PROVERBIOS 2 - Dios Rimashcata Quillcashcami

Alli yachaica alli cana cashcamanta

¹ Ñuca huahualla, ñuca rimashcacunata chasquishpa, ñuca mandashcacunata shungupi huacaichishpa,

² Alli yachaita allita uyashpa, tucui shunguhuan entendinata munashpa,

³ Alli yachaita mañashpa, yallita entendinata munashpa,

⁴ cullquita mashcac shina, ima allicunata mashcac shina, mashcashpaca,

⁵ Mandac Diosta manchanatami entendingui. Paipac alli yachachishcatami ricsingui.

⁶ Mandac Diosmi alli yachaitaca cun. Paipac shimimi allita yachachin, allita entendichin.

⁷ Alli yachaimi allita ruhuaccunamanca mana pandana yuyaita cun. Allita ruhuashpa causaccunapacca jarcarina escudo shinami.

⁸ Cashcata ruhuashpa causaccunata cuidashpami, paipaclla causaccunapac ñantapish huacaichin.

⁹ Shina cuidacpimi, cashcata ruhuanatapish, allita ruhuanatapish, imata pacta pacta ruhuanatapish, tucuipi alli causanatapish entendingui.

¹⁰ Cai alli yachai cambac shungupi yaicucpi, cambac almapac alli cacpica,

¹¹ cai alli rimashcacunaca cuidangami. Cai alli yuyaicunaca allita entendichingami.

¹² Mana alli ñanmantapish, millaita rimac runamantapish cuidangami.

¹³ Chai runacunaca amsa ñanta puringapacmi alli ñancunataca saquincuna.

¹⁴ Paicunaca mana allita ruhuashpami cushicuncuna. Jatun mana allicunata ruhuashpami, yallita asincuna.

¹⁵ Paicunaca mana alli ñantami purincuna. Paicunaca pandatami causancuna.

¹⁶ Shucpac huarmimanta cacharichingami. Mana ricsishca huarmicuna sumacta rimashpa, inquitacpipish cuidangami.

¹⁷ Chai huarmica huambrarac cashpa charishca cusata shitashpami, Dios-huan ari nishcata cungarin.

¹⁸ Chai huarmipac huasica ucuyachic shinami huañuiman apacun. Pai purina ñancunapish huañushcacunapacmanmi apacun.

¹⁹ Maijanpish chai huarmihuan chayariccunaca mana cutingachu. Chai alli ñanpica ña mana chaquita churangachu.

²⁰ Shinami canca allita ruhuaccunapac ñanta purina cangui. Cashcata ruhuaccunapac ñantami catina cangui.

²¹ Allita ruhuaccunallami allpapica causanga. Imapish pandata mana ruhuaccunallami llactapica causashpa catinga.

²² Ashtahuanpish Diosta mana manchaccunaca allpamanta anchuchishcami canga. Yachashpapish mana cazuccunaca chai allpamanta llucchishcami cangacuna.