PROVERBIOS 16 - Dios Rimashcata Quillcashcami

Runacuna yuyarishcataca Dios ruhuachic cashcamanta

¹ Imatac ruhuanataca gentecunami yuyarin. Shina cacpipish, Mandac Diosmi chai yuyarishcata ricun.

² Runapac yuyaipica pai tucui ruhuashcacunami alli ricurin. Ashtahuanpish Mandac Diosmi chai yuyaitaca pezac shina ricucun.

³ Can imata ruhuanacunataca Mandac Diospac maquipi churai. Chaipimi can imata ruhuagricushcacunaca alli llucshinga.

⁴ Mandac Diosca shuc yuyaihuanmi tucuita ruhuashca. Diosta mana manchac runatapish llaquichina punzhapi llaquichingapacmi ruhuashca.

⁵ Mandac Diosca shungupi tucui jatun tucushcacunata millanayachinmi. Paicunaca manatac perdonashcachu canga.

⁶ Juchayuctaca llaquishpa, mana llullashpami perdonanga. Runaca Mandac Diosta manchashpami, mana allimantaca anchurin.

⁷ Mandac Dios maijan runapac causaita allimi nicpica, paita piñaccunapish paihuan alli tucusha ningacunami.

⁸ Mana allita ruhuashpa achcata charinapac randica, cashcata ruhuashpa ashallata charinami ashtahuan alli.

⁹ Imata ruhuanataca gentecunami shungupi yuyarin. Shina cacpipish Mandac Diosmi paicuna ruhuana cashcataca pushan.

¹⁰ Jatun mandacca Dios yuyachishcatami riman. Piñanacushcata allichicushpaca mana pandata rimangachu.

¹¹ Pezanapish, balanzapish cashcata pezacca Mandac Diospacmi. Mochilapi churashca pezana rumicunatapish can ruhuashcami can.

¹² Jatun mandaccuna yalli mana allita ruhuanataca millanayachinmi. Ashtahuanpish cashcata ruhuashpami pai mandanataca allita sinchiyachinga.

¹³ Jatun mandaccunataca maijanpish allita sumacta rimashpami cushichin. Paicunaca cashcata rimaccunatami cuyancuna.

¹⁴ Jatun mandac piñarishcaca huañuimanta huillac shinami. Ashtahuanpish yachaisapa runaca chai piñarishcata allichinmi.

¹⁵ Jatun mandac cushilla ñahuihuan cacpica, causaimi tiyan. Pai cuyaihuan ruhuashcaca quipa tamya puyu shinami.

¹⁶ Alli yachaitaca alli curitapish yallimi mashcana. Alli yuyaiyuc canaca cullquita yallimi alli.

¹⁷ Allita ruhuashpa causaccunaca mana allimanta anchurinmi. Mana allita ruhuanamanta cuidariccunaca causaitami cuidancuna.

¹⁸ Manarac llaqui tucushpaca jatun tucushcami can. Manarac urmashpaca, jatun tucushpami causancuna.

¹⁹ Macanacushpa quichushcacunata jatun tucushcacunahuan chaupinapac randica, yangalla gentecunahuan tandanacushpa paicuna shina tucunami alli.

²⁰ Yachachishpa rimashcata cazuc runami allita japinga. Mandac Diospi shunguta churashpa causac runaca cushicungami.

²¹ Shungupi yuyaisapa runaca entendic runa nishcami canga. Sumacta rimashcaca ashtahuanmi yachachin.

²² Alli yuyaiyuc runapi tiyashca alli yuyaica causaita cuc yacu shinami. Ashtahuanpish yuyai illac runapi tiyashca yuyaica llaquichinmi.

²³ Yuyaisapa runapac shunguca allita yuyarishpami riman. Sumacta ashtahuan rimashcaca ashtahuanmi yachachin.

²⁴ Sumacta rimashcaca bunga mishqui shinami. Almatapish cushichic, cuerpopacpish jambic shinami.

²⁵ Runamanca alli ñan shinami ricurin. Shina cashpapish huañuiman pushac ñanmi.

²⁶ Huicsata yarcanamantami trabajac runaca trabajan. Yarcacpimi imallatapish ruhuan.

²⁷ Mana allita ruhuac runaca mana allita ruhuanallatami yuyan. Paipac shimimantaca rupacuc nina shinami llucshicun.

²⁸ Millaita ruhuac runaca piñanacuipimi churan. Huashalla parlac runaca paihuan apanacuccunatapish caruyachinmi.

²⁹ Millai runaca paipac ricsishcata umashpami, mana alli ñanta pushan.

³⁰ Maijanpish ñahuita quimllashpaca mana allita ruhuanatami yuyaricun. Maijanpish shimita huichcashpaca mana allitami ruhuashca.

³¹ Runaca cashcata ruhuashpa causashpami, coronata chasquic shina yuyacyan.

³² Yallita sinchi runa canapac randica, mana utca piñaric canami ashtahuan alli. Quiquinllatac jarcaric runaca shuc pueblota japic runatapish, ashtahuan yalli allimi.

³³ Mizapimi suertetaca ruhuancuna. Shina cacpipish Mandac Diosmi imata ruhuanataca ricuchin.