PROVERBIOS 22 - Dios Rimashcata Quillcashcami

¹ Alli nishca canami jatun charic canatapish, ashtahuan yalli alli. Tucuipac cuyashca canami cullquitapish, curitapish ashtahuan yalli alli.

² Chayuc runapish, huaccha runapish chaipurallatami. Mandac Diosca ishcaitatacmi ruhuashca.

³ Yuyaisapa runaca maita ricushpa ima llaqui japigricucpica anchurinmi. Ashtahuanpish yuyai illac runaca rishpa llaquipi urmanllami.

⁴ Mandac Diosta manchashpa, mana jatun tucushpa causashpaca chayucyancunami, alli nishcapish tucuncunami. Shinallatac causaitapish charinmi.

⁵ Mana allita ruhuac runapac ñanpica cashacunapish, tucllacunapish tiyanmi. Maijanpish causaita cuidashpaca chaicunamanta anchuringami.

⁶ Huahuataca alli causanata yachachingui. Shina yachachicpica, yuyacyashpapish mana cungaringachu.

⁷ Chayuc runaca huacchacunapac mandacmi tucun. Cullquita mañac runaca mañachic runapac randishca shinami tucun.

⁸ Tarpuc shina mana allita ruhuacca mana allitatacmi tandanga. Paitaca varahuanmi tucuchinga.

⁹ Cuyac shunguhuan ricuc runaca bendiciashcami canga. Huacchacunaman carashcamantami chashnaca canga.

¹⁰ Burlashpa asic runata llucchishpa cachacpica, piñanacuica chiriyangami. Piñanacushpa rimarinapish, pingaichinapish tucuringami.

¹¹ Jatun mandacca chuya shungu runatami cuyan. Sumacta rimac runami paihuanca apanacunga.

¹² Alli yachaitaca Mandac Diosmi cuidan. Ashtahuanpish yachashca jahua llullashpa rimashcacunataca pandachishpami tucuchin.

¹³ Quilla runaca: «¡Leonmi canzhapi chapacun, ñanpi japishpa huañuchingami!» ninmi.

¹⁴ Shucpac huarmi rimashcaca yallita ucu jutcu shinami. Mandac Dios piñashca runaca chai huarmihuanmi juchapi urmanga.

¹⁵ Mosocunapac shungupica yuyai illac canaca aichayashca shinami. Ashtahuanpish anguhuan macashpa yachachicpica, paimanta anchuringami.

¹⁶ Maijanpish chayucyangaraicu huaccha runata llaquichic, mana cashpaca chayuc runaman cucca huacchami tucunga.

Yachachina quimsa chunga rimashcamanta

¹⁷ Yuyaisapacuna yachachishpa rimashcacunataca cambac ringrihuan uyangui. Ñuca alli yachachishcataca tucui shunguhuan pactachingui.

¹⁸ Cai rimaicunata cambac shungupi huacaichishpaca cushicunguimi. Cambac callu puntapimi rimangapac charingui.

¹⁹ Mandac Diospi shunguta churachunmi cunanpish canman yachachini.

²⁰ ¿Manachu quimsa chunga cunashpa yachachishcataca canman quillcani?

²¹ Cai cashcata nic shimicunataca canta cachaccunaman aparichunmi quillcani.

—1—

²² Huaccha runa cashcamanta paimanta ama imata quichunguichu. Llaquihuan causac runatapish, pueblo pungupi cac mandaccunapacman apashpa ama llaquichinguichu.

²³ Mandac Diosmi paicunataca misanga. Paicunamanta quichuccunataca paillatacmi causaita quichunga.

—2—

²⁴ Yalli piña runahuan ama tandanacunguichu. Rabiaric runahuanca ama apanacunguichu.

²⁵ Pacta paicuna shina tucushpa, cambac causaita tucllapi churanguiman.

—3—

²⁶ Ama shuccunapac debimanta can debiyuc tucunguichu. Shuccunapac debimanta can pagangapac ama ari ninguichu.

²⁷ Cullquita mana cutichic pudicpica, can sueñuna camatami quichunga.

—4—

²⁸ Cambac ñaupa taitacuna cambac allpapi churashca linderocunata ama cuyuchinguichu.

—5—

²⁹ ¿Ima ruhuanatapish alli yachac runata maipi ricushcanguichu? Paica jatun mandaccunapac ñaupapimi servinga. Yanga gentecunataca mana servingachu.