PROVERBIOS 15 - Dios Rimashcata Quillcashcami

¹ Sumacta rimashcaca piñarishcata allichinmi. Ashtahuan sinchita rimashcaca ashtahuanmi rabiachin.

² Yuyaisapacunapac rimashcaca alli yachaicunatami riman. Ashtahuanpish yuyai illac runaca manapish canatami rimarin.

³ Mandac Diospac ñahuica tucui cai pachapimi allicunatapish, mana allicunatapish ricucun.

⁴ Sumacta rimac calluca causaita cuc yura shinami. Ashtahuanpish millaita rimacca shunguta paquinmi.

⁵ Yuyai illac churica taita cunashcata mana uyasha ninchu. Ashtahuanpish yuyaita charic churica cunashcata chasquinmi.

⁶ Cashcata ruhuac runapac huasipica imapish achcami tiyan. Ashtahuanpish Diosta mana manchac runa ima charishcaca paillatatacmi pandachin.

⁷ Yuyaisapa runacunapac rimashcaca alli yachaitami tarpun. Mana entendic runapac shunguca mana chashna ruhuanchu.

⁸ Mandac Diosca paita mana manchaccuna animalta cushpa rupachishcataca millanayachinmi. Ashtahuanpish allita ruhuaccuna mañacpica cushicunmi.

⁹ Mana manchac runapac causaica Mandac Diosmanca millanayaimi Ashtahuanpish cashcata ruhuashpa causactaca cuyanmi.

¹⁰ Alli ñanta saquic runataca sinchitami rimana Alli tucuchun rimashcata mana uyacca huañungami.

¹¹ Seolpish, Abadonpish Mandac Diospac ñaupapimi. ¡Runacunapac shungutacarin ashtahuanmi ricucun!

¹² Burlashpa asic runaca paita cunactaca piñanmi. Yachaisapacunahuanca mana tandarinchu.

¹³ Cushilla shungu runaca ñahuipish cushillami. Ashtahuanpish shungu llaquilla cacpica, yuyaipish llaquillami.

¹⁴ Alli yuyaita charic shunguca alli yachaitami mashcan. Ashtahuanpish mana entendic runaca yanga rimaicunallahuanmi sacsac shina causan.

¹⁵ Llaquilla caccunapacca tucui punzhacunami mana alli. Ashtahuanpish cushilla shungu runaca punzhantami cushicuita charin.

¹⁶ Achca charishcahuan pandarinapac randica ashallata charishpapish, Mandac Diosta manchashpa causanami ashtahuan alli.

¹⁷ Huira huagra aichata micushpapish, piñanacushpalla causanaca, ¿ima allita cangayari? Verdura micuillata micushpapish cuyanacushpa causashpaca mai allimi.

¹⁸ Utca piñaric runaca piñanacuillapimi churan. Ashtahuanpish mana utca piñaric runaca piñanacuita allichinmi.

¹⁹ Quilla runapac ñanca cashahuan jarcashca shinami. Ashtahuanpish allita ruhuaccunapac ñanca rumihuan sumacta ruhuashca ñanmi.

²⁰ Yachaisapa churica paipac taitata cushichinmi. Ashtahuanpish yuyai illac runaca paipac mamatami yangapi churan.

²¹ Yuyai illac runaca mana entendishcahuanmi cushicun. Ashtahuanpish alli yuyaita charic runaca paipac causaita allichinmi.

²² Mana tapunacushpa imata ruhuashcaca, chingarinmi. Ashtahuanpish taucacuna yuyaita cushcaca allimi ruhuarin.

²³ Runaca sumacta rimashpa cutichishpami cushicun. ¡Alli rimaita parlachun munashca horasca mai sumacmi!

²⁴ Alli yuyaita charicmanca causaiman apac ñanca jahuamanmi. Seolman apac ñanmantaca chashnami anchuringa.

²⁵ Mandac Diosca jatun tucushcacunapac huasitaca urmachingami. Ashtahuanpish viuda huarmi charishca allpataca paillatacmi sinchita cuidanga.

²⁶ Millai runacuna yuyarishcataca Mandac Diosca millanayachinmi. Ashtahuanpish alli shunguhuan rimashcataca alli ninmi.

²⁷ Charinallata munac runaca paipac huasi ucupuramanmi llaquita apamun. Ashtahuanpish cullquita pacalla cucpi mana japic runaca causangami.

²⁸ Cashcata ruhuac runaca imata rimangapacpish, yuyarinracmi. Ashtahuanpish Diosta mana manchaccunaca maipish cachun rimarinllami.

²⁹ Mandac Diosca paita mana manchaccunamanta carupimi. Ashtahuanpish cashcata ruhuaccuna mañacpica uyanmi.

³⁰ Cushilla ñahuihuan ricucpica, shungupish cushicunmi. Alli huillaita huillaccunaca tullucunatapish sinchiyachinmi.

³¹ Alli causachun cunashcata chasquicca yachaisapacunahuanmi causanga.

³² Alli yuyaita cushcata mana uyasha nic runaca quiquin almatami yangapi churan. Ashtahuanpish alli tucuchun rimashcata cazuc runaca alli yuyaitami charin.

³³ Mandac Diosta manchashpa causaccunaca alli yachaitami yachachin. Alli nishca cangapacca yangallami tucuna.