PROVERBIOS 18 - Dios Rimashcata Quillcashcami

¹ Pailla causanata munacca quiquin munaillatami ruhuanata mashcan. Alli yuyaita cucpipish, mana cazunchu.

² Yuyai illac runaca alli yuyaita cucpipish, mana cushicunchu. Ashtahuanpish, paipac shungu munashcatami huillanata munan.

³ Millaita ruhuashpaca pingaimi tucun. Jatun tucushpaca mana alli nishcami tucun.

⁴ Runapac rimashcaca ucumanta llucchishca yacu shinami. Alli yachaica tucyac yacu callpacuc shinami.

⁵ Cashcata ruhuac runata llaquichingaraicu Diosta mana machac runaman ama tucuichu.

⁶ Yuyai illac runa rimashpaca piñanacuillapimi churan. Paipac rimashcaca llaquichichunmi caparicun.

⁷ Yuyai illac runaca paipac rimashcallahuantacmi llaqui tucun. Paipac shimillahuantacmi huascata cungapi churaric shina tucun.

⁸ Huashalla parlacpac shimica mishquilla micui shinami, ucu shungucaman chayan.

⁹ Quilla runaca imatapish tucuchic runahuanca quiquin huauquindi shinami.

¹⁰ Mandac Diospac shutica sinchi torre shinami. Cashcata ruhuac runa paipacman callpacpica ayudanmi.

¹¹ Chayuc runapac charishcaca muyundita pircashca pueblo shinami. Paipac yuyaipica jahuacaman jatunta pircashca shinami.

¹² Manarac llaqui tucushpaca, jatun tucushcami runaca ricurin. Ima allicunata japingapacca Yangalla canami alli.

¹³ Manarac imata uyashpa rimaric runaca yuyai illac, shinallatac mana pingacmi can.

¹⁴ Runaca ungushca cashpapish causai pudinmi. Shina cashpapish ¿shungupi llaquilla cashpaca causai pudingachu?

¹⁵ Alli yuyaita charic runapac shunguca alli yachaitami japin. Yachaisapacunapac ringrica alli yachaitami uyanata munan.

¹⁶ Ima caranata cushpami runapac shungutaca pascan. Mandaccunapacmanpish pushanllami.

¹⁷ Llaquita huillangapac punta shamucca cashcata ruhuac shinami ricurin. Ashtahuanpish paita piñac quipata shamushpaca, llullac cashcatami ricuchin.

¹⁸ Suerteta ruhuacpimi, piñanacuica tucurin. Shinallatac poderta chariccunapurami imata ruhuanataca yuyarincuna.

¹⁹ Huauqui llaquichishca runaca pueblo muyundita pircashca shinami sinchi tucun. Huauquindi piñanacushcaca fierro aldabahuan huichcashca pungu shinami.

²⁰ Runaca pai rimashcallahuantacmi micunata micuc shina paipac huicsapica jundachin. Pai rimashcallatatacmi micuc shina sacsanga.

²¹ Causanapish, huañunapish callupimi tiyan. Imatapish rimanata munac runaca chaillatatacmi japinga.

²² Maijanpish huarmita taricca allitami tarin. Mandac Dios cuyashpa cushcatami chasquin.

²³ Huaccha runaca sumactami riman, chayuc runaca sinchitami riman.

²⁴ Apanacuc runaca alli apanacuc cashcatami ricuchin. Alli apanacuccunaca quiquin huauquitapish yalli allimi.