PROVERBIOS 20 - Dios Rimashcata Quillcashcami

¹ Runaca vinota ubiashpaca burlashpami asin. Machana yacuta ubiashpaca bullashpami caparin. Chaicunata ubiashpaca mana yachaisapa cashcatami ricuchin.

² Jatun mandac yallita piñarishpaca león huacac shinami manchachin. Pipish paita piñachishpaca paillatacmi huañunga.

³ Piñanacuimanta anchuricca alli nishcami. Yuyai illac runa piñanacuipi yaicucca mana illangachu.

⁴ Quilla runaca yapuna punzhapica mana yapunchu. Cosechana punzhapi llucshishpaca imata mana taringachu.

⁵ Runapac shungupi yuyashcaca ucupi cac yacu shinami. Ashtahuanpish yuyaisapa runami chaitaca taringa.

⁶ Achcacunami allita ruhuanchic nincuna. Ashtahuanpish mana llullac runataca ¿pitac taringayari?

⁷ Mana pandarishpa alli causacca cashcata ruhuac runami. Paipac churicunaca pai shina causashpami cushicun.

⁸ Jatun mandac taripangapac tiyarishpaca, millaita ruhuashcataca paipac ñahuihuan ricushpallami llucchishpa cachan.

⁹ ¿Pitac: «Ñuca shungupica chuyami cani. Jucha illacmi cani» ni pudingayari?

¹⁰ Mana alli pezactapish, mana alli medictapish ishcaitatacmi Mandac Diosca mana ricunayachin.

¹¹ Huambraca pai ruhuashcahuanmi chuya cashcata, alli shungu cashcata ricuchin.

¹² Mandac Diosca ñahuitaca ricuchun, ringritaca uyachunmi ishcaitatac ruhuashca.

¹³ Mana huaccha causangapacca ama sueñunallata munaichu. Ñahuita pascashpaca, mana nictami micungui.

¹⁴ Randic runa imata randicushpaca: «Mana allichu, mana allichu» ninmi. Ashtahuanpish ña randishpaca, alli nishpami cushicun.

¹⁵ Curipish, sumac achic nicuc rumicunapish achcami tiyan. Shina cacpipish, alli yachaccunapac rimashcami chaicunamanta yalli valin.

¹⁶ Mana ricsishca runapac garante tucuc runapac churanataca japinguilla. Caru llacta runapac garante tucuc runamanta prendata japinguilla.

¹⁷ Runamanca llullashpa japishca micunaca mishquimi. Shina cashpapish, amullishca quipaca cascajo rumi shinami tucunga.

¹⁸ Ima ruhuanata yuyarishcaca cunashcahuanmi alli llucshin. Jatun macanacuitaca allita yuyarishpami ruhuana can.

¹⁹ Huashalla parlac runaca shungupi tiyacushcatami llucchichin. Imatapish rimac runahuanca pacta tandaringuiman.

²⁰ Paipac taitata, mana cashpaca mamata llaquichicca manchana amsa tutapi lámpara huañuc shinami tucunga.

²¹ Imapish huacta huacta charishcacunaca quipamanca mana cushichinchu.

²² Canca: «Ñucapish llaquichishami» ama ninguichu. Ashtahuanpish Mandac Diosllata shuyangui. Paimi quishpichinga.

²³ Mana alli pezaccunataca Mandac Diosca millanayachinmi. Mana alli pezac balanzaca mana allichu.

²⁴ Gentecunapac causaica Mandac Diospacmi. Runaca paipac causai ima shina canataca ¿ima shinatac yachangayari?

²⁵ Shuc runa manarac alli yuyarishpa Diosman imata cushami nishpaca, tucllapi urmac shinami tucun.

²⁶ Yuyaisapa jatun mandacca Diosta mana manchaccunataca huairachic shinami shic-huan. Paicunataca ruedacunahuanmi sarun.

²⁷ Runapac samaica Mandac Dios cushca lámpara shinami. Chaimantami shungupi tucui yuyashcata ricun.

²⁸ Jatun mandacca llaquic cashcamanta, cashcata nic cashcamantami cuidashca causan. Cuyac cashpami pai mandashpa tiyarinataca mana chingachin.

²⁹ Mosocunapac sumaimanaca paicuna sinchi cashcami can. Yuyaccunapac sumac canaca yurac accha canami can.

³⁰ Macashpa chugrichishcaca millai runapacca jambimi. Llaquichishcapish shungumanta mapa yuyaita anchuchinmi.