PROVERBIOS 19 - Dios Rimashcata Quillcashcami

¹ Mana entendic shuccunata rimashpa llaquichinapac randica, huaccha cashpapish ima millaita mana ruhuashpa causanami alli.

² Manapish yachashpa imata ruhuanaca mana allichu. Maijanpish callpac shina imatapish utca ruhuacca pandarinmi.

³ Yuyai illac runaca paipac causaipimi pandarin. Chai quipaca paipac shungupimi Mandac Diosta piñan.

⁴ Chayuc runa cacpica, apanacuccunapish achcami tiyan. Ashtahuanpish huaccha cacpica paihuan apanacucpish cungarinmi.

⁵ Llullashpa huillac runaca llaqui tucungatacmi. Llullashpa puric runaca miticushpa mana ati pudingachu.

⁶ Alli shungu runa ayudachunca achcacunami mashcan. Imatapish carac runahuanca tucuimi apanacun.

⁷ Huaccha runataca tucui paipac huauquicunami mana ricunayachin. Paihuan apanacuccunacarin paimantaca caruyancunallami. Pai maijanhuan parlasha nishpapish pita mana taringachu.

⁸ Maijanpish yuyaita japicca quiquin causaitami cuyan. Alli yuyaihuan causashpaca allitami japinga.

⁹ Llullashpa huillac runaca llaqui tucungami. Llullashpa puric runaca chingaringami.

¹⁰ Yuyai illac runa sumacta causanaca mana valinchu. Shinallatac servic runa mandaccunata mandac tucunacarin manatac allichu.

¹¹ Alli yuyaiyuc runaca piñarishpapish jarcarinmi. Piñaccuna rimacpipish upalla tucushpa, alli nishca canallatami munan.

¹² Jatun mandac piñarishpaca león huacac shinami manchachin. Pai alli ruhuashcaca garua quihuapi urmashca shinami.

¹³ Yuyai illac churica taitata llaquichishpallami causan. Caparishpa rimaricuc huarmica catipi shutucuc tamya shinami can.

¹⁴ Taitamantaca huasita, shinallatac pai ima charishcacunatami chasquingui. Ashtahuanpish Mandac Diosmantaca alli yuyaiyuc huarmitami chasquingui.

¹⁵ Quillanayaimi runataca yallita sueñuchin. Quilla runaca yarcaihuanmi causanga.

¹⁶ Mandashcata pactachic runaca paipac causaitami cuyan. Dios munashca shina causanata mana munacca huañungami.

¹⁷ Huacchacunaman imata cushpaca Mandac Diosmanmi mañachingui. Allita ruhuashcamantaca Diosmi allita cunga.

¹⁸ Cambac churi uchilla cacpirac yachachi. Shina cashpapish cambac shungupica ama huañuchina yuyaihuan canguichu.

¹⁹ Yallita piñaric runaca llaquimi tucunga. Paita ayudacpica, ashtahuan millaita ruhuashpami catinga.

²⁰ Cunashcatapish, alli causachun rimashcatapish chasquingui. Chaicunata uyashpami yachac tucungui.

²¹ Runapac shungupica caita chaita ruhuana yuyaicunami tiyan. Ashtahuanpish Mandac Dios munashcami pactanga.

²² Shuccunata llaquic runamanca mai cushicuimi can. Llullac runa canapac randica, huaccha canami ashtahuan alli.

²³ Mandac Diosta manchac runaca causangami. Paita manchashpaca imatapish mana manchashpa cushillami causanga. Ima llaquipish mana japingachu.

²⁴ Quilla runaca micunata maquipi charicushpapish paipac shimipica mana churangachu.

²⁵ Burlashpa asic runata macacpica, mana yachac runapish cazunata yachacungami. Yuyaisapa runata alli tucuchun rimacpica, ashtahuanmi yuyaita japin.

²⁶ Taitapacta imata shuhuac, mamata huasimanta llucchishpa cachacca mana llaquic pingaita mana charic churimi can.

²⁷ Ñuca churilla, alli yuyaicunata cushcata mana uyashpaca, alli yachaimantami caruyacungui.

²⁸ Llullashpa huillac runaca llaquichicucpica burlashpami asin. Diosta mana manchac runaca mana allicunatami rimarin.

²⁹ Burlashpa asiccunata llaquichingapacca allichishcami tiyacun. Yuyai illac runacunata lomopi azotinapish allichishcami tiyacun.