ Chai llaquicunaca vinota ubiaccunapac, chapushca vinota ubiashpalla causaccunapacmi can.

³¹ Vasopi pucanlla cactapish, churacpi vino tallirishpa jagan nicuctapish, cungataca mishquilla pasarictapish ama munaichu.

³² Ashtahuanpish chai quipaca culebra shinami caninga. Millai culebra canishca shinami venenanga.

³³ Cambac ñahuipica mana ricurishcacunami ricuringa. Cambac shungupish millai rimaicunatami rimachinga.

³⁴ Mama cucha chaupipi siricushca shina. Jatun barco chaupipi shayacuc caspi puntapi tiyacushca shinami cangui.

³⁵ Canca: «Macashcacunami. Shina cacpipish, mana nananchu. Chugrichishcacunami. Shina cacpipish, mana yuyarinichu. Riccharishpaca ubiagrishallatacmi» ninguimi.