PROVERBIOS 21 - Dios Rimashcata Quillcashcami

¹ Jatun mandacpac shungu Mandac Diospac maquipica callpacuc yacu shinami. Diosmi pai munashcata ruhuachin.

² Runapac yuyaipica tucui pai ruhuashcacunami alli ricurin. Ashtahuanpish Mandac Diosmi shungutaca pezac shina ricucun.

³ Mandac Diosmanca cashcata ruhuana, alli ruhuanami animalcunata cushpa huañuchishcatapish yalli alli ricurin.

⁴ Jatun tucushpa ricunapish, shungupi jatun tucunapish Diosta mana manchana yuyaipish juchami.

⁵ Imatapish alli yuyarishpa charishcaca achcami tucunga. Ashtahuanpish mana alli yuyarishpa, huacta huacta charishcacunaca tucurishpami catinga.

⁶ Llullashpa jahualla chayucyashpaca huañuitami mashcacun. Chai yalli valishcacunaca samai shina chingarinllami.

⁷ Diosta mana manchaccunataca paicuna shuhuashcallatacmi tucuchinga. Paicunaca cashcata ruhuanataca mana munarcacunachu.

⁸ Jatun mana allita ruhuac runapac causaica pandaripac, mana ricsishca ñan shinami. Ashtahuanpish allicunallata ruhuacpacca imata ruhuashcapish allimi.

⁹ Imatapish rimarishpa llaquichic huarmihuan jatun huasipi causanapac randica, jahua azoteapi shuc cuchullapi causanami ashtahuan alli.

¹⁰ Diosta mana manchac runapac shungupica pitapish llaqui japichunmi munan. Pitapish mana cuyanchu.

¹¹ Burlashpa asic runata llaquichicpica, yuyaita mana charicpish, yuyaisapami tucunga. Yuyaisapa runata cunacpicarin, ashtahuan yachaisapami tucun.

¹² Diosca paita mana manchac runapac huasi ucupurataca ricucunmi. Diosta mana manchaccuna paicuna mana allita ruhuashcamanta chingaricuctapish ricucunmi.

¹³ Huaccha runa caparishpa mañacpi, mana uyac runataca quipata pai caparicpipish mana uyangachu.

¹⁴ Imatapish pacalla carashpaca, yalli piñarishcatapish allichinmi. Pacalla pagashpaca nina japiric shina piñarishcatami allichin.

¹⁵ Cashcata ruhuac allita ruhuashpaca cushicunmi. Ashtahuanpish mana allita ruhuaccunamanca tucuchic llaquimi ricurin.

¹⁶ Alli yachaita saquishpa caruyacca huañushcacunahuanmi tandanacugringa.

¹⁷ Mana allicunata ruhuashpa cushicuc runaca huacchayangami. Vinotapish, mishquilla ashnacuctapish munac runaca mana charicyangachu.

¹⁸ Cashcata ruhuac runataca Diosta mana manchac runata cushpa, allita ruhuac runataca yachashca jahua mana cazuc runata cushpami quishpichin.

¹⁹ Imatapish rimashpa piñachic huarmihuan causanapac randica, shitashca pambapi causanami ashtahuan alli.

²⁰ Yuyaisapa runapac huasipica ima valiccunapish, aceitepish tiyanmi. Ashtahuanpish yuyai illac runaca tucuitami tucuchin.

²¹ Cashcata ruhuashpa, llaquishpa causacca alli nishcapish, cashcata ruhuac nishcapish cangami. Shinallatac causaitapish charingami.

²² Yuyaisapa runaca sinchi runacunapac pueblotapish quichunmi. Paicuna jarcangami yuyacushca jatun pircatapish urmachinmi.

²³ Imatapish rimarinamanta calluta jarcaric runaca paipac causai ama llaquita apachunmi cuidan.

²⁴ Cariyac, jatun tucuc runataca mana cazushpa asic runa nincunami. Yallita cariyashpa mana cazushpami, imatapish ruhuan.

²⁵ Quilla runaca paipac maqui imata mana ruhuasha nicpimi, imata charinata munashpa huañucun.

²⁶ Punzhanta imacunata munashpami causan. Ashtahuanpish cashcata ruhuac runaca mana misashpa carangapacpish charinmi.

²⁷ Diosta mana manchaccunaca animalta Diosman cushpa rupachishcapish millanami. Mana alli shunguhuan cushcatacarin ashtahuanmi mana ricunayachin.

²⁸ Llullashpa huillac runaca huañungami. Ashtahuanpish allita uyac runaca allimi llucshinga.

²⁹ Diosta mana manchac runaca imatapish allita ruhuashca shinami purin. Ashtahuanpish allita ruhuac runaca paipac causaipica allimi can.

³⁰ Alli yachaipish, ima yuyaipish, ima cunashcapish Mandac Diostaca mana ati pudinchu.

³¹ Macanacui punzhapacca caballotami yallita allichincuna. Ashtahuanpish Mandac Dios mishachicpimi mishancuna.