PROVERBIOS 17 - Dios Rimashcata Quillcashcami

¹ Sumac micuicunata micushpapish piñanacushpalla causanapac randica, chaquishca tandata micushpa, sumacta causanami ashtahuan alli.

² Alli yuyaiyuc servicca mana cazuc churitapish mandangami. Imalla tiyashcataca paipac huauquicunahuanmi chaupinacunga.

³ Cullquitapish, curitapish hornopi rupachishpami alli cashcata ricuna. Ashtahuanpish runapac shungutaca Mandac Diosmi ricucun.

⁴ Millaita ruhuac runaca mana allita rimashcatami chasquin. Llullac runapish llaquichic runa rimashcatami uyan.

⁵ Huaccha runata asicca paita ruhuac Diostami piñachin. Llaquihuan cacpi, cushicuc runaca paipish llaquitami apanga.

⁶ Yuyaccunapac sumac coronaca nietocunami. Shinallatac huahuacunapac cushicunaca taita mamami.

⁷ Yuyai illac runa sumacta rimashcaca mana alli uyarinchu. Mandac runa llullata rimanacarin ashtahuan mana allichu.

⁸ Cullquita pacalla cuc runamanca pacalla cushcaca magia shinami. Chashna pacalla cushpami maipipish tucui pai munashcata chasquin.

⁹ Mana allita ruhuashcata pimanpish mana parlacca tucuihuanmi apanacun. Pimanpish parlashpa puric runaca paihuan apanacunatapish caruyachinmi.

¹⁰ Alli yuyaiyuc runa rimashcaca yuyai illac runata patsac cutin azotishcatapish yalli allimi.

¹¹ Mana cazuc runaca piñanacuillatami mashcan. Paita llaquichichunca millai huillactami cachanga.

¹² Millaita ruhuac yuyai illac runahuan tupanapac randica, huahuacuna illac piña huarmi osohuan tupanami ashtahuan alli.

¹³ Maijan allita ruhuacpi, mana allita ruhuashpa cutichic runapac huasimantaca ima mana allica mana anchuringachu.

¹⁴ Piñanacuita callarichic runaca jatun yacutami cacharin. Piñanacui manarac callaricpi anchuringui.

¹⁵ Mana allita ruhuac runata cashcata ruhuacmi nictapish, cashcata ruhuac runata llaquichictapish Mandac Diosca millanayachinmi.

¹⁶ ¿Mana entendic runa alli yachac cangapac achca cullquita cushpapish mana yuyaita charishpaca entendingachu?

¹⁷ Apanacuc runaca tucui causaipimi cuyan. Llaqui punzhacunapica shuc huauqui shinami can.

¹⁸ Yuyai illac runaca paipac ricsishca runapac garante tucushpami maquita cunlla.

¹⁹ Piñanacuita mashcac runaca piñanacuitami munan. Punguta pascac shina rimac runaca paillatacmi llaquita mashcan.

²⁰ Mana alli shungu runaca manatac alli causaita charingachu. Llullata rimac runapish jatun llaquipimi urmanga.

²¹ Shuc taitaca paipac llaquipacmi yuyai illac churita charin. Yuyai illac churipac taitaca mana cushicuita charinchu.

²² Cushilla shunguhuan causanaca cuerpopac jambimi. Ashtahuanpish llaquilla shungu causaica tullutami chaquichin.

²³ Diosta mana manchac runaca cashcata ruhuac runata llaquichingapacmi pacalla pagota japin.

²⁴ Alli yuyaita charic runa alli yachac cashcataca ñahuipimi ricunalla. Ashtahuanpish yuyai illac runaca tucui cai pacha muyunditami ricucun.

²⁵ Yuyai illac churica taitata piñachinmi. Paita charic mamatapish huacachinmi.

²⁶ Cashcata ruhuac runata llaquichinaca manatac allichu. Dios munashcata ruhuac, alli nishca runacunata azotinapish mana allichu.

²⁷ Alli yachac runaca ashallatami riman. Alli yuyaiyuc runaca allita yuyarishpami riman.

²⁸ Upalla cashpaca, yuyai illac runapish yachaisapa nishcami canga. Alli entendic runa cashpami maipish cachun mana riman.